本來諗住對付班電話cold call, 點知攪到自己爭d無命: 33

一個好致命嘅錯誤，攪到依家唔知點算。D武俠片都成日有劇情講d酒菜會落咗毒啦，點解我哋會咁唔小心㗎。

我攞番袋花生出嚟，但阿榮話無用㗎，依家我哋身體已經有咗種物質，d花生起唔到作用㗎。我問佢重乜要咁做，佢話唔關佢事，係我哋太為食，又唔問人食唔食得之過。

佢話我已經廢咗武功，同埋唔可以再返番地球，但對身體無壞影響。

我同Celia兩個欲哭無淚，怪就怪點解咁為食。

「其實咁樣重好啦，你以為幫地球人會有好結果咩？就算無巴兩星人，地球人未遲早好似恐龍咁會絕種啦！點解？宇宙間，什至地球其他生物，邊會好似人類咁成日諗方法害自己同類㗎，你部電話日日有人想呃你錢害你，就算屋企人都會害自己，為咗層樓可以用盡方法傷害自己親人，遲早會攪炒齊齊玩完。我嚟咗巴兩星無耐，已經完全唔想返地球，你有無睇到，呢度連警察都無㗎，因為根本唔需要。同埋你都見到啦，佢哋個個都好友善，唔會搵計害自己同類。你哋死咗條心留係度啦。有我起度睇住你哋，你哋會好快適應呢度生活。」





我同Celia都有共同諗法，暫時留係度先，之後再諗辦法。

阿榮俾咗隔離單位我哋，有廁所嘅。食方便由阿榮個巴兩星老婆安排，煮番d地球食物。起初驚唔知會唔會又有毒，但心諗都無得走住，我哋廢咗武功再攪我哋都無意思，同埋阿榮兩公婆都食到好滋味，始終我哋都要食嘢。

我偷偷試過食花生，睇下係未無晒功用，阿榮無講錯，真係變咗純粹嘅花生。

今日阿榮兩公婆帶我哋出去貢下，順便講下巴兩星嘅運作。

無可否認呢度d人真係好友善，個個見到都會用番應該係呢度嘅語言打吓招呼，d笑容重有一種地球人無嘅真實感，唔係應酬式個種。不過日久見人心，都係唔好咁快下定論住。





阿榮都識講呢度d話，見佢兩公婆係咁好開心咁同人講嘢，都唔得閒理我哋咁。之後我哋去咗間食肆，終於有機會試下巴兩星嘅食物。

個d食物好似Pizza咁一塊一塊，有紅色橙色嘅，阿榮之後俾咗塊綠色嘅好似帳篷嘅嘢，話如果想去廁所就打開佢，就咁痾落去就得，個帳篷會自動清理，用完摺番埋就得㗎啦。Celia率先試咗，話d尿會好神奇咁自動消失。

我哋食咗幾塊Pizza,甜甜地味道都唔錯，我問係用咩嘢材料整，佢話係用星球上嘅土地元素整。我好奇𥄫下個廚房，見到入面d員工手藝好純熟迅速。不過阿榮話個d係機器人，星球上所有生產工作都係有機器人擔當，所以點解實體人唔駛工作。

呢個係地球人依家最大嘅憂慮，驚俾AI取代無得撈，但阿榮話巴兩星一早建立咗套完善機制，係製造機械人個時，已經係編寫程式度做咗手腳，限制咗佢哋係智慧上嘅發展能力，再結合番呢度俾地球先進同公平嘅資源分配制度，至今都係好有效咁執行。

係大家傾傾下嘅時候，見到兩個巴兩星人唔小心咁撞到，起初以為兩個會嗌交什至開拖，但諗唔到，佢哋互相耍晒冧重握埋手。





「你睇到啦，我無呃你。」

我同Celia都大開眼界，換著係香港，隨時又MMA。

阿榮話唔講咁多等我慢慢再瞭解，我問既然唔駛做嘢，咁d時間點打發。佢話d時間用嚟幫人囉！

唔通巴兩星真係咁正……..