本來諗住對付班電話cold call, 點知攪到自己爭d無命: 34

個晚返到我哋暫住個間屋時候，Celia無喇喇同我講三國演義，佢話當中有段情節，話孫權招待劉備請佢去吳國，重用醇酒佳餚美人係咁厚待佢，好彩諸葛亮知孫權周瑜用意，俾咗三個錦囊佢，其中一個錦囊係專登提醒佢，等劉備不至於樂不思蜀。

我諗唔到佢都有睇三國演義，但問題係我哋依家無晒戰鬥力，就算身在巴兩心在地球，都暫時做唔到d乜嘢。況且阿榮佢哋都對我哋幾好，得閒教吓我哋巴兩星話，呢度無好似地球咁分咁多國家同咁多種語言，全部都係only one 。

一個國家，一種語言。經濟分配制度類似地球曾經試行過嘅共產主義，由機械人從事生產同提供各式個人服務，每個巴兩星人體內有塊晶片，紀錄佢一舉一動。巴兩星人嘅思維由一台超級電腦所監察，任何有犯罪意圖嘅人會即時被處決，而相反幫人會有額外獎賞，例如可以住大d靚d嘅屋，可以長命d，唔怪得阿榮話巴兩星人會成日諗點樣幫人。阿榮話呢度個制度好過地球，但代價係俾超級電腦全天候監控，地球好多國家行嘅民主自由唔係呢度杯茶。

咁我再問阿榮，點解重要攪地球，有咩嘢目的。佢話遲d會帶我見呢個星球嘅官員，到時會真相大白。佢成日講巴兩星人都係被地球人利用，同埋丁寅星都係受害者。

我好似覺得真相離我越來越遠咁，Celia都話好複雜理解唔到。





今日阿榮話去值入晶片，值入之後會正式成為巴兩星人，我問佢係未諗清楚，佢話唔會後悔，重話之前無同我講，粒晶片可以醫埋病添。無可否認，呢輪係呢個星球逗留咗一段時間，尤其係巴兩星人個種真實嘅善良，同我先前所諗嘅，完全係兩回事，連Celia都覺得，d星球人完全唔會好似我哋平時咁會爭乜爭物，我哋連關愛座都變咗批鬥座，但佢哋只係一味諗點樣幫人，同埋有係嘢都係諗係未自己做錯，唔會責怪其他人。

呢度簡直係烏托邦，我諗地球到咗末日，地球人類都唔會有咁相親相愛。我開始討厭係香港，真係執輸行頭慘過敗家咁，自己轉過好多工，好多時係因為個d好似宮廷鬥爭咁嘅環境，個個都覺得自己啱晒人哋錯晒咁，一味諗自己利益。呢輪地球發生嘅嘢更加唔在講，大家一味攞電話上網嚟諗計呃人害人，攪到有d人驚咗科技，就算我都係，無喇喇有人係IG add你，第一時間諗佢一定有居心。

地球依家攪成咁，其實係某程度自己攞嚟。科幻電影成日講地球俾外星人入侵，但就算係真，可能唔係壞事。留係度其實真係唔差，只不過兩老重係地球，唔知佢哋係未重係博愛呢？同埋霍醫生對佢哋點呢？

就算真係樂不思蜀，但如果吳國係遠好過蜀國，特別係蜀國越來越腐敗，咁就算幫到地球又點？之後地球人未照舊咁你害我我害你，我諗最終會同恐龍同一命運。

我真係開始有掉轉槍頭嘅諗法……..