本來諗住對付班電話cold call, 點知攪到自己爭d無命: 32

個個好日唔搵我，一搵就ws叫我唔好理咁多嘢嘅古惑仔阿榮，竟然會住係巴兩星。佢話巴兩星人生理構造係d廢物會係體內自然分解，唔需要痾屎痾尿嘅，所以唔會有廁所，但佢係地球人，所以屋企有廁所。

攪掂晒d生理需要，自然要問佢點解會嚟咗巴兩星。佢話係移民嚟嘅，重對呢度讚不絕口，話係地球無可能過到呢d咁自在生活。

佢好似答得唔清唔楚咁，我再問佢點樣嚟，佢終於認係幫巴兩星人做嘢所得嘅獎勵。

聽到呢句我即刻扯晒火，我話你為咗嚟呢度攪到香港，攪到地球立立亂，你行古惑已經對個社會唔好，但都遠唔夠你依家咁仆街。

點知佢話番我笨柒，重反問番我地球場大龍鳳，地球人無份攪咩？重話好多嘢都係班電騙黨諗出嚟，佢哋想借助巴兩星人科技控制地球。講真就算無外星人攪局，地球人遲早都係攪到大亂㗎。





佢重話呢度d人唔會好似地球人咁，日日係度用各種方法殘害同類，細至一個家庭，一間公司，大至一個國家，鬥爭無日無之，巴兩星人更加唔會攪到自己居住嘅星球環境同氣候差晒，重唔識覺醒個隻。

地球人其實係宇宙間係相當低等，重成日拍科幻片話d外星人入侵地球，你估貪你地球香咩！

我重係覺得佢滿口歪理，佢話第二d星球唔吼地球，咁巴兩星呢？一樣嚟侵佔地球，點解釋呀？

道不同，我打咗個眼色俾Celia示意離去。

「喂！你哋走咗，無人照應你哋喎！」阿榮好輕佻咁講。





「大家唔啱咀形，無謂傾啦！」我準備起行。

「個次叫你唔好理咁多嘢你又唔聽，你估你真係咁把炮咩！識咗你咁耐唔通唔知你幾多斤兩！」佢好撚串。

「今時唔同往日啦！」

「你想話你依家好好打吖嗎！但係你連基本嘅警覺性都無，係人哋地方亂咁食嘢，見到部機有雞蛋仔就老豆姓乜都唔知，你重學人話救地球！」

「你講緊乜呀？」我開始有d不祥預感。





「你自己試下運唔運到功咪知我講乜囉！」

大撚鑊，我完全發唔到勁………