本來諗住對付班電話cold call, 點知攪到自己爭d無命: 31

踏破鐵鞋，好好彩咁嚟到敵人腹地，咁即係就快可以拯救到地球啦。咁依家首要任務，就係刮吓大本營係邊。

Celia話無諗過可以咁順利嚟到巴兩星，同埋無諗到呢度d人好似幾友善。我話地球都係㗎，中東個邊成日打仗，但睇過d去過旅行嘅人係網上都分享過，其實d人民係好多都好單純友善，佢哋嘅政權發動戰爭，無辜咁拖埋d人民落水，被其他地方標籤。

我同佢都有共識，就係唔好傷及無辜。我哋攞咗個飛行器操練，好快就上到手識飛。咁四圍貢吓，原來d類似地球玻璃幕牆商廈嘅巨樓都係巴兩星人屋企，每家每戶有個隱形門，佢哋唔知點樣就可以穿入去，跟住八卦吓入面，見大部分一家齊晒咁。

我諗起妹妹仔講過，呢個星球有無窮盡資源，d人係唔駛做嘢，依家親眼見到，真係有d羨慕，有機會真係想瞭解吓佢哋d生活。

但係，佢哋如果真係好似妹妹仔咁講，因為太無聊就走去攞地球嚟玩，咁就太過分啦。





Celia提番我要小心d，頭先好明顯話俾我哋知，係人都知我哋係地球人，呢樣野我反而諗漏咗。

之後我哋飛到一個好似食物館嘅地方，d人真係唔駛俾錢，係部自助售賣機㩒幾㩒，就有所要食物走出嚟，雖然我哋有花生，但都想試下呢度d食物味道係點。好奇走去研究其中一部機，部機突然轉晒畫面，跟住顯示晒好多係地球有嘅食品，中西日法式，什至連港式車仔麵雞蛋仔都有，真係唔到你唔信。試下㩒睇下有無料到，真係成塊雞蛋仔整咗出嚟，食落好脆好有蛋香，拍得住太安樓個間我一路以來覺得全香港最好味嘅雞蛋仔。

Celia原來好鍾意雞蛋仔，佢忍唔住整咗幾塊，重有綠茶咖啡等唔同味道。

之後整多碗車仔麵，有好多餸揀，真心正，呢輪太多唔好事情，呢餐好似攞嚟發洩咁，再加上真係太好味，我哋兩個痴咗線咁，結果食到嘔咁滯。

食完要做一樣嘢，但呢度有無廁所㗎？搵極都唔覺有類似廁所嘅建築物，巴兩星人係未唔駛排泄㗎？係虛擬世界紅磚屋石屋都有廁所，呢度真係唔覺有。





我哋好尷尬咁互望，佢眼神話俾我知佢都要去。咁點算好，係咪要就地。Celia重好細聲話佢嚟M添。

我諗起巴兩星人話有需要可以大嗌，我實在太急啦，Celia又M到。頭先我哋落水，都唔知會唔會影響佢健康。

「我要去廁所呀！」無辦法，要求救。

「你哋飛入嚟啦，等咗你哋好耐啦！」點解把男聲咁熟嘅？………