本來諗住對付班電話cold call, 點知攪到自己爭d無命: 30

咁無新意翻炒㗎，但問題係，我哋無火機，無鐵甲護身喎。巴兩星人唔夠我揪，就搵d怪蟲攪我。個次見到佢哋d破壞力，完全唔講得笑。

我手心發勁，嘭嘭嘭打咗幾個大窿，但同上次一樣，好快合番埋。Celia驚到喊晒攪到我實一實，攪到我都震晒。個蟻牆越迫越埋，我即刻抱住Celia跳落水。

落到水，先醒起d魚會放電，但好彩落咗水d魚散開咗。之後我同Celia講要潛水，睇下避唔避到班蟲，佢都已經六神無主，淨係點頭。我唔理佢一嘢將佢個頭質落水裏，d蟻已經殺埋嚟。

係水入面見群魚有d異動，佢哋將身體集合埋一齊，竟然變咗條巨魚，之後重跳出水面，聽到d好似𡁻嘢嘅聲音，持續咗幾分鐘，之後無晒聲。但當我哋浮番出水面，都忍唔住俾眼前景象嚇咗一跳。

屍橫遍野，成地都係飛蟻，同埋好似係街市見到d一舊舊魚腩咁，d怪魚都分晒屍死晒。但過唔到幾分鐘，d屍唔見晒。我哋諗可能係班蟻入侵咗怪魚地頭，於是同飛蟻開拖，結果大家都死鳩晒。





橫掂落咗水，索性游去河口，睇下見唔見漩渦，但游極都無出現。Celia話不如返番博愛先，話想攞番泳衣同換個d衫，同埋驚會再遇到敵人。我叫佢等多一陣，如果到天黑都無動靜，返博愛先。

游游吓開始覺得d水流變急，重開始係咁氹氹轉，有股好大嘅離心力扯我哋入水底，跟住個人係咁向前飛，之後發現係個山窿入面。

我同Celia講個次就係沿住條咁款嘅河游番摩星嶺，但佢好似重驚咁，我問佢點解咁驚，佢話佢好怕黑。我唯有拖住佢隻手仔一路游，沿途講下笑話等佢定下驚。

無耐開始見到光，但我個心都有d十五十六，個出口係虛擬世界，定係摩星嶺呢？不過都唔諗得咁多，游過去睇下就知。

游到出口，嘩！個景象同係虛擬世界完全唔同。好繁華嘅環境，同之前虛擬世界D鄉郊景色好唔同。D樓好高好大座，但相隔得好開。但無任何道路或者交通工具，因為根本唔需要，前面見到好多類似人嘅生物，全部曉飛嘅。佢哋好多都係結伴咁飛，個樣好從容歡顏。佢哋見到我哋兩個異類，竟然打晒招呼，一d都唔驚我哋咁。





有個女人模樣嘅後尾重飛埋嚟，用番我哋d話問我哋想去邊幫唔幫到我哋。不過我哋都真係唔知點答好，跟住佢話如果有需要用番廣東話嗌聲得㗎啦，會有人幫忙。

我同Celia講我未嚟過呢度，佢話佢哋都知，就算之前去做選拔，都唔係依家咁嘅環境。我哋兩個一下子都唔知點算好，唯有周圍行吓。

無耐有個大叔飛埋嚟，問我哋要唔要飛行器。起初對佢有d防備，但之後佢好熱心咁放低咗兩舊藍色四方盒仔，好仔細咁教埋我哋點用，之後同個女人一樣，話有需要幫忙嗌聲得㗎啦。

補充番，呢度人樣同一般人差唔多，但好唔同嘅，係個個都好似好開心咁。

大叔話呢度唔駛用錢嘅，跟住我忍唔住問佢呢度邊度嚟，點知佢咁樣答：





「歡迎嚟到巴兩星。」………