本來諗住對付班電話cold call, 點知攪到自己爭d無命: 26

博愛醫院大門口對出個小巴的士站，今日塞滿晒人，個班全部穿晒迷彩軍服，荷槍實彈咁，話要嚟捉拿霍醫生。門口保安驚得滯唔知點做，話叫佢哋等等，點知帶頭嘅一槍就射爆佢個頭。

個班係地球人，唔係巴兩星人，Celia話。

佢哋明顯想攻入嚟，巴兩星人搵番地球人打地球人。我雖然有異能，但對番現實世界武器，我都唔知有無把握。

霍醫生話醫院個秘密基地本身好安全，d牆用咗一d特殊物料，阻攔晒所有大氣電波，同埋所有人員都經嚴格背景審查，唔可以隨便出去，所有行蹤亦要監視，就算有二五仔，都唔係咁輕易入嚟。我諗番美玲俾人偽裝，會唔會用咗呢招呢？

但依家唔係探討嘅時候，應付咗下面個堆人先。





霍醫生班機甲戰隊已經standby晒，佢哋係AI智能操作，但開唔開火要霍醫生話事，佢話人工智能一定要有底線，權限上要由人話番事。我有d於心不忍，始終個班係地球人，我覺得如果可以四四六六同佢哋傾，或者俾藥佢哋，等佢哋清醒番，就唔駛咁無謂咁打生打死。

但霍醫生竟然串我話我太單純，話依家想唔打都唔得。場戰火已經唔止係虛擬世界打，係現實世界都避免唔到。

佢講得好啱，班軍佬已經係咁開槍攻緊上嚟，而機甲戰士已經佈晒陣，等佢哋攻入嚟就開火。霍醫生想俾咗支機槍我，不過我話用劍可以。

嘭嘭嘭，一輪白煙之後，病房d牆冧晒，班軍人d眼神好一致，兇狠又空洞。佢哋見人就開槍，我避開晒，就揮劍反擊，轉眼連殺幾個，而刀槍不入嘅機械戰士，身上機槍窿係咁射彈，好快攪掂晒班軍佬。

同係虛擬世界好唔同，個班係活生生嘅地球人，見到d紅色血係咁流晒成塊地都係，我忍唔住大嗌，明明好地地個世界，重乜會攪成咁？你呢班巴兩星人，我見到你哋真係要見一個殺一個。





班機械戰士係佢哋槍口噴咗d紅色液體落d軍人屍體，個d係超強溶液，屍體即時溶化。我諗唔到地球人都有呢d黑科技。
不過，見到佢哋個種殺人個木樣，我有d懷疑呢班係人定係鬼。

個晚我諗咗好多嘢，我覺得呢排發生d事，巴兩星，丁寅星，地球，虛擬世界，現實世界，個真實故仔係點樣，我越嚟越混亂，我重殺咗人，個班軍人係邊度嚟，係咪真係咁簡單俾外星人催眠咗，定係有其他嘢？重有我自己，我喺虛擬世界，妹妹仔話場仗要係虛擬世界打，但依家出番現實，已經攪到咁。我如果唔係個次符碌係條河游水，我根本出唔番嚟。

莫非連妹妹仔都係有問題………