本來諗住對付班電話cold call, 點知攪到自己爭d無命: 27

「我想出院」

我諗，我要先抽離一下，攪清真相，我覺得好多人想困住我，包括博愛呢班人。

霍醫生話我出去會無命，我話好耐無返屋企。好啦，佢終於露出尾巴：

「唔通你唔想見你老豆老母咩？」

我好冷靜回答佢：如果你哋係幫助地球嘅，我一定會留係度。但如果係想利用我做d對地球不利嘅話，我唯有捨棄佢哋。





「咁唯有俾你哋團圓啦！」霍醫生嗌咪無耐，我好掛心嘅兩老，唔知係邊度入到嚟房。

佢哋個樣返番以前咁精神，重同我講話要好好多謝霍醫生，話啱啱食咗隻藥好番晒，重話之前個腦好似唔聽駛咁，有把聲係咁叫佢哋聽電話，結果借錢，體檢，健身，乜都幫襯晒。

「我知道依家發生嘅野係好荒誕，你懷疑都好正常。如果你真係想走，你就同埋佢哋一齊返屋企啦！起初係唔想你出去遇險，不過你唔信我哋，咁只好放你走，等你諗清楚先。」

兩老係咁話唔好走，重話佢哋都知道近排發生嘅嘢原因，同埋我係萬中無一嘅異能戰士，係眾矢之的，出咗去，會有好多陰濕嘢攪我。

「我明白頭先殺人嘅感覺係好難受，但個個時間唔係你死就係我亡，我哋如果死咗，巴兩星人就為所欲為。」





「重有，阿珍同你後來遇到嘅美玲，其實專責係你嘅陪練，阿珍鍾意你，同埋佢一時好奇任性，想體驗地球人性愛嘅感覺，結果命都無埋，之後美玲，本來可以好好同你操練，等你去到二十級就會同你一齊去巴兩星係虛擬世界嘅大本營，點知佢一時大意，俾巴兩星個個幽靈戰士上咗佢身，佔據咗佢身體，想趁同你對戰時暗算你，但佢低估咗你實力，俾你打散。美玲唔好彩俾佢上咗身，個次爆炸之後，一齊煙消雲散。」

嚟到呢個位，我諗我都係先留係度，見步行步先。無錯，出到去，唔知重會有咩嘢發生，最緊要係顧住兩老安危，暫且信住佢哋先。諗起霍醫生講個番話，兩個外星女仔直接間接因為我而無咗條命，我個心真係好唔舒服，尤其阿珍，因為對佢動咗情，更加係痛苦難受。

霍醫生話隻疫苗可以出街，嚟緊會出動機械戰士，係空中將d疫苗散落，等d人吸入咗，藥力發揮之後，就會慢慢正常返，佢要求我幫手，始終班機械人未識諗嘢，遇到突發嘢唔識處理。

佢整咗隻機械人俾我揸，話係用意念操控嘅，加埋我本身戰鬥力，可以話係如虎添翼。我一早康復晒，困咗係度咁耐，一早想出院，係時候出吓去，睇下真實情況。

除咗我，重有Celia都會出去做照應，佢會揸另外一部機械人出去。咦！又有女陪！





因為係意念操作，唔駛點學揸。係執行任務隨時有機會遇到敵人阻撓，但Celia係埋身格鬥功夫上唔係咁得。霍醫生吩咐我教佢幾下散手。教佢個陣發覺佢真係有d笨手笨腳，要花好多時間先教得到佢一招半式，重要係好快唔記得個隻。

但佢d性情有d似妹妹仔，教佢個陣不禁諗番起同妹妹仔d點滴。Celia好好，會安慰吓我，氹吓我，攪到我有時想話佢蠢都收番埋落肚。

女版郭靖學下學下算叫做打得似樣，時間緊迫，要準備出動………