本來諗住對付班電話cold call, 點知攪到自己爭d無命: 25

我醒番個時發覺係博愛一間得我一個嘅病房，除咗個心口有d痛之外，活動自如。之後有個靚姑娘入嚟幫我量血壓同探熱，數字上好正常。不過佢話我好好彩，個粒子彈射歪咗少少，如果唔係打中心臟就玩完咁話。我即刻諗番起妹妹仔啲護身符，不過因為有女仔係度，我唔敢攞出嚟，一陣等佢行開，我會攞出嚟錫下。

之後個姑娘話，我唔可以出院住，要暫時留係度，以保安全，我諗唔通係自己人，佢之後講咗句野，證實咗我呢個諗法。

佢話丁寅星人太輕敵，只係靠你單打獨鬥點得㗎。不過姑娘話佢哋係百分之百香港人，之不過曾經去過虛擬世界，亦都知道巴兩星人係地球攪攪震，佢同醫生曾經被挑選做戰士，不過就話未夠班，掟番嚟現實香港，雖然落選，但佢哋都有任務，就係支援被選中嘅戰士。

我問其實係咪真係得我一個單打獨鬥，佢話丁寅星人本來想搵多幾個地球人幫手，但唔係戰鬥力太低就係心腸有問題，直到遇到我，我係萬中無一嘅潛能戰士，心哋好兼體格精奇，所以搵咗我。之後d嘢，其實佢哋知道晒。同埋佢補充話，其實係地球嘅丁寅星志願軍，已經係全軍覆沒，丁寅星唔會再增援，依家場仗只能靠我哋。

佢播咗妹妹仔其餘隊友，因為拒絕投降而被殺嘅片段。雖然同佢哋唔算太熟絡，但見到佢哋一個一個身首異處，重要係佢哋本來義務嚟地球救我哋，我都忍唔住眼濕濕。





「你就無心肝啦，返到嚟唔理隻錶無晒電，我幫你叉好咗啦。」

我真係好撚粗心大意，妹妹仔送俾我啲貴重物品，居然無咗件事。
「重有阿珍俾你d護身符唔好唔見呀！」個姑娘陰陰咀咁笑，攪到我面都紅晒。

佢話班巴兩星人知我係地球人，見到同類一定唔會好似見到巴兩星人咁重手，同埋一定會查根問底，就利用你呢樣嘢，搵番地球人打你，兼且吩咐打你班人要以弱示人，同埋係你面前，只係攞藤條做武器，但其實佢哋有槍，到你輕易打贏，你輕敵同埋留手，就會乘機偷襲。你依家嘅功力，佢哋點出晒全力都唔會夠你打，你嘅身手可以避到子彈，所以先用詭計。

姑娘話佢哋正物色緊戰士，呢個都係任務之一。但我話地球情況已經好危急，但佢叫我放心，話班巴兩星人重未玩得太盡。地球人仍然無性命上嘅威脅，不過係金錢上就無計啦，啲錢暫時去晒巴兩星人個邊。

我心血來潮咁問佢，其實有無方法可以令個d被催眠嘅人，回復清醒。佢哋清醒之後，就集合大家嘅力量，趕走班巴兩星人，姑娘話佢哋正研發緊疫苗，但重未研究成功咁話。





我諗起我無受到巴兩星催眠藥影響，先前歸納過我曾經食過一排抗抑鬱藥，唔知係未抗抑鬱藥有獨特功能。我講俾姑娘聽，佢好似登咗一登咁，話即刻同醫生講。

我諗起我似乎犯咗一個錯誤，就係未攪清係人定鬼，就信晒個姑娘乜都講，但感覺上佢唔似有欺詐，不過，嚟緊都係小心d好。

係病房24小時都睇到最新情況，烏克蘭向俄羅斯還擊，掟番幾枝核彈過去，但中途被攔截，係幾萬尺天空上爆炸，至於兩老，重係失緊蹤。至於呢度d醫護，短短幾日見渾晒。

當然佢哋有雙重身份，主診醫生姓霍，亦都係佢哋leader，至於我醒番見個個姑娘叫Celia，主要負責搜集情報同後勤支援，另外重有三男二女，負責研發疫苗。我留院時間睇晒佢哋設施，原來重有個地底大倉庫，正製造緊d鐵甲機械人，到疫苗研究成功，就會用呢d機械人，係空中散播疫苗，等d人直接吸入。而呢d機械人有機關炮同小型導彈，用嚟對付敵人。

佢哋用咗我嘅idea，加咗d抗抑鬱藥落去。不過，敵人係唔會等你嘅…………