本來諗住對付班電話cold call, 點知攪到自己爭d無命: 24

咩都唔諗住，第一時間返屋企先，兩老重係唔見人，用屋企電話打俾佢哋飛晒留言箱，我驚佢哋被人捉走做人質，我一返嚟現實，班友立即想攪掂我，咁攞我老豆老母做人質，一啲都唔出奇。睇戲都睇得多呢類橋段，但如果真係咁，我被迫屈服嘅話，個地球咪俾佢哋控制晒。

唔通要用佢哋條命去救地球？不過，依家都重未確定兩老真係被捉走。我希望我諗多咗。

我搵晒啲親戚問，但無人見過佢哋，不過佢哋俾電話攪到變晒痴呆，好難幫我手搵。

我由屯門行到去元朗都搵唔到，輕鐵重有開，但好似打10號風球咁無晒人坐。經過元朗，平時好熱鬧㗎，但d人唔知去晒邊。之後攰攰地係山貝河附近休息一陣，見到條河有好多魚。佢哋見到我起勢咁游埋嚟，起初以為問我攞嘢食，但奇怪我都無好似人哋咁倒d魚糧引佢哋。

我多多少少有啲戰鬥經驗，個次幾乎俾隻怪雀吞落肚個鑊嘢重係印象深刻，即刻提高警覺。群魚可能見到我個樣唔同咗惡咗，即刻散開走夾唔抖，而佢哋游嘅速度，成隻快艇咁，唔似一般魚仔。





事有蹺蹊，反正兩老個邊無咩頭緒，不如跳埋落河跟住群魚游，睇下有乜發現都好。魚群都係向下游深圳方向游，但去到近河口，竟然出現咗個小漩渦，班魚游去漩渦，之後轉下轉下就唔見晒。我游埋去，佢立即消失。

直覺覺得個漩渦有機會返番虛擬世界。咦！兩老會唔會俾巴兩星人捉咗去虛擬世界呀？咁就大撚鑊囉！我都唔知點入番去。唔係喎，我係摩星嶺走番出嚟噃。

我好衝動咁上番水，跑番元朗站搭鐵路，見到成班人企晒係閘口，個個望住我，我當然知咩料。但你班巴兩星，著晒白色衫嘅，重攞住d好似藤條嘅嘢。我屌吖，你班外星人咁玩嘢呀！

佢哋諗住人多蝦人少，點知個個都係廢嘅，我左右開弓，搶晒佢哋d藤條，逐個拂，拂到個個有晒藤條血印，咦啲血紅色係地球人嚟喎，重乜走去幫啲邪魔外道呀？

我捉住其中一個矮細大叔，佢黑黑實實話自己係八鄉有塊魚塘，佢一味話有人係佢個腦指示佢，重唔知用咩野方法將我個樣同行蹤值入佢個腦，要佢哋隊冧我，佢就call埋班靚做野。我問佢哋攪我有乜著數，同埋有無見過幕後主使，佢就話有好多錢分，但就無見過主使人。





佢重話個腦俾人控制住，軟硬兼施咁迫佢哋做，個腦一諗唔想做，個頭就痛到爆炸，覺都瞓唔到。

可能太留心佢講嘢，一時唔小心俾人偷襲，一聲槍響，我一陣劇痛之後，不醒人事………