愛自己還是愛他: 第二章
在溫哥華的學習生涯，可以說是自由自在，無拘無束，雖然家境不算富裕，依靠在澳門的阿媽財政上的支持，勉強還足夠應付在外留學的各樣生活開支，自己一個生活，金錢有時得要省着用才行。
那時沒有拍拖，生活寡淡，還好自己本身懂鋼琴，有時兼職在華人圈子內當起鋼琴老師來，可賺取一些外快之餘亦能增添點點生活情趣，教琴便成為我僅有的娛樂嗜好之一。而Patricia剛巧亦要考鋼琴初級試，叫我過去幫忙在她家裏當導師，我沒考慮便欣然接受了，想着自己有能力幫助朋友就盡力而為吧，她自己也不期望有什麼出色的表現，但求合格便算了，她不怎樣喜歡音樂，她是獨女，家裏管教寬鬆，成績不必太高，對父母有個交代便足夠。她得到我來作伴也是她學琴的原動力，我是沒所謂的，何況可以賺多些零用錢對自己也不錯，那時我還未認識Melvin。我心在想，如果有機會認識男朋友的話，一定找一個能在物質上滿足到自己的，那便不用為生活上憂心煩惱了，那樣的光景何時會來呢！
這日我來到Patricia的家裏，見到她住的地方裝潢得體，整幢房子連地庫總共有三層端正的實用面積，下層是放了很多古玩的大廳，有簡潔的梳化、飯桌、鋼琴和一系列配合得宜的傢俱，蠻令人舒服的。上層有三個房間，Pat自己的房、她父母的房和一間工作用的書房，地庫是作為健身及娛樂之用。Pat的家境也算是富裕那類，聽說她父親是開Jaguar房跑車的。
在練琴期間Pat開始發悶，便找點話題來聊:「阿琳，第時妳想識個咩男仔做男朋友呀？」
我:「噢……呢個問題……識男仔朋友，我就冇咩所謂，啱咀型，吹得下水就OK。」
Pat:「唔係嗰啲，……係妳可以交托幸福畀佢嗰啲……。」
我:「我都未講完……，我想講……如果係男朋友嘅話，我好高要求架喎……。」
Pat:「講嚟聽下？……睇下我哋會唔會都鍾意同一類型男仔吖嘛？……」
我:「妳放心，一定唔會！」
Pat:「妳又知？」
我:「嘻……妳鍾意啲情竇初開嘅純情少男，……我唔啱嘅！」
Pat:「嘿……妳笑人嘅！……咁妳啱邊類型噃？」
我:「我鍾意啲成熟穩重型，……最緊要佢愛我喇，又愛我屋企人喇……，佢唔係太有錢都冇所謂，有能力養得起我就得嘞……，最緊要係又唔孤寒小器，我要乜佢就買乜畀我，我要佢全心全意錫晒我！」
Pat:「妳要唔要佢隨傳隨到嗰隻先？」
我:「我唔需要佢成日陪住我，但係要求我有需要時佢一定要喺我身邊……。」
Pat:「妳好似好冇所謂咁，……但其實要求都幾高喎！」
我:「嘻嘻……，我講到好似揾老公咁，……你問我揀男朋友咋可？」
Pat:「男朋友同老公有咩分別？我揾男仔做男朋友都諗住第時同佢結婚架啦！」
我:「唔同！……老公要穩重好啲，揾到錢又要老實嗰種先至好架嘛！……咁咪唔會呃妳囉！……而男朋友就最緊要可以氹到自己開心！」
Pat:「如果畀我揾……都係揾啲有愛心好啲，咁樣佢先至愛錫同體諒妳嘛！……錢都係唔係太重要，……我諗天真啲、純良啲、有愛心啲先至好……」
我:「嘩……天使咩？……呢個世上邊有架？……」
日本人的咖啡室，出名服務一流，對每位客人提供的招待有如上賓到訪般體貼入微。那位侍應生掛上殷勤的笑容端來熱騰騰的咖啡，放了兩杯在桌面上，便禮貌地叫我們好好慢用，這時，我正坐在大阪的一家咖啡店裏面對着狄朗。
這個晚上非常繁忙，我剛落機，有位搭客問我有關航空會籍飛行里數兌現成禮品的問題，我花了好一些時間去解答他，之後我在機組人員控制室交代了工作報告後，就在航空公司一早為員工預備好住宿的酒店裏，將濃妝缷去，然後看見時間還容許下，所以應狄朗的邀請，來到咖啡店與他會面。
我本身有些猶豫，我有點抗拒去面對他，本來不想前來的，但是過了這麼多年的逃避後，我想看看大家的改變，有否對事件帶來少許幫助，幫助大家擺脫這段糾纏多年的三角關係！
狄朗先開口:「卸去濃妝之後，妳好睇好多……。」
我:「啊？……我冇老到咩？……多謝你嘅讚賞。……你識講嘢咗。」
狄朗:「我係講真架……。」
我:「狄朗，你改變咗好多。」
狄朗:「但我知妳仲係嗰個應巧琳，妳一啲都冇變過……！」
我:「你好傻呀！……點會冇變？……你同我都變咗……。」
狄朗:「至少我仲係咁愛妳！」
我:「狄朗……，你真係好純，……好似天使咁……。」
狄朗:「阿琳，妳知我會等你……一直等到妳返嚟為止！」
我聽了這話後，想起身便走:「你係度逼我吖嘛？……你唔好逼我！……如果唔係我即刻走！」
他把我拉住，說:「琳，對唔住……」
我:「就係你咁嘅樣子，加重我內心愧疚，令我罪孽心更重……。」
狄朗:「琳……，我哋曾經有過一段美好嘅日子，……妳點解要放棄我哋？」
我:「我冇愛過你，但我不停要你鍾意我，……我都有責任，……我其實係一個自私嘅人嚟！……我唔值得你愛架。」
我和當初一樣，沒有選擇說謊話，同樣老實地將內心情感爆發出來，上次我和狄朗的分開也是源於這樣不作掩飾的剖白所致。
狄朗:「琳……，我同妳之間衹係夾住呢個男人，……佢有咩好？……妳要黐埋去？」
我:「喺我未認識你之前，我已經愛上Melvin，宜家衹有你喺我哋之間先至啱。」
狄朗:「佢咁傷害妳，佢唔值得妳愛！……妳唯一可以令自己唔受傷害嘅就係離開佢！」
我:「你有咩資格叫我離開佢?……憑咩？」
狄朗:「但係佢係有婦之夫嚟架！我後來知道之後，亦不敢相信。」
我:「但係佢話愛我！……」
那個時候，我還在稱呼他做uncle，每次來Patricia家幫她練琴，我都沒有太多機會見到他，聽Pat說，他與Pat的母親經常喜歡到哥爾夫球場打發時間，Pat父親是打理賭場生意的，而每次我到訪時，Pat的家裏總留下Pat自己一個人。家裏的那個鐘點女傭常會弄些下午茶點之類的給我們吃，配合有我的陪伴，Pat才不至那麼寂寞，心情顯得開朗起來，而他們兩夫妻則在外面享受二人世界，過着令人羨慕的浪漫生活，因此Pat的父母我好不容易才見過一面。
這次是例外，因為Pat的媽媽今日身體感到不適，要在家裏休養，而Melvin就在家裏陪伴左右，照顧着軟弱的妻子。這個時候我才真正注視到這個男人，注意到他那異於常人的親切感，衹稍為看見他照顧妻子的背影，便吸引到我對其妻羨慕不已的眼光，觸發對他那種獨有的細心起了某種感覺。
我們走到樓上Pat父母的房間，想慰問她母親的情況，Melvin正在妻子的身邊陪着她。
我第一次叫了他一聲:「Uncle……」
Pat:「媽咪妳感覺點呀？……妳嘅花粉症又嚟，今年提早咗出現，醫生講啲咩呀？」
Pat父:「妳媽咪瞓着咗，唔好咁大聲……。阿Pat,……又到春季，妳媽咪啲敏感症狀又開始嚴重起嚟。」
Pat:「醫生話媽咪幾時會好返？」
Pat父:「……醫生話今年啲花粉特別活躍，好容易患病……叫我哋小心個症會引發哮喘，所以媽咪要食好多藥嚟抑制佢。」
Pat:「所以我都叫咗你哋呢排唔好出去打golf架喇，……明知春天花草樹木生長最旺盛，最多花粉散播！」
Pat父:「妳媽咪想出去行下吖嘛……我又難得呢排唔駛理公司啲嘢，既然係咁咪陪下佢咯。」
Pat:「爹啲你難得又唔駛返工，點解唔多啲留喺屋企陪下你哋個寶貝女--我，啫？」
Pat父:「啊！……我差啲忘記咗我嘅寶貝女添，……妳冇嬲爹啲吖嘛？……我知妳嬲唔落嘅……為咗氹返個女……爹啲有樣驚喜畀妳！」
Pat:「好唷！……爹啲，唔嬲你都得……但你有咩驚喜畀我先？」
忽然Pat父親從床前抽屜掏出一條遙控開車門的門匙，交到Pat手中，説:「咁樣夠驚喜喇啩？」