我只是一個DJ！: Letter Six. 小晴？
毛峙宏這時把電腦搬到餐桌上，又點擊了幾下滑鼠，螢幕瞬間出現了多張葉小倩一家人跟他的合照。
「佢先係葉小倩，呢個係佢個孖生妹妹葉小晴……三年前車禍死咗喇。」
「小晴？……明明係小倩嚟搵我幫手？」林正言此刻已經搞不懂狀況。
「阿倩係我個養女，佢好細個就跟我㗎喇，係我老死個女，屋企人俾個醉駕貨車師機撞死嘅……阿倩都算大命喇……」
說到這裡，林正言突然喃喃自語「會唔會係P圖？」
「P咩圖呀？我識鬼呢啲嘢咩！等等，我去裝香先。」毛峙宏看了看牆上的掛鍾後，接著拿了一大束香燭走到大門大喊了句「夠鍾食嘢喇！」再走到神壇處把香燭插到香爐。
此刻，林正言清楚看到毛峙宏背後的幽靈逐一顯現，瞼上依舊露出悲哀的神情。看著毛峙宏誠心的拜祭著，忍不住問了句「你知唔知自己拜緊咩？」
此話一說，立即把毛峙宏吸引住了「你睇到？你連佢哋都睇到？」
「嗯！」
「……原來……呢張票俾返你，你星期日再過嚟，我安排你見阿倩。」毛峙宏從褲袋把支票拿到林正言面前。
「你唔係想要錢咩？」
「如果你係因為要幫阿晴嘅，我又點會想收你錢吖，我以為你想攞料報導咋……仲諗住帶個傻妹去旅行添……」
「收起佢啦，既然你幫到我，就當係你接咗單Freelance。」
「唔得！俾阿晴知道，嚟搞我咪死！」
「……你咁照顧佢家姐，又點會搞你吖，當我請你兩父女去旅行得喇呱？」
「噉就得！我又真係幾錫阿倩㗎，話晒我同佢老竇都真係情同手足㗎！」
「得喇！我星期日再過嚟啦。」
誤打誤撞之下，得知女鬼原來叫葉小晴，她的姐姐才叫葉小倩，雖然對毛峙宏還持著懷疑的態度，但總算有個希望，再來就看星期日會有怎樣的結果罷了。
來到星期五，林正言慣性提早一個小時回到公司，整理好等等要用的資料後，泡了杯咖啡就往直播間呆著。
「阿言，你點呀？消失咗幾日，搞咩呀你？」嘉希一進門就走到林正言身旁。
「忙啫。」林正言並沒有詳細說明只輕輕帶過。
其他人在此時亦紛紛來到公司，全都圍著林正言一人追問著這幾天的狀況，但林正言同樣沒有多說，因為他知道如果照直告知，一定會把大伙嚇壞
「其實呢……我搵到葉小倩喇，係咪呢個？」阿修把手機螢幕遞到林正言的面前說道。
「係！就係佢！」
「佢改咗名叫Zoe，係個𡃁模，前幾日我細佬放假，聽完我哋個節目重溫就即刻問我，話佢出道前係用葉小倩呢個名。」
「噉又唔早講？」林正言抱怨。
「大佬呀！你肯聽電話先得㗎！Message又唔覆！」阿修翻了個白眼後回應。
「原來你中意呢味，唔怪得唔睺我啦！」嘉希見狀，立即不屑道。
林正言見自己快要招架不住，匆匆整理桌上的咖啡杯「件事唔係噉㗎！哎！你哋唔明㗎喇，等我搞掂先同你哋講啦！而家準備開台。」
這一晚，林正言做完節目後就立即回家，並沒有跟大伙去酒吧聊天，而大家亦很識趣沒有再追問下去。
回到家，林正言嘗試改口「小晴，妳喺唔喺度呀？小晴？」可想而知，在沒有等到任何回應便如往常洗澡後睡過去了。在閉眼前，不自覺地說了一句「我好掛住妳呀……」
來到星期日，跟上次一樣，林正言來到了毛峙宏的家，而這次開門的卻是葉小倩。
「小倩……我搵咗妳好耐啦，仲咩走又唔講聲，妳知唔知我好擔心妳㗎！」
「你嚇親佢啦，都話佢係人咯！入嚟先啦！」毛峙宏手拿著一枝牙刷，明顯地說明他才剛起床。
「Sorry，妳兩個真係好似樣，可以話一模一樣。」林正言抱歉道。
一旁的小倩未有回應，只低頭竊笑，而毛峙宏剛好又從浴室走出來「孖生㗎！梗係似啦！」
林正言立即臉紅耳熱，低下頭不敢望向小倩。
「你話你見到我妹妹？」小倩抬頭望著林正言正經問道。
「嗯，佢話自己咩都唔記得，話自己叫葉小倩，之後又叫我幫佢搵人，然後我咩都搵唔到佢就冇再出現過喇。」
「講吓佢係點嘅俾我知。」小倩再問。
「眼大大，長頭髮幾靚女，同妳一樣囉！著住件白色連身短裙，淡妝噉囉！性格應該幾外向，好中意玩。」
毛峙宏兩父女聽罷，便互相點了點頭，然後由毛峙宏開口「係喎，上次你問我知唔知自己拜咩？噉即係你睇到佢哋啦？佢哋仲有幾多個呀？」
「……好多……全部都係慘樣！」
「噉即係仲有幾多個？」毛峙宏追問。
「十幾個囉……今日好似比上次少咗兩、三個噉……」
「噉就好囉！佢哋好慘㗎，十幾年前我親眼睇住㗎巴士反艇，死咗三十幾人，我超渡咗好耐㗎，都仲有一半未投胎……」毛峙宏見林正言兩眼瞪大又繼續說「我諗我哋知個傻妹去咗邊，你介唔介意跟我哋去一個地方？」
林正言本來就是為了這個目的而來，又怎麼可能介意，有人願意引路，簡直求之不得。三人來到了位於旺角的案發地點，又去了小晴生前最常去的咖啡廳，無奈卻未見小晴的出現。
「阿林生，會唔會鬼係夜晚出現比較多，日頭好少會出嚟？」毛峙宏問道。
「佢哋無分日夜㗎，同人一樣可以隨時出現，你哋諗清楚少少，有冇可能係一個佢自己先會去嘅地方？」
毛峙宏立即反駁「你都話佢自己一個又點會……」
「等等先，阿妹佢真係有一個秘密基地，我都係細個嗰陣去過幾次咋。」小倩說。