我只是一個DJ！: Letter Five. 小倩？

一連兩天，小倩都不見蹤影，多多少少令林正言感到有點擔心，但心裡卻莫名覺得輕鬆了不少。
 
由於找不到小倩，林正言又回復以往一樣，埋首準備星期五的節目素材。雖然說「鬼怪郵局」只會在星期五進行直播，但星期一至四還是會進行其他節目。
 
星期一和星期三由嘉希主持的音樂暢談節目，主要是圍繞著香港的地下樂隊和網紅歌手。嘉希本身也是一名網絡歌手，不僅歌聲甜美，樣貌也是屬於可愛嬌俏型，故此相當受年輕人愛戴。
 
星期二和星期四則由嘉希和德仔兩人同時主持，跟觀眾聊天分享生活趣事，有時候林正言和阿文也會加入跟觀眾互動，而整個團隊唯一沒有參與幕前的就只剩阿修一人。
 
「呢幾日唔見阿言出現嘅，電話又唔聽，你哋有冇人搵過佢呀？」嘉希邊整理資料邊問。
 




「上次飲完嘢，我有打過俾佢，佢話呢幾日可能會忙少少，叫我哋執生。」阿文回應。
 
「聽日星期五喇喎，會唔會唔出現㗎？」嘉希擔心問道。
 
「大佬言幾時有失蹤過吖，我對佢有信心㗎！」德仔笑說。
 
阿修聽罷，立即用手臂勾住德仔的脖子「擦鞋等聽日啦！」
 
「我哋話晒都由細玩到大，阿言同你又係最Close嘅，你兩條友係咪有嘢瞞住我哋先？」德仔反勾住阿修的脖子望向阿文問道。
 




阿文聳肩回應「佢唔肯講呀，聽日問佢囉，不過我硬係覺得同嗰個葉小倩有關。」
 
這幾天是林正言在這個月裡覺得最難熬的日子，雖然少了小倩這個煩人的女鬼，但卻因為習慣而變得不自在。小倩從那天消失後就未曾再出現過，而除了毛峙宏外，就未有接收到任何關於得知小倩資料的線索。
 
由於已經答應了小倩的請求，林正言也不想反口，在網路上查了毛峙宏這個人，他居然是一個貨真價實某教派的居士。雖然說宗教算是正道的，但對於毛峙宏這個人就有所保留，他背後的一班看似悲慘的幽靈又是怎麼一會事？林正言不敢多想，深怕又要惹麻煩上身。
 
這天，星期四的早上下著大雨，天色陰暗，林正言跟著網上找到的的地址來到了西環某座老舊的唐樓，這正是毛峙宏居住修行的地方。
 
「叮噹」門鈴響了數遍還未有回應，當林正言準備離開時，木門打開了。鐵閘的另一邊是剛睡醒的毛峙宏，身穿一件大碼球衣和短褲，睡眼惺忪的望著他。
 




「林生，我仲以為你唔會騷我添，請入嚟！」
 
穿過玄關來到了大廳，大廳窗戶旁是一座神壇，上方打著白色的射燈，非常光猛正氣，而另一邊則和普通住家沒兩樣，擺放了餐桌、椅子和電視。
 
「我都唔同你兜圈直接講喇，你係咪捉咗葉小倩？」未等毛峙宏把他帶到坐位上，林正言便斬釘截鐵質問道。
 
「我？大佬呀！我最多係識睇吓風水命相，我唔係嗰啲販買人口嘅人，而且我又點會捉阿倩，我係佢老竇呀！你係咪佢啲瘋狂Fan屎呀？要簽名相定公仔呀？」毛峙宏又驚愕又無奈地說。
 
「老竇？瘋狂Fan屎？你講咩呀？你姓毛，佢姓葉！你好老老實實講清楚，如果唔係我即刻報警！」林正言瞪大雙眼望著毛峙宏。
 
「嗯！咳咳！好呀，你報警囉，話自己擅闖民居。」毛峙宏假裝咳了兩聲，用眼角的餘光望向林正言。
 
林正言也機靈地拿出一張一早寫好的支票「五皮！你最好老老實實講！」
 
收起支票後，毛峙宏從房間拿出了一部手提電腦「嗱！係咪佢呀？」電腦螢幕裡顯示著葉小倩的相片，見林正言錯愕的神情，毛峙宏繼續說「我個女呀！」




 
「點解有兩個小倩㗎？」林正言目不轉睛地看著螢幕。
 
「點解！點解你咁想知先？你再唔講我就真係報警告你跟蹤我個女！我已經一早通知咗附近個街坊差佬，話有個人跟蹤我個女㗎喇，你唔洗旨意亂嚟！」
 
林正言見對方顯得有點激動便立即告知真相「係小倩搵我幫手，但佢又話自己唔記得晒啲嘢……」
 
「點唔記得呀！係咪個衰女呃你錢定咩？一陣佢返嚟我幫你問佢！」毛峙宏此時略顯不爽地說。
 
「一陣返嚟？」
 
「好出奇咩？放咗工唔返屋企去邊吖？」
 
「放工？乜做鬼都要返工㗎咩？」林正言即時呆在原地反問。
 




「哎哋！你條死𡃁仔，雖然我係你Fan屎，但你咒我個女就唔可以原諒！」
 
見毛峙宏怒氣沖沖欲揮拳之際，林正言把心中的疑問道出「我識嗰個小倩係女鬼嚟㗎喎……」
 
毛峙宏一時之間不懂怎樣反應，只低下頭口中念念有詞，下一秒又走到廚房端了兩柸茶出來「坐低講清楚。」