我只是一個DJ！: Letter Four. 毛峙宏居士。

「又嚟到節目嘅尾聲，今晚我想問問聽眾朋友，你哋有冇印象聽過一個女仔叫葉小倩，長頭髮，雙眼皮眼大大，都幾靚女㗎！可惜死得早吖，如果各位有咩關於佢嘅資料，幫幫手撥個輪嚟直播室，我哋下個禮拜見！」林正言突然在節目尾聲講了這一番話，可見他真的沒有辦法找到關於小倩的任何資料才出此下策。
 
「喂！大佬言，仲咩今日突然間講啲噉嘅嘢？唔似你喎，下星期要講㗎？」德仔邊收拾邊問道。
 
「你真係想知？」
 
「唔……唔想！我多口啫！Sor. Sor.」德仔連忙道歉。
 
在整備室的嘉希、阿文和阿修同樣對林正言的舉動感到相當好奇，但又怕聽了之後會惹禍上身，便私下交談著。
 




「其實阿言係咪真係睇到㗎？」阿修問。
 
「好似係，聽講之前個女友都係因為驚先同佢分手。」阿文輕聲回應。
 
嘉希聽罷，即時附和「噉其實同佢一齊返工都有一個好處，起碼有咩事佢都會提醒我哋，就好似上次突登拉我去食宵夜，我之後睇返新聞先知我搭開嗰班車炒咗！」
 
「你噉講又好似係，佢有時候都會用呢啲藉口將我哋留低……」阿修補充。
 
「咯咯」林正言和德仔已經收拾好直播室準備離開，見阿文三人還在聊天，只好敲響整備室的玻璃窗作提醒。
 




「得喇！等埋呀！」嘉希第一個衝出整備室黏到林正言的身旁「阿言，其實個女仔咩料呀？」
 
「唔知呀，只係想知道佢啲嘢，上次攞料有個受訪者提起，好奇啫！」林正言敷衍回應。
 
離開工廈，五人去了平常光顧的大排檔宵夜，這一晚人出奇地多，等了大概二十分鐘才有位置。
 
當大伙享用完美食正差準備要離開的時候，一個衣著古舊，有點像僧侶穿的那種灰色長袍的男人走在他們的餐桌前。
 
「林先生，你好，我好中意聽你個節目㗎，我呢……」
 




未等男人把話說完，林正言便慣性地作出道謝準備離開，但男人卻不以為意，只補充了一句「葉小倩，我知道佢係邊個！」
 
林正言聽罷，立即停下腳步回頭望向男人。
 
男人見此話帶來了成效便繼續「我係毛峙宏居士，一口價五萬，我會將我知道嘅所有嘢毫無保留同你講。」
 
「阿言，唔好理佢喇，正一神棍！」嘉希拉著林正言的衣角不屑地看著毛峙宏。
 
林正言此刻望著的，不是毛峙宏猥瑣的笑容，而是他身後那班看似悲慘的幽靈。
 
「喂！阿言，走啦！」阿文也幫忙把林正言帶離大排檔。
 
離開大排檔，大伙又來到了中環的酒吧街，目的只是為了弄醒目光仍然呆滯的林正言。
 
「阿言！咩料呀？唔似你，條友擺到明就係想昆錢，神棍嚟㗎！」阿修把一杯生啤推到林正言面前。




 
「我哋一直以嚟，報料嘅人都未收過一分一毫，點會無啦啦又有條友出嚟話要賣情報㗎？」阿文附和。
 
林正言喝了一大口生啤「唔係！條友有啲嘢……」
 
「嗱嗱嗱！咪嚟啊，我真係驚㗎！嚇親我要陪我瞓㗎！」嘉希立即揮手示意。
 
「妳咪成個花痴噉啦，大佬言身邊咁多女，幾時輪到妳吖？不如考慮吓我啦！」德仔笑言。
 
「你講開，我又有啲印象，之前個靚女嘉賓……阿邊個……個Model雷詠兒咪成日借啲意走上嚟嘅。」阿文附和。
 
「唔俾佢中意我想嚟見我嘅？」阿修立即反駁。
 
「你？慳啲啦！」嘉希大笑。
 




任同事四人聊得多高興，林正言還是眉頭深鎖不發一語，把整個氣氛都弄得有點糟糕。
 
「阿言，要唔要上嚟我度？今晚去我屋企瞓，有咩事可以一齊拆掂佢喎！」阿文把手搭到林正言的肩膀上。
 
林正言和唐偉文可算得上是「哎吔兄弟」，兩人由中學到大學都就讀同一所學校，畢業後還待在同一隊電競隊，故此倆人非常有默契。雖然唐偉文沒有跟林正言在同一時期離開電競隊，還多打了一場比賽，但最後也因為團隊名氣受損而選擇離開。
 
當時林正言想要成立網台，第一個想起的就是這個老友，而唐偉文亦不負他望，即時點頭答應。雖然多少猜得出林正言看到一般人看不到的「東西」，但始終沒有正式詢問過，所以還是對他的能力存在與否有些保留。
 
「唔喇，我一陣有嘢做。」
 
「阿言，零晨二點喇喎，仲做？」嘉希關心道。
 
林正言只笑了一笑，乾下最後一柸酒便放下幾千塊離開了。阿文見狀，立即追上前「喂！係兄弟就唔好咩都收收埋埋，有咩事即管講，我一定幫！」
 
「見鬼喎！你幫到咩？」林正言此刻的確有點醉意，不小心說出了這一句話。




 
「幫得到一定幫！」阿文想了片刻後，斬釘截鐵地回應。
 
坐上計程車後，林正言便閉上雙眼強忍著快要嘔吐的狀態，嘗試進入睡眠休息一會，想說回到家跟小倩討論今天遇到的毛峙宏居士。
 
經過二十分鐘的休息，感覺沒那麼想吐了，也終於回到家了。林正言第一件事不是換掉身上充滿酒味的衣服，而是不斷大叫著小倩的名字，可惜遲遲都未等到回應，便走回房間倒頭大睡。