【愛情】如地下情一樣嘅癮，係我對你嘅定義: 113
呢頭講完，轉個頭就又見到著住校服嘅學生喺電梯口出現，不過今次陸修然有認真睇清楚
「好似真係我地學校嘅學生⋯」陸修然喺心入面講完就鬆手，向反方向行咗一細步
黎昕淇感覺到佢嘅舉動於是抬起頭望佢，直覺叫黎昕淇望向電梯嘅方向
雖然知道因為有同校生，但係行遠一步將距離拉遠，睇起嚟啲似係刻意保持距離一樣
「男仔嚟啫，都okay⋯」黎昕淇嘅餘光留意到行得愈嚟愈近嘅兩個男同學，「男仔應該唔會留意咁多⋯」
喺列車駛到嘅時候，兩個男同學行到陸修然身後嘅時候，黎昕淇先發現後面其實仲有兩個女仔
通過月台嘅幕門倒影都可以清楚咁對上眼，黎昕淇冷靜咁等車門打開、上車、企喺中間嘅扶手前
佢地喺隔離車門上車，餘光望到佢地總覺得佢地有竊竊私語，特別係嗰兩個女仔
「佢地都望得太明顯啦掛⋯會長你太引人注目⋯」黎昕淇特登喺微微耷低頭先開口低聲道
「會唔會其實係你引人注意？」陸修然卻反駁道，「正常都會喺睇下隔離嘅女仔係邊個⋯」
「所以係因為佢地想睇你，所以順便睇下我。」黎昕淇將前文後理解釋清楚，「解釋好啦。」
佢呢個解釋令陸修然唔知講咩好，好似事實係呢樣嘅機會大啲⋯
「呢個時間一齊走的確會有啲⋯奇怪⋯」陸修然拎住手機瞄一眼時間
「唔理啦，都預咗會比人講⋯呵～欠⋯」黎昕淇打咗個喊露，上完堂仲要留低開會，大腦一直運作8、9個鐘，話唔眼瞓就假
「好好好⋯」陸修然附和點頭，定睛望住黎昕淇一陣之後緩緩開口：「陣間洗唔洗食嘢？」
「未諗好食咩⋯」黎昕淇道
「想食咩咪食咩。」陸修然自然咁朝離佢地唔遠嘅同校生打量一下，「買上嚟食？」
「都未諗到食咩⋯」黎昕淇提起手，想同平時一樣伸手輕輕打陸修然一下，但忽然諗到附近有同校生，手頓時往馬尾順落去摸一下，「突然間想食三文魚壽司⋯」
「食。」陸修然毫不猶疑咁同意
「食唔晒你包底。」黎昕淇瞇起眼望住陸修然
「預咗啦。」陸修然笑一笑
兩人喺同一個站落車，喺人前成日都要扮到若無其事一樣其實有啲攰，黎昕淇追上陸修然嘅步伐行喺佢身旁，陸修然一手就拉住佢嘅手，佢一直等緊落車拖起佢
「你食邊個呀？」黎昕淇拎起一盒三文魚壽司
「你揀，我唔偏食。」陸修然伸手接過黎昕淇手上揀好嘅壽司
黎昕淇揀嘅，陸修然都會食，畢業最後包底嘅係佢；陸修然企喺黎昕淇嘅後方，黎昕淇偶爾回頭問佢想食咩，問佢食邊一樣比較好
以前企喺呢個距離望住黎昕淇，但始終會覺得兩人之間有一道薄牆，宜家企喺同樣嘅距離望住同一個人，距離卻比以前更接近
「距離感向來都係從親密度同熟悉度推砌出嚟」呢句說話忽然間好有道理一樣
「你唔揀食咩呀？真係我話食咩就食咩咁乖？」黎昕淇回頭對陸修然笑，好似輕飄飄嘅羽毛輕掃過而帶嚟觸電感一樣
「我唔係一直都聽緊你話？」陸修然淡然咁講咗一句，黎昕淇卻微微一笑
「好似⋯真係？」黎昕淇側着頭望陸修然
「好明顯一直都係⋯」陸修然輕嘆氣，佢自己都諗緊有邊一次佢冇聽黎昕淇嘅話
陸修然拎住店舖嘅膠袋行出去，黎昕淇雙手空空，手挽住陸修然嘅手臂
「今晚食唔落飯。」陸修然低頭望黎昕淇，語氣一如既往嘅柔和
「同你一樣要食唔落飯啦。」黎昕淇伸手戳咗陸修然嘅臉頰一下
「你係我之前識嘅黎昕淇？」陸修然覺得自己嘅提問有啲怪，但佢的確想咁樣問好耐
一齊好似同以前一樣冇變，但又唔係完全同以前一樣，至少，黎昕淇嘅改變對佢嚟講好明顯
⋯
「會長同黎昕真係好合拍～我今次係唔係做得好好？」鍾樂時望向鍾安而等被稱讚
「嗯，做得好。」鍾安而敷衍咁講咗一句
望住兩人嘅背影，鍾樂時嘅內心都覺得美滋滋，一直喺所有人口中嘅緋聞原來係真係地下情侶，聽起嚟好似睇緊校園小說一樣，刺激又激動
企喺台上嘅兩人嘅對話流暢且合拍，散發住同以往唔一樣嘅氣場，互動起嚟都係有明顯嘅改變，唔再有一種刻意保持距離嘅感覺，反而更加自然
「點解佢地嘅氣氛好似有啲唔一樣咁⋯？係我嘅錯覺？」
「雖然好難講得出有咩唔一樣，但係同之前嗰種上司下屬感好唔一樣。」
有本來已經有留意會長嘅女同學已經忍唔住同朋友分享佢嘅想法
「嗯嗯！之前係上司下屬，宜家嘅氣氛有啲曖昧～」
「黎昕講嘢嘅時候，會長嘅雙眼都冇離開過佢。」
轉身行落台嘅時候，鍾樂時即刻帶住笑臉拍手，除咗係讚佢地嘅會長同文書，仲係讚自己揀咗小情侶做宣傳，做咗件好事
鍾安而望住有啲洋洋得意嘅鍾樂時無奈咁笑住搖搖頭，對佢嚟講宣唔宣傳同佢冇咩太大關係，只要唔係搵佢去做宣傳就可以
陸修然將講稿收入褲袋同時，目光朝黎昕淇望去，黎昕淇嘅餘光留意到陸修然嘅目光，抬起頭同佢對望
企喺兩人面前嘅鍾樂時不禁瞪大眼，嘴角都要壓抑唔住，鍾安而默默咁撇開臉，兩人同大大嘅電燈膽一樣發光發熱
「嗯？」黎昕淇微微側頭
「冇。」陸修然搖頭，「行啦。」
佢地幾個行到一旁等早會結束，唔需要講啲咩，只要佢地行埋一齊，大家好自然都會留意多兩眼
IG Link: https://www.instagram.com/nd_cotttoncandy/?hl=zh-tw