【愛情】如地下情一樣嘅癮，係我對你嘅定義: 112
陸修然感覺到外面嘅光忽然間暗咗落嚟，輕皺起眉頭後緩緩睜開眼，第一個瞬暗映入眼簾嘅係黎昕淇嘅臉
「幾時入嚟⋯？」陸修然耷低頭，手放到後頸捏咗兩下，啱啱瞓醒嘅佢連聲音都有啲沙啞
「啱啱。」黎昕淇從後將陸修然攬住
「以為你今日唔會過嚟，最近你都冇咩嚟會室⋯」陸修然捉住黎昕淇嘅手腕
「知你會喺呢度。」黎昕淇婉轉咁表達佢嘅想法
「嗯，想見我？」陸修然輕笑一聲，仰頭望黎昕淇，「同一間學校要見到面唔難。」
黎昕淇俯身喺陸修然嘅唇上輕吻一下，陸修然都因為意外而呆咗一下
「唔驚有人入嚟？」陸修然望住黎昕淇行到自己身邊嘅位置坐低
「直覺覺得唔會有人入嚟。」黎昕淇唔在意咁聳肩
「昕⋯」陸修然將櫈移近黎昕淇，伸手去拖住黎昕淇放喺大髀上嘅手，「喺學校好似更加想見到面⋯果然人都係會變貪心。」
「你自己講完都唔面紅⋯？」黎昕淇有啲嫌棄，但嘴角卻有啲壓抑唔住
「事實。」陸修然直接嘅表達總係好輕易令黎昕淇心跳加速
「你真係天不怕地不怕⋯」黎昕淇無奈道
「未到呢個地步。」陸修然拎起水樽飲咗兩啖水清醒一下
「你有冇同莫淮禮講？」黎昕淇把玩放喺枱上嘅擦膠
「講咩？」陸修然下意識咁望向黎昕淇反問，但喺黎昕淇回答前佢已經明白佢想問咩，「冇喎，但佢有問過⋯你未同你嘅好朋友講？」
「未開到口⋯」黎昕淇將櫈移到陸修然隔離，手臂貼住陸修然稍微靠住佢，「唔理佢啦⋯」
黎昕淇拎住手機，舒服咁靠住陸修然睇手機；陸修然望咗門口一眼，又望咗黎昕淇一眼，但最後咩都冇講
只係心入面有啲唔適應黎昕淇嘅主動，向來比較高傲嘅黎昕淇好少會主動靠近佢太多，可能因為關係變得唔一樣⋯
「今日放學開會。」陸修然喺耷低頭嘅同時順口提醒咗一句
「我知呀，諗緊散會之後食咩⋯」黎昕淇微微點頭
「咁快⋯」陸修然嘅聲線明顯咁帶住疲倦，「啱啱食完飯就諗定放學食咩啦⋯？」
黎昕淇回頭，目光朝陸修然投去，見佢安靜咗落嚟，佢都只係默默咁靠住佢，享受住可以見面嘅兩人時間
⋯
放學後內閣嘅成員都喺齊會室，為接住落嚟兩個月嘅活動安排做討論
喺大約一個半鐘後已經有大概嘅活動安排行程同構思
「仲有冇咩補充？」陸修然順口問大家一句，準備完結今日嘅會議
「如果未有新嘢嘅話，今日到呢度先？」鍾安而望一望大家嘅反應，「諗到就再補充啦。」
「諗到再打喺group講啦。」鍾樂時已經執緊佢眼前嘅筆，一副準備拎書包要款嘅模樣
「散會啦。」陸修然嘅聲線略帶點倦意，今日嘅佢特別攰
大家各自收拾，陸修然冇拎太多嘢出嚟，轉身拎起書包已經可以走，但因為佢要鎖門所以要行最後
陸修然悠閒咁靠坐喺枱邊，背向住大家睇手機，餘光一直留意緊黎昕淇
黎昕淇執嘢嘅時候，一直抬眼望向陸修然
「今日大家都係一齊走，應該都Okay⋯」黎昕淇心入面有啲輕鬆，「而且有副會長同樂時喺度，就算一齊走都唔算太顯眼⋯」
「咔—」陸修然將會室嘅門鎖上，一轉身就見到黎昕淇企喺離佢唔遠嘅地方企喺度等佢
陸修然朝已經行遠嘅其他人望一眼，將鎖匙袋好後行到黎昕淇身旁：「行啦。」
兩人行喺最後， 兄妹行喺離佢地唔太遠兄位置，其他人都已經行到樓梯口
「食唔食嘢？你餓唔餓？」黎昕淇問道，呢個問題佢喺晏晝嘅時候已經諗緊
「還好，你想食嘢？想食咩？」陸修然輕輕搖頭，感覺又唔算太肚餓
「想食炸雞排⋯」黎昕淇摸一摸自己嘅肚，好似已經要聞到炸雞排嘅香味
「番去買。」陸修然道
行到地鐵站嘅時候，兩人喺電梯上時已經想到列車到站嘅聲音，行喺前面嘅鍾安而比鍾樂時拉住跑上去追車
黎昕淇仍然翹埋雙手企喺梯級上郁都唔郁，陸修然大概估到黎昕淇唔想追車，伸手拉咗佢嘅手一下
「嗯？」黎昕淇頓時轉身望向陸修然
「冇。」陸修然搖搖頭
企到喺月幕門前等車嘅時候，黎昕淇朝陸修然行近一步，喺冇其他同學嘅時候靠近佢
陸修然冇轉頭望佢，只係望住前面嘅幕門一直觀察住黎昕淇嘅一舉一動
黎昕淇伸手偷偷地勾住陸修然嘅手，陸修然握咗佢嘅手一下之後故意鬆手，黎昕淇卻用力咁握住佢嘅手，膊頭靠住佢嘅手臂
「咳咳⋯」陸修然咳咗兩聲提醒黎昕淇宜家仲喺學校附近
黎昕淇冇鬆手，反而定睛望住陸修然，手先挽住佢嘅手臂再拖住佢嘅手
「你好大膽呀。」陸修然面向黎昕淇，今次選擇回握黎昕淇嘅手，將黎昕淇朝自己嘅方向拉
黎昕淇行近一步，喺距離拉到咁近嘅時候，黎昕淇忍唔住內心嘅想法，試探性咁微微低頭，額靠喺陸修然嘅膊頭上
偶然大膽嘅舉動都可以成為一段關係嘅調劑，放少少嘅刺激作點綴
壓抑住內心嘅不安一直留意住電梯口嘅人係比較謹慎嘅黎昕淇，一見到著住校服嘅學生即刻就嚇咗一跳然後瞬間鬆手
「隔離學校嘅學生嚟⋯」陸修然望向電梯口，一臉無奈咁笑道
「以為係我地學校嘅學生⋯」黎昕淇不安嘅心放鬆咗一半，又一次拉起陸修然嘅手，「嚇咗一跳⋯」
「睇到⋯你成個人都窒咗一下⋯」陸修然道，目光落喺電梯口嘅位置，「車都差唔多到啦⋯」
IG Link: https://www.instagram.com/nd_cotttoncandy/?hl=zh-tw