【愛情】如地下情一樣嘅癮，係我對你嘅定義: 114
「你個學生會牌呢？」「唔記得扣番。」
「校呔拎去洗過？」「冇，只係琴日拆咗落嚟，今朝唔記得扣番上去。」
鍾樂時看似望住遠處發呆，實際上聽住身邊兩人嘅對話；兩人因為鍾樂時同鍾安而喺度，交談都冇太多嘅避忌，連企都企得比較近
黎昕淇講嘢比較細聲嘅時候，陸修然都會微微耷低頭，從旁邊睇起嚟佢有將腰彎低少許
「佢地睇起嚟咁習以為常嘅⋯？」始終會有其他人留意到企喺隔離嘅兄妹嘅表情，「係因為見過好多次⋯？」
喺各種猜測中夾雜咗真正嘅答案，只係大家唔知道，只可以靠觀察去思考
兩人喺課室門前分別，宋楚妍望住黎昕淇行入課室 ，隨後望一眼喺佢地課室外經過嘅陸修然
宋楚妍冇思考太多，拎起功課起身行到老師枱前分類放低，餘光見到黎昕淇拎住功課出嚟，下意識就放慢動作等埋佢
「做咩呀？」黎昕淇嘅背靠近宋楚妍嘅膊頭同時細細聲道
「冇呀，等埋你嘛～」宋楚妍嘅下巴靠喺黎昕淇嘅膊頭上道，「今日上台宣傳好好睇啵～」
「你指邊方面好睇？」黎昕淇笑問道
「方方面面都好睇～」宋楚妍話中有話，帶住意味深長嘅笑容點點頭
「兩位企喺度傾計傾到幾時？」江清懿嘅手喺旁邊伸出嚟，將功課簿放喺啱嘅位置，「擋住晒後面啲人交功課。」
「你隻手又唔係唔夠長擺功課⋯」宋楚妍同後黎昕淇分開，宋楚妍邊講邊行番埋位
「都係嘅，唔似你手短。」江清懿無奈聳肩
「你咁樣會單身一世⋯」黎昕淇擰轉頭望住江清懿
「知你唔係單身，但唔好咁樣對朋友⋯」江清懿用手踭撞咗黎昕淇嘅背一下同時低聲道
⋯
小息嘅時候
「啱啱佢唔係話背默第二到最後一段背默咩？」
「啱啱？啱啱佢有講咩？」
「有呀，佢仲話邊個唔合格就罰抄10次嘛～」
鍾樂時喺梯間已經聽到佢嘅朋友們嘅對話，連忙加快腳步向下行打算追上去
經過轉彎位嘅時候先發現江清懿原來行喺前面，鍾樂時嘅大腦頓時拋出兩個選項：「追上前！」同「行慢啲！」
「喂！」鍾樂時一下拍落江清懿嘅背，江清懿猛然回頭
「嚇邊個？」江清懿語氣平淡咁問道
「呃⋯」鍾樂時嘅手懸喺半空，自己都愣咗一下，佢明明係打算行慢啲，但轉眼已經伸手拍咗江清懿，「哎⋯」
鍾樂時自我抱怨咁唉氣，江清懿不解咁望佢一眼，鍾樂時拍完江清懿嘅手都有啲無處安放嘅感覺
「哎啲咩？」江清懿問道
「冇咩⋯」鍾樂時垂眸，喺心入面又嘆一口氣
佢唔明江清懿點樣做到好似冇事發生一樣，仲可以咁冷靜咁對住佢，喺屋企都係一樣，同以前完全一樣
咁樣嘅話算係唔將佢放喺眼內定唔當係一回事⋯？太踐踏他人嘅心意啦掛⋯
「有囉⋯」鍾樂時又緩緩開口道
「嗯。」江清懿呢個回答係等緊鍾樂時開口講
鍾樂時抬頭定睛望住江清懿，江清懿都冇迴避佢嘅視線，但鍾樂時卻心虛咁先將視線移開：「哎，冇嘢。」
「吓？哦⋯哦⋯」江清懿對佢嘅欲言又止無奈咁點頭
「若無其事咁樣⋯你都⋯太識令人傷心啦掛⋯」鍾樂時卻忍唔住一樣喺垂頭時細聲道
江清懿一愣，佢都唔知要讚鍾樂時太勇敢定係唔識睇地方氣氛先係，喺學校講嘅話難免會有啲唔安全
「因為我冇其他嘢可以答⋯」江清懿唔想答得直接，畢竟喺屋企都係會見到面
「哦，隨便你。」鍾樂時頓時有啲小脾氣， 加快腳步落樓梯，略過咗江清懿嘅身旁
江清懿一直避開呢個話題，喺屋企就話可以避，但鍾樂時行到佢隔離直接問嘅話，佢可以點樣避開⋯？
「咁快買完番嚟嘅？」坐喺位睇書嘅鍾安而一抬頭，就見到周晟祐拎住盒嘢飲行到佢嘅座位前
「買個嘢飲啫，都唔洗幾耐。」周晟祐坐低喺鍾安而前面坐低，「你個妹咁可愛嘅？」
「嗯。」鍾安而頓時抬眼望咗周晟祐一眼，「點解突然咁講？」
「啱啱落去咁啱聽到，唔係我偷聽，係咁啱。」周晟祐再三強調，「你個妹同江清懿講嘢，聽起嚟咁似女朋友發脾氣嘅。」
「佢平時都係咁。」鍾安而都見怪不怪
「但好似好少見佢會咁樣同你講嘢。」周晟祐笑道
鍾安而掀書頁嘅動作一頓，唔知點解聽起嚟會覺得周晟祐話中有話，但係鍾安而又唔想諗太多
「對唔同人有唔同態度都好正常。」鍾安而清空想法，小說亦掀到下一頁
「其實呢，你個妹會唔會係中意呢個異父異母嘅哥哥呢？」周晟祐突然壓低聲線，認真咁問鍾安而
「我點知。」鍾安而平靜咁回答，心入面覺得唔太可能，「你諗下好啦。」
「唔係我諗下，係大家諗下，我都係喺你個 妹嗰級啲人度聽番嚟。」周晟祐嘅說話彷彿係將呢件事同自己撇清關係
喺校隊嘅周晟祐喺對落嘅兩級都有識嘅人，收到新嘅消息都係唔出奇嘅事
眼見鍾安而對呢件事好似有啲感興趣，周晟祐就更加想講佢所知嘅嘢忽鍾安而知
「喺你個妹嗰級，有人講起話你個妹中意江清懿，好似係喺佢啲朋友嗰度散出嚟嘅消息。」周晟祐即刻將佢知嘅嘢都講出嚟，「聽同我講嘅嗰個男仔講，佢問過你個妹，但佢冇承認亦冇否認⋯所以你有冇問過？」
IG Link: https://www.instagram.com/nd_cotttoncandy/?hl=zh-tw