【愛情】如地下情一樣嘅癮，係我對你嘅定義: 86.
放學見面嘅時候，黎昕淇全個腦都諗緊關於今日傳到佢面前嘅「傳聞」
「果然都係想知佢知唔知⋯」黎昕淇抬頭望住陸修然嘅時候喺心裏默默道
佢已經猜測咗大半日，難得宜家陸修然就喺佢隔離，佢可以直接問清楚
「阿然⋯」黎昕淇將陸修然抱住佢嘅雙手輕力推開
陸修然不解咁望住黎昕淇，觀察佢嘅微表情，想從佢嘅表情中估出佢想表達嘅意思
「做咩？」陸修然望住略帶點猶疑不決嘅黎昕淇
黎昕淇思前想後都唔知點開口先好，但又唔想要陸修然一直企喺度等佢講嘢，黎昕淇微微撅一下嘴後緩緩開口：「今日見到支援組嗰幾個女仔同你一齊。」
「哦，佢地嚟問我嘢。」陸修然頷首
「佢地問你啲咩？」黎昕淇雖然猶疑，但冇退縮，佢嘅好奇同忐忑一直圍繞住佢
「你覺得呢？睇嚟你都已經有答案。」陸修然反問黎昕淇，眼見黎昕淇突然咁問佢大概估到佢心中有答案，「你平時都唔會理我同邊個一齊。」
「呀？後面嗰句可以省略。」黎昕淇一怔，好快又收起少許訝異嘅表情，「佢地問咗你啲咩？」
「一直旁敲側擊，後來直接問我同你到底係咪拍緊拖。」陸修然都唔打算兜圈，直接回答問題，「講咗一大堆嘢嚟氹我講。」
「最近已經有我同你嘅傳言緋聞，好似係上次睇戲撞到嗰兩個女仔散出去。」黎昕淇長嘆一口氣，「我嗰班已經有人問我⋯」
「我都冇辦法阻止佢地講。」陸修然聳肩，「我都係如實回答。」
「如實回答？」黎昕淇嘅眼中閃過一絲慌張
「我指嘅係冇拍拖。」陸修然輕拍黎昕淇嘅額頭一下，「點可能講其他嘢比佢地聽？」
「點知你，我地受人仰慕嘅會長從來都天不怕地不怕。」黎昕淇默默鬆一口氣，但又覺得仍然有種堵住心頭嘅感覺
「我又唔係真係天不怕地不怕。」陸修然拉起黎昕淇嘅手腕，將佢帶到自己懷中，「你唔想比人知嘛，真實情況我地知咪得。」
陸修然嘅一句令黎昕淇嘅內心有啲踏實，特別係聽出佢話中嘅弦外之音嘅時候，嘴角不禁微微上揚
「你⋯對所有人都係咁㗎？」黎昕淇嘅說話將所有重點省略，只係留下句子嘅主體
「當我好得閒？冇咁多心力。」陸修然無奈咁講道
「哦，隨便你。」黎昕淇看似唔太在意一樣，雙手攬住陸修然嘅腰，將額靠喺佢嘅膊頭上
「你會在意呢啲事？」陸修然不禁笑問道，黎昕淇嘅體溫隔住薄薄嘅裇衫傳嚟
「就隨口問下。」黎昕淇回答得漫不經心
陸修然稍微望佢一眼，將雙臂間嘅距離收窄；黎昕淇今次冇推開佢，只要合上眼，鼻尖前嘅氣味就會變得好明顯
「只要佢呢個人喺度就好⋯」黎昕淇喺心中默念，下一個瞬間佢忽然雙腳離地，坐咗喺枱上，「喂⋯！下次知會聲先抱起我⋯！」
「下次。」陸修然雙手撐喺黎昕淇嘅旁邊，將佢圍喺自己雙臂間嘅範圍
陸修然企喺黎昕淇嘅雙腳間，黎昕淇提起雙手放到陸修然嘅膊頭上，喺佢嘅頸後交搭，姿勢睇起嚟有啲曖昧，不過似乎又恰到好處⋯
「嗯⋯！」喺麻痺感從頸上傳嚟嘅時候，黎昕淇嘅喉嚨不禁發出聲音
曖昧嘅一聲將陸修然完全撩起嚟，陸修然用右手托喺黎昕淇嘅頸同下顎，黎昕淇微微側着頭，酥麻嘅感覺沿頸而上，佢嘅手捏住陸修然嘅裇衫
「唔準⋯唔準留記號⋯！」黎昕淇吞一吞口水，微微張開口，勉強道
「冇留⋯」陸修然嘅指尖喺佢啱啱錫過嘅位置輕掃過，「係留咗嘅話，比你留番個。」
黎昕淇定睛望住陸修然嘅雙眸，撅一撅嘴後耷低頭，伸手捉住陸修然嘅領結捏嚟捏去
「比你以後嘅女朋友知道嘅話會嬲啦⋯」黎昕淇放輕聲線，連打喺陸修然膊頭上嘅拳頭都係軟綿綿
「咁快幫我諗好晒啦？連下一個女朋友都諗好埋？」陸修然無語道
「嗯，諗定先好。」黎昕淇頷首，啱啱嘅感覺仍然喺佢嘅腦海中停留
陸修然默默望住黎昕淇，黎昕淇嘅餘光察覺到佢嘅目光，稍微再思考一下啱啱陸修然嘅說話：「下一個⋯？」
「唔知你講咩⋯！」黎昕淇將想上揚嘅嘴角壓番落去，伸手又喺陸修然嘅胸口上打咗一拳，今次嘅力度比啱啱重咗少少
望住黎昕淇傲嬌嘅表情，陸修然輕捏黎昕淇嘅手一下，悄然湊近輕吻喺佢嘅唇上
「其他人要講就由得佢地講啦，反正只要唔係佢地想聽到嘅答案，佢地都唔會信。」陸修然柔聲道，「如果佢地講難聽嘅說話，我會先維護你。」
由冇人察覺到嘅某一刻開始，只要黎昕淇喺面前，佢嘅目光就會一直停留；喺佢附近都好，佢嘅餘光都會默默留意住佢
情愫一直無聲無息增加，只係大家嘅關係太過親密所以先會忽略咗細節嘅地方
「會長好可靠，信你啦～」黎昕淇嘅語氣輕柔，但發自內心嘅開心卻係難以掩飾
黎昕淇伸手攬住陸修然，將成個人嘅重心都轉移到陸修然身上，本來明明仍然覺得忐忑，但一句會先維護佢，心入面嘅不安感就頓時消散而去
⋯
「你有冇聽到？最近關於會長同黎昕嘅緋聞。」鄭洛苡行喺鍾安而身旁，帶住好奇問道
「有聽聞過。」鍾安而將手錶戴番喺手腕，啱啱補課小測嘅時候佢將手錶除咗落嚟
「唔知佢地係咪真係有拍拖呢⋯」鄭洛苡有啲好奇，始終都係有啲想知道真相
「唔知。」鍾安而聳肩，「佢地係嘅話遲早會公開。」
鍾安而仍然當自己咩都唔知，不過短時間內就可以將緋聞由喺低佢地一級嘅範圍內傳到佢地本人所在嘅年級，陸修然嘅一舉一動果然都係引人注目
「鍾安而！」鍾樂時朝行喺佢正前方嘅鍾安而跑去
鍾安而同鄭洛苡同時擰轉頭，鍾樂時追上前到鍾安而嘅左邊，佢探頭望向鍾安而朝佢一笑，下一秒嘅視線就移到鄭洛苡嘅身上，由下而上仔細打量
「做咩望住我⋯？」鄭洛苡心入面有啲不解同時覺得奇怪，將嘴角微微撐起少許以保持平靜
鍾安而留意到鍾樂時嘅視線，循住佢嘅目光望一眼鄭洛苡後微微側身擋喺兩人之間，側住頭望住鍾樂時
IG Link: https://www.instagram.com/nd_cotttoncandy/?hl=zh-tw