【愛情】如地下情一樣嘅癮，係我對你嘅定義: 87.
「嗯？」鍾樂時見鍾安而擋喺眼前，抬頭微笑一笑，「你番屋企呀？」
「唔係仲可以去邊？」鍾安而無奈反問，然後行番原位
鍾安而一行開，鍾樂時又偷瞄鄭洛苡一眼，鍾安而低聲咳一聲，鍾樂時隨即企好收回視線
「嗨。」鍾樂時探頭望向鄭洛苡，禮貌咁打個招呼，「你同哥哥係同班㗎？」
「哦⋯係呀～」鄭洛苡帶住微自，佢極力咁露出自然嘅笑容
鄭洛苡嘅內心莫名緊張，或者因為佢知道眼前嘅女仔係鍾安而嘅妹妹，所以喺對話嘅時候先會覺得緊張
「副會長嘅妹妹⋯要留個好印象⋯」鄭洛苡喺心入面提醒自己
「最近有冇聽過關於會長同黎昕嘅緋聞呀？」鍾樂時露出燦爛嘅笑容問道，心入面期待緊鄭洛苡嘅回答：「如果佢係會長嗰派，咁好大機會當鍾安而係後備，作為妹妹，絕對唔會比呢件事發生⋯！」
「有呀，都有傳到我地級。」鄭洛苡對於突然改變嘅話題有啲愕然，不過都係冷靜應對
「咁快又會傳到你地級嘅～」鍾樂時笑道，「你覺得佢地係咪真係一齊咗？」
「我都有啲好奇⋯」鄭洛苡對於自己嘅小八卦有啲唔好意思，「不過我自己佢地係幾襯。」
「哦～我都覺～」鍾樂時露出滿意嘅笑容
鍾安而見到鍾樂時呢個笑容，佢瞬間明白鍾樂時係審核緊鄭洛苡，佢唔會阻止鍾樂時，畢竟阻止佢都冇咩意思，鍾樂時喺呢方面會堅持己見
「係呢～你之前係唔係同哥哥一齊番學呀？」鍾樂時由鍾安而嘅右邊繞過鍾安而到兩人中間，逼開咗鍾安而
「佢都真係好認真⋯」比人逼走咗嘅鍾安而無奈咁望住興致勃勃嘅鍾樂時
「有時番學會撞到，所以都會一齊行番學校。」鄭洛苡微笑道
「哦～」鍾樂時點點頭，順便補充一句：「哥哥平時好少同其他人一齊番學。」
鄭洛苡同鍾安而都唔知道要比啲咩反應先啱，鍾安而留意到鄭洛苡有啲尷尬，於是默默咁行番去兩人嘅中間將兩人隔開
「你都番去啦係唔係？」鍾安而隨便搵個話題覆蓋剛才嘅話題
「係呀～」鍾樂時乖巧咁點頭，「江清懿買咗嘢食！啱啱睇到佢IG～」
「又食，你今晚又唔洗食飯啦？」鍾安而輕皺起眉頭，「阿姨已經話你食嘢食得少。」
「我邊有？我番去就要食薯片～」「唔準食，你夜晚都唔洗食飯啦，阿姨次次都煮你中意食嘅嘢。」
「江清懿都食啦！」「人地冇食零食食到食唔落飯。」
鄭洛苡喺一旁默默觀察兩兄妹嘅互動，覺得有啲有趣：鍾樂時活潑好動但係睇得出佢唔太會反抗鍾安而，鍾安而睇起嚟溫柔敦厚但睇得出對鍾樂時比較嚴格
「副會長喺感情上應該都比較⋯內斂⋯？唔，有啲難度⋯」鄭洛苡喺心裏輕嘆一口氣
鍾安而忽然望向鄭洛苡，鄭洛苡臉上掛住嘅微笑都收唔切，同鍾安而對上視線嘅時候都愣咗一下
「睇嚟真係呢個～」鍾樂時壓抑住想上揚嘅嘴角，「果然都係要親眼睇一次，了解一下先可以～安全安全～」
鍾樂時安靜咁行喺鍾安而隔離，冇專心聽兩人嘅聊天內容，又一次㩒開江清懿嘅story，直接回覆一句：「番嚟幫你清晒佢地」
江清懿咁啱睇緊手機，見到鍾樂時嘅message自然就去回覆；鍾樂時見到代表輸入中嘅嘅三點，不自覺露出笑容，心跳不禁加快⋯
⋯
鍾樂時行出睡房，見到江清懿坐喺梳化，手上拎住一包啱啱開嘅薯片邊食邊睇手機
「我又食！」鍾樂時即刻衝去江清懿隔離坐低，毫不客氣就拎兩塊放入口
「你又食！鍾安而話咗你番嚟唔可以食零食！」江清懿將薯片放到另一邊好好保護住
「我食兩、三塊咋嘛～可以有幾飽？」鍾樂時伸手去拎
「唔得呀，你成日都食唔落飯。」江清懿拎起薯片由梳化中間坐到最側邊
「食多兩塊，就兩塊！」跪坐喺江清懿隔離嘅鍾樂時嘅上身微微前傾，跨過江清懿將手伸到薯片袋
江清懿頓時就覺得唔自在，呢個姿勢總係令人覺得奇怪，江清懿頓時用盡一切方法將自己往後縮，背都已經要陷入梳化入面，就係要唔好掂到鍾樂時
「拎完未？」江清懿撇開臉，邊度都唔敢望，亦邊度都唔敢掂
「拎完啦⋯」鍾樂時將薯片放入口，乖乖坐番好，「你望緊咩⋯？」
「冇。」江清懿收回視線，耷低頭睇手機
「真係冇？」鍾樂時彎腰探頭望江清懿
「冇呀。」江清懿伸手將鍾樂時嘅頭推開，「坐好啦。」
「我坐得仲唔夠好咩？」鍾樂時低頭打量自己嘅坐姿
「唔好貼住我坐，梳化咁大，你做咩要逼到嚟我隔離坐？好逼。」江清懿嫌棄道
「我都未嫌棄你！你做咩嫌棄我？」鍾樂時不滿咁抬起下巴質問道
「坐開啲啦！男女授受不親呀⋯」江清懿怕咗鍾樂時，直接用梳化上嘅抱枕擋喺佢同鍾樂時之間
雖然話係兄妹，但靠得咁近始終唔太好，保持番適當嘅距離會更好
「你怕醜呀？」鍾樂時瞪大雙眼，嘴角小幅度上揚，「你都會覺得怕醜㗎咩？」
「唔係怕唔怕醜嘅問題⋯」江清懿無奈嘆氣
佢唔想比人誤會佢同鍾樂時之間有咩關係，喺呢個家庭啱啱重組嘅時候有人喺背後講過呢件事
就算係其他人都可以睇得出，鍾樂時喺江清懿面前比較活潑調皮，同喺鍾安而面前唔一樣
雖然江清懿好肯定佢對鍾樂時冇想法，始終保留界線喺兩人之間，但有時佢都覺得鍾樂時喺佢面前活潑過度
鍾樂時忽然挺直腰坐起，江清懿嚇咗一跳下意識向後一縮，鍾樂時湊前直盯住江清懿嘅雙眸
鍾樂時嘅雙眸帶住無法隱藏嘅稚氣，但係更多嘅係好似繁星一樣嘅閃亮
鍾樂時盯住江清懿都就嚟入晒神，唯一一樣佢仍然感受到嘅係佢嘅心跳
IG Link: https://www.instagram.com/nd_cotttoncandy/?hl=zh-tw