【愛情】如地下情一樣嘅癮，係我對你嘅定義: 85.
「我想食呢個。」黎昕淇望向陸修然，指住餐牌上其中一道菜
「陣間嗌。」陸修然微微頷首，手指勾住黎昕淇套喺手上嘅髮圈，「縮手，睇唔到下面寫咩。」
「下面係牛肉粒。」黎昕淇縮開手
兩人嘅手垂低嘅時候默契滿滿咁拖住對方，喺枱下面嘅位置基本上好難睇到
最近太習慣拖手，宜家拖手嘅動作自然到好似呼吸一樣
陸修然嘅手稍微鬆開，黎昕淇好似已經預知到佢想轉個拖法一樣，手微微打開，由得陸修然將佢嘅手緊緊扣住喺手心中
十指緊扣嘅拖手方式睇起嚟更有佔有慾，如果對方要行離自己身邊，比起普通嘅方法更加容易將對方拉番嚟，停喺自己身邊
「阿然你睇下你食咩？」黎昕淇將餐牌放到陸修然嘅面前，「陣間唔洗諗咁耐。」
「每次要諗好耐嘅人係你。」陸修然拎起餐牌隨意掀兩下，其實佢食咩都冇所謂
「媽咪！」黎昕淇望向跟喺帶位員身後行嚟嘅人，嗌一聲同時鬆開咗陸修然嘅手
「阿姨。」陸修然乖巧咁點一點頭
「你地咁早到呀？睇咗食咩未？」黎媽媽坐低喺黎昕淇隔離
「睇咗啦，阿姨你睇。」陸修然將餐牌放到黎媽媽嘅面前
黎昕淇抬頭望陸修然，陸修然喺其他人面前嗰副體貼乖巧嘅模樣，有時令佢不禁懷疑喺佢面前嘅陸修然到底係第幾個人格
陸修然嘅佢面前所表現嘅，將佢嘅佔有慾完全咁表露無遺；黎昕淇向來唔中意被人左右，但似乎佢都有唔討厭被佔有嘅一刻
食完飯之後，兩人行喺最後跟喺爸媽嘅身後，陸修然將cap帽嘅帽檐向下拉，每一次只要係同黎昕淇一齊出去食飯佢都一定會戴住cap帽
兩個人喺父母面前保持住合適嘅距離，以免父母會懷疑佢地嘅關係狀態
「嗯？」黎昕淇忽然探頭望陸修然，陸修然嘅視線從手機螢幕上移開
「冇咩。」黎昕淇搖搖頭
晚風吹過嘅時候，黎昕淇垂眸低頭，陸修然卻將目光放到佢身上，想要睇穿佢心中所想，亦想知道佢一切情緒
陸修然收回目光嘅時候將帽檐向下拉，佢想收起心入面嘅情緒，但亦想將情緒毫無保留咁表達，但佢並唔自私，佢唔會只係諗自己想唔想
晚風吹過嘅時候，似乎將愁緒都吹到腦海中，冇帶走一絲煩惱
「呢個關係，會維持到幾時⋯？」
⋯
又過咗幾日
幾個女仔喺黎昕淇附近竊竊私語，本來黎昕淇都冇太在意，直至察覺到佢地一直偷望自己
「講緊咩要一直望我⋯？」黎昕淇雖然覺得奇怪，不過佢冇打算好奇太多
不過佢唔好奇，唔代表其他人唔好奇，黎昕淇唔理，嗰幾個同學直接行到黎昕淇嘅座位前面同隔離坐低將佢圍住
「黎昕呀，問你啲嘢呀～」坐喺佢前面嘅女仔先開口
「嗯，問咩呀⋯？」黎昕淇忽然嗅到一絲異常，頓時有少許警惕
「你係唔係同會長拍緊拖？」坐喺佢面前嘅女仔神神祕祕咁細聲問道，眼睛一直觀察緊黎昕淇嘅表情反應
坐咗江清懿嘅座位嘅女仔定睛望住佢，試圖從佢思考中嘅表情睇出一絲線索
「冇呀。」黎昕淇平靜咁搖頭，冇露出任何破綻
「真係冇？冇同會長拍拖？聽低我地一級嘅女仔講你同會長拍緊拖喎～」坐喺佢隔離嘅女仔有啲懷疑，拉一拉黎昕淇嘅手想氹黎昕淇講
「低我地一級？呀⋯支援組嗰兩個女仔，一定係上次睇電影⋯」黎昕淇即刻反應過嚟，腦海中頓時浮現佢地上次喺會室門口問嘅嘢，「佢地講咗出去⋯？又會傳得咁快⋯？」
「你坦白話我地知啦，我地幫你保守秘密！」坐喺前面嘅女仔一臉誠懇，但黎昕淇唔會上當
「真係冇，佢地傳啫。」黎昕淇打算一笑置之
黎昕淇心中嘅不安更加強烈，按照呢個傳遞信息嘅速度，大概好快又會有人問佢同陸修然係咪拍緊拖
「真係？大家同班咗咁耐唔好講大話喎～你係咪同會長偷偷地拍拖呀？」坐喺隔離嘅女仔堅持咁追問
「真係唔係。」黎昕淇有啲無奈，心入面不禁嘆氣：「人地咪話咗唔係⋯就算係都唔會同你地講啦⋯」
「你唔好誤會呀～我覺得你同會長好襯㗎～」坐喺前面嘅女仔帶住釋出善意嘅笑容澄清道，「我都中意睇好睇嘅人一齊～」
黎昕淇笑而不語，感覺喺呢個時候答咩都唔太啱，聽起嚟一係太有嫌疑一係太唔自然⋯
到咗小息嘅時候，黎昕淇同宋楚妍企喺小食部一邊食嘢
黎昕淇喺遠處已經望到陸修然比幾個支緩組嘅女仔纏住，都唔係啲咩新鮮事，但今日嘅佢顯然有啲忐忑不安
「會長真係好慘⋯」宋楚妍將飲管戳穿錫箔紙，「休息時間都比嗰幾個女仔纏住⋯」
「佢都慣㗎啦。」黎昕淇壓抑住內心嘅忐忑，淡然咁講咗一句
「唔知道會長搵咗女朋友嘅話點算⋯」宋楚妍嘆氣道，下一秒望向黎昕淇：「最近聽啲師妹講，你同會長拍緊拖。」
「係咩？」黎昕淇眨一下眼，視線收回落喺宋楚妍身上，好似冇聽過呢個傳聞一樣反問
「好似係喺學生會支援組嗰幾個女仔嗰度傳出嚟。」宋楚妍朝陸修然嘅方向抬一抬下巴示意，「冇人問你咩？」
「有呀，今日班上面有人問。」黎昕淇反應平淡咁點一點頭
黎昕淇順住宋楚妍嘅視線望去，目光落喺企喺陸修然面前幾個支援組嘅女仔，特別係上次睇戲偶遇到嗰兩個女仔，下意識就同宋楚妍所講嘅事連上
「你唔會⋯真係同會長地下情呀嘛？」宋楚妍一臉嚴肅咁輕皺起眉頭望住黎昕淇
「我？」黎昕淇擺出愕然嘅表情，然後輕笑道：「點可能⋯」
黎昕淇望住幾個女仔圍住陸修然，就算陸修然一臉淡定咁帶住微笑，但佢嘅內心仍然覺得不安
IG Link: https://www.instagram.com/nd_cotttoncandy/?hl=zh-tw