【愛情】如地下情一樣嘅癮，係我對你嘅定義: 34. 答案
「哦，去咗掉垃圾⋯」黎昕淇隨便搵咗個藉口
「人地講嘢講到一半，你去掉垃圾係咩事㗎⋯」江清懿更無奈，「我會同店長講你唔加㗎啦，聽日見啦。」
「嗯，拜拜。」黎昕淇收咗線，將手機放入褲袋，然後起身，迅速咁執好枱面上嘅蛋糕盒，行到陸修然嘅房門口，直接推開門行入去，「陸修然⋯！」
「嗯。」陸修然若無其事咁坐喺書枱前面睇電腦
「你特登㗎？陣間比佢聽到點算呀！？」黎昕淇帶住不滿行到陸修然嘅身旁，氣沖沖咁質問道
「咁佢宜家有冇聽到？」陸修然處變不驚一樣緩緩抬起頭望向黎昕淇，睇起嚟冇太在意呢件事，「冇聽到咪得，而且就算佢聽到⋯佢又唔會知係邊個。」
「陸修然！」黎昕淇嘅臉紅都分唔清係因為嬲定覺得怕醜
「嗯。」陸修然毫不畏懼嘅態度擺喺眼前，黎昕淇都可以感受到佢嘅故意
點解？點解要特登咁做？佢真係唔怕比人知道？
有一百個問題喺腦海中浮現，但黎昕淇唔太想去估答案，估完之後只會增添煩惱
「你嬲咩？」陸修然喺沉默過後開口嘅第一句係問一個明知故問嘅問題
陸修然將櫈推後，然後起身坐到床邊，將櫈空出嚟比黎昕淇坐
「你仲問我嬲咩？」黎昕淇氣沖沖咁坐低喺櫈上面，翹埋雙手撇開臉都唔望陸修然
但嬲咗兩秒之後，黎昕淇深呼吸一口，腰都冇啱啱挺得咁直，鬆開咗翹埋嘅雙手，雙手握住自己嘅手機
「你就⋯真係一啲都唔怕比人知⋯？你到底係抱住咩心態對我⋯」黎昕淇嘅聲線聽起嚟氣都消咗一半，握住手機嘅手一直將手機捏嚟捏去
黎昕淇不自覺咁就問出呢個問題，一直以嚟，陸修然都表現得游刃有餘，完全唔怕其他人會知道佢地嘅關係一樣
「點解我會問陸修然抱住咩心態對我⋯？」黎昕淇問咗出口之後心入面都疑惑咗一下，「答案係咩，其實都冇所謂⋯只係，一個解藥⋯」
房間內一片寂靜，大家都冇出聲，陸修然諗緊要比咩答案，黎昕淇等緊陸修然嘅答案
「唔知道⋯熟嘅朋友掛⋯」喺一分鐘之後，陸修然先打破沉默開口道
但聽到呢個答案嘅黎昕淇一秒躁底，佢唔知自己躁緊啲咩，但就係覺得呢個答案令佢嘅冷靜線一秒斷裂
「我番去先啦，聽日見。」黎昕淇沉住氣企起身，但黑面嘅程度清晰可見
陸修然起身跟喺黎昕淇身後行出廳，只見佢一言不發執好所有嘢就著鞋開門，陸修然伸手幫佢拉開大門
黎昕淇行出陸修然嘅屋企，直接行後樓梯落番自己屋企；陸修然閂埋屋企嘅門，企喺玄關深深咁嘆一口氣
「我可以答啲咩⋯」陸修然有啲無奈同苦惱，「阿昕又嬲⋯」
黎昕淇番到屋企，喺廁所準備用卸妝水抹走唇膏嘅顏色，望到自己嘴上嘅唇膏，黎昕淇心入面就更煩躁，呢種煩躁更加似係嬲同失望嘅混合體
一換好衫之後，黎昕淇直接灘喺床上咩都唔想諗，但愈想放空，腦入面嘅嘢就愈多
「佢答咩都冇所謂，有咩好煩躁⋯」黎昕淇喺心中說服自己唔好諗，但煩躁嘅感覺仍然喺心頭纏繞住
⋯
「叮噹叮噹～叮噹叮噹⋯」落堂嘅鐘聲響起，接住落嚟上選修科嘅堂，幾乎所有人都要調課室
「唉⋯我唔想上物理堂呀，好眼瞓呀⋯」莫淮禮邊抱怨邊拎住物理書行過兩個位坐低，因為物理堂就喺佢地D班嘅課室上堂
「我都唔想上物理堂。」陸修然輕嘆一口氣，拎起書離開座位，行到中間嗰行坐低
陸修然偶然咁望向走廊嘅方向，黎昕淇同宋楚妍攬住書喺窗前經過
陸修然默默咁耷低頭，當咩都冇睇到一樣，拎住原子筆、望住物理書嘅封面放空
⋯
中午飯後嘅會室
「得你嘅？」鍾安而推開會室嘅門嘅時候，見到只有陸修然一個喺會室入面
「哦係呀。」陸修然抬頭望咗入嚟嘅鍾安而一眼
「最近黎昕都冇過嚟。」鍾安而順口咁講咗一句事實，陸修然撥緊手機嘅手都愣咗一下，「好似好少喺度見到佢，呢幾日。」
「可能，同friend一齊掛。」陸修然好似平時一樣，用平靜嘅語氣回答
「都可能係。」鍾安而微微點頭
「黎昕你最近都唔去會室嘅？」宋楚妍望住坐喺課室睇手機嘅黎昕淇，有啲疑惑
「哦，唔想去⋯」黎昕淇平靜咁回答，好似心情冇咩起伏一樣，「留喺度陪你唔好咩？」
「好～梗係好㗎～」宋楚妍嘅想法好輕易就比黎昕淇轉移咗，「你陪我梗係好～」
⋯
「黎昕，陪我去小食部呀～」宋楚妍拉住黎昕淇離開座位行出課室
「你又餓啦，今朝食咗早餐都餓？」黎昕淇無奈一笑
宋楚妍同黎昕淇坐喺其中一張近走廊嘅枱食嘢，陸修然同莫淮禮就坐喺佢地斜後面嘅枱
黎昕淇同陸修然對上視線，然後又迅速將視線移開，宋楚妍講嘅嘢將黎昕淇逗笑
黎昕淇睇起嚟同平時一樣，但只有陸修然知道，黎昕淇仲係嬲緊，佢只係用只有佢地知道嘅方式表達緊情緒
因為佢地最近幾日都係呢個狀態，恰到好處嘅迴避，兩人都冇去會室；放學之後唔會一齊喺屋企做功課，大家各自各生活；手機嘅對話記錄仍然停留喺幾日前嘅夜晚
「黎昕，你最近係唔係有心事呀？」宋楚妍忽然問道，黎昕淇都愣咗一下
「冇呀⋯」黎昕淇露出同平日無異嘅微笑，「做咩咁問⋯？」
「只係我覺得啦⋯最近幾日，你好似都有啲唔開心⋯」宋楚妍撅起嘴，眼神中都夾雜住擔憂，「雖然同平時嘅你都係差唔多，但最近幾日感覺有啲唔同⋯你係唔係有咩心事⋯？」
「唔係⋯」黎昕淇搖搖頭，諗緊要講咩藉口去掩飾，「可能⋯可能只係最近唔夠瞓，所以好似冇咩反應咁⋯」
IG Link: https://www.instagram.com/nd_cotttoncandy/?hl=zh-tw