【愛情】如地下情一樣嘅癮，係我對你嘅定義: 33. 通話

「叮噹～」

陸修然聽到門鐘響就喺睡房行出去開門，一打開門就見到黎昕淇誠意滿滿咁拎住蛋糕盒

「阿姨同叔叔呢？出咗去？」黎昕淇行入玄關嘅時候發現陸修然屋企好安靜，講嘢大聲啲都會有回音

「出咗去，話今晚約咗舊同學食飯。」陸修然將蛋糕拎到餐枱放低，行去廁所洗手

黎昕淇跟喺陸修然身後，行到洗手盆前洗手準備食蛋糕，先一步洗完手嘅陸修然拎住抹手毛巾





「我支唇膏今日新買，個色好唔好睇？」黎昕淇抹完手又行番去鏡前面，唇膏係即買即用，「同我平時搽開嗰隻色深少少。」

「Okay呀幾好睇。」陸修然望咗一眼就回答，其實佢唔太睇得出呢支唇膏嘅顏色同平時嘅有咩唔一樣，睇起嚟顏色都差唔多

「你有冇認真睇⋯」黎昕淇轉頭，用略帶不悅嘅眼神同語氣問道

「有呀，咪幾好睇。」陸修然一臉認真咁再望多一眼，不過再睇多眼都冇覺得有咩咁大分別

黎昕淇忽然拉住陸修然嘅衫角掂起腳尖，喺陸修然嘅唇邊輕吻一下





陸修然可以完完全全咁感覺到來自唇膏嘅質感，黎昕淇企番喺地面嘅時候望住陸修然嘅嘴邊調皮咁笑咗一下

眼見陸修然有啲疑惑，黎昕淇捏住佢嘅臉頰，將佢嘅頭擰向鏡嘅方向；雖然分唔到唇膏嘅顏色，但係陸修然都可以睇到喺佢嘴邊明顯嘅唇膏痕跡

陸修然望住黎昕淇一個得逞嘅笑容，又瞄一眼眼前人因為唇膏而更閃亮水潤嘅唇，心癢難耐嘅感覺一湧而來

陸修然一下捉住黎昕淇嘅手腕將佢拉向自己，低頭直接吻喺黎昕淇嘅唇上，黎昕淇冇後退，佢本來都知道癮呢樣嘢只要輕輕一下嘅撩撥就可以勾起

「蛋糕⋯」黎昕淇輕力將陸修然推開少少，目光落喺佢比唇膏染紅嘅唇上





「嗯，你出去食先。」陸修然微微點頭，鬆開黎昕淇嘅手

「你呢？你唔食？」黎昕淇望向鏡嘅方向睇下自己嘅唇膏有冇出界染到臉上，然後又望向陸修然

「抹乾淨先出去食。」陸修然抽咗張紙巾濕水，對住鏡將嘴上嘅唇膏痕跡抹走，餘光見到黎昕淇仲企喺佢隔離，佢又帶住淡淡嘅笑意悠悠開口：「未錫夠？唔洗食蛋糕啦？」

「食！未錫夠都要食蛋糕。」黎昕淇一秒轉身飛快咁行出廳打開蛋糕盒，「阿然你想食邊件？」

「你揀先啦。」陸修然將紙巾掉入垃圾桶行出廳，「你想食。」

一行出去就見到黎昕淇三心兩意咁揀緊蛋糕，睇起嚟佢兩個都想食

「揀完未？」陸修然拉開黎昕淇隔離嘅櫈坐低，「仲三心兩意緊？」

「你揀先不如。」黎昕淇道，佢將選擇權交比陸修然





「剩低嗰個係你㗎啦。」陸修然拎起左邊長條形嘅蛋糕，拎叉嘅同時開口問：「你要唔要試一啖？」

黎昕淇瞪大眼，睇得出佢嘅小心思嘅陸修然托住頭，等黎昕淇試咗味先；黎昕淇見陸修然咁樣問，佢就唔同陸修然客氣，直接用叉分咗一啖比自己食

「好食。」黎昕淇點點頭，將蛋糕推番比陸修然，「你試唔試我呢個？」

「唔啦，你食啦，睇起嚟好甜。」陸修然搖搖頭，望住擺喺自己眼前嘅蛋糕，佢都已經覺得自己會膩到晚飯都唔洗食，「你仲買咗咩？」

陸修然宜家先留意到放喺枱上面嘅另一個正方形紙袋，上面仲用絲帶綁咗個蝴蝶結

「香水。」黎昕淇將蝴蝶結解開，將香水拎出嚟遞比陸修然

陸修然小心翼翼咁接過香水，對住黎昕淇噴咗一下香水，黎昕淇愣咗一下





「香唔香？」黎昕淇問道

「幾啱你。」陸修然將香水蓋番好，放番喺袋入面，綁番好蝴蝶結，「幾好。」

「楚妍揀㗎。」黎昕淇笑道，然後食一啖蛋糕，甜味喺口中擴散開，成個人都覺得甜膩膩，「我都覺得呢個味幾香。」

宜家喺空氣之中都瀰漫住甜而不膩嘅梨香，有種難以言喻嘅感覺喺心底綻開，但陸修然下意識想避開呢種感覺，直接就伏喺枱

「陸修然？」黎昕淇嘅餘光見到陸修然直接伏低，轉頭望佢嘅時候將手放到佢嘅頭頂上，「眼瞓入房瞓啦。」

「嗯。」陸修然用喉嚨發音低聲回答

喺友情之下掩蓋住嘅關係，好似有一份詭異嘅情愫開始蔓延，彼此偶爾嘅觸碰會產生微妙嘅電流，好似因試探而產生嘅觸電感

唔會因為沉默而覺得尷尬，亦唔會因為冇話題而想搵話題，一直都係咁樣同對方相處





放喺手邊嘅手機忽然震起嚟，黎昕淇拎起手機，喺㩒接聽嘅同時望向陸修然：「喂，江清懿，做咩？」

陸修然稍微郁咗一下，黎昕淇即刻收回視線，餘光見陸修然冇動靜之後又悄然轉頭望一眼

「你加唔加更？店長問，聽日。」江清懿問道，「店長話聽日唔夠人番，差一個。」

「唔加啦，聽日番學點加更？」黎昕淇諗都冇諗就拒絕，「你加更咩？放咗學再番會唔會太癲？」

「我？我唔加呀。」江清懿理所當然咁回答，「放咗學仲番工？唔洗做功課呀？」

「你啱啱係唔係講做功課？」黎昕淇用震驚嘅語氣道，陸修然緩緩坐起身，靠住櫈背放一放空，「你居然會講做功課？」

「我會交功課㗎好唔好⋯番完學已經夠攰，仲番工番到11點係唔係想我死？」江清懿坐喺梳化望住電視





「你都識講啦，仲打嚟問我加唔加更係想點？」黎昕淇反問嘅時候，餘光見到陸修然郁咗一下，黎昕淇下意識就向陸修然望去

「我就係順口問埋你，店長講起要加更嘛，佢又叫我問埋你⋯咁我同佢講你唔加啦，睇下佢會唔會叫其他人囉⋯」江清懿見對面冇人答佢，於是嗌咗一聲，「黎昕？」

江清懿冇啲懷疑黎昕淇係唔係答都懶得答佢所以收咗線，特登將手機從耳邊拎開望一望螢幕，但係螢幕嘅頁面仍然係喺通話中嘅頁面

「黎昕？你人呢？你開咗靜音呀？」江清懿有啲困惑

黎昕淇嘅耳仔仍然貼喺耳邊，手連同手機一齊比陸修然㩒住喺臉頰邊，喺陸修然向後退嘅時候，黎昕淇一臉愕然咁瞪大眼，下意識吞咗一啖口水

「黎、昕、淇！」江清懿又嗌咗一聲

「哦⋯我喺度⋯」黎昕淇仍然喺愕然之中未完全回神，佢抬頭望住陸修然一個事不關己嘅樣起身行番房，「你啱啱講咩⋯？」

「我話我同店長講你唔加，睇下佢會唔會叫其他人⋯你消失咗去邊呀？」江清懿無奈咁重複一次




IG Link: https://www.instagram.com/nd_cotttoncandy/?hl=zh-tw