【愛情】如地下情一樣嘅癮，係我對你嘅定義: 35. 哄回
「真係冇嘢？」宋楚妍有啲懷疑，佢嘅直覺係覺得黎昕淇有啲嘢，但黎昕淇又話冇
雖然黎昕淇平時都係咁樣有啲冷淡，但係冷淡同有心事嘅感覺真係好明顯
「我真係冇嘢～」黎昕淇露出笑容，用笑容去掩蓋佢想收喺心底嘅心情，「只係有啲唔夠瞓。」
「既然你話冇事，咁好啦⋯」雖然宋楚妍都係有啲半信半疑，不過既然黎昕淇講咗冇事，佢都冇追問嘅意思，「不過如果有咩事，你要同我講呀⋯！」
「好呀。」黎昕淇點點頭，「食完未呀？番上去？」
「哦，好呀～」宋楚妍起身，等埋黎昕淇就番課室等小息完
⋯
翌日放學，會室
鍾安而推門行入會室，會室內有陸修然同黎昕淇，另外鍾樂時同張詩楠都喺度，但係鍾安而總係覺得今日嘅會室內氣氛有啲異常，有種凝重嘅感覺，一定唔止係因為大家都唔出聲
鍾安而行去黎昕淇對面坐低嘅時候，同鍾樂時對望一眼，似乎鍾樂時都感覺到氣氛有啲唔尋常，撐起嘴角擠出少少笑容
「氣氛好凝重⋯」張詩楠低聲對鍾樂時講道，「唔知點算⋯」
「我都唔知，點解今日個氣氛咁奇怪⋯」鍾樂時微笑着低聲道，「發生咗咩事⋯」
喺所有人到齊之後，今日嘅會議開始，黎昕淇打開電腦，已經準備好將會議內容記錄低；耳仔聽住大家講嘅嘢，將內容先全部記錄落嚟，有時開口比個意見
「大家同平時睇起嚟都差唔多，但點解氣氛令人咁唔自在嘅⋯」鍾樂時喺心中感到困惑，但佢冇理由開口問，所以都只係默默咁喺心入面講兩句
喺過咗大半個鐘之後，所有人都逐漸安靜落嚟，發言嘅次數都大幅減少，似乎大腦都開始卡住，諗唔到仲可以講咩
「大家，洗唔洗休息一陣先？轉頭番嚟先繼續。」陸修然似乎都覺得差唔多要休息下，「十分鐘，轉頭番嚟。」
「好。」大家都想休息一陣，大腦一直諗嘢都已經有啲腦閉塞嘅感覺
黎昕淇將文件先儲存一次，然後挺直腰拉一拉筋，一直坐喺電腦前面打字，手指都有啲僵硬伸唔直嘅感覺
陸修然望向黎昕淇嘅時候，黎昕淇拎住手機起身，喺鍾樂時同張詩楠身後行過，行到會室嘅門前開門行出去；陸修然喺心中默默咁嘆一口氣，然後起身行出會室
陸修然行出會室之後朝後梯行去，然後向上層行，經過轉角位再行上幾級，黎昕淇就企喺連接到六樓嘅梯級上
企喺呢個位睇手機嘅黎昕淇抬眼望咗一眼，若無其事咁耷低頭繼續睇手機
「黎昕。」陸修然一級一級走近黎昕淇
「會長你搵我有事？」黎昕淇收起手機冷淡咁問咗一句，呢個態度絕對係帶住私人恩怨
「嬲完未？」陸修然企嘅梯級比黎昕淇低兩、三級，同黎昕淇幾乎係平視着
「我冇嬲。」黎昕淇垂眸道，「冇嘢好嬲。」
「真話嚟？」陸修然質疑一樣問道，「最近你完全冇同過我講嘢，唔係嬲？」
「唔係，我地有咩好講？」黎昕淇倔強咁撇開臉，陸修然有啲無奈
「呀⋯我冇拎到地理書⋯」鍾樂時打開書包嘅時候忽然發現自己冇拎地理書
「番去拎？我陪你落去課室拎？」張詩楠坐起身問道
「唔洗唔洗～我自己落去拎得啦～」鍾樂時企起身行出會室
「你係嬲緊嗰日我喺你同江清懿講電話嘅時候錫你，定係，嬲緊後面我答你嘅事？」陸修然心中早有猜測
黎昕淇沉默不語，佢答前面又唔係，答後面又唔係，重點係佢都唔知自己一直係咩事而躁底
「點知道。」黎昕淇緩緩開口，答一個無棱兩可嘅答案
「宜家又冇人知，江清懿有問起你？」「冇⋯」
「佢有冇話佢聽到啲咩？」「冇⋯」
黎昕淇一直撇開臉唔望陸修然，陸修然企喺黎昕淇面前，輕嘆一口氣，向上踏咗一級，同黎昕淇之間嘅距離又拉近咗一步
「咁我嘅解藥仲嬲緊啲咩？」陸修然低聲問道
陸修然嘅一句，黎昕淇忽然覺得自己嘅氣消咗一半，佢偷瞄陸修然一眼，又即刻移開視線
「冇⋯」黎昕淇低聲講道，到宜家佢都唔知自己因為咩事而煩躁咗幾日，「冇嬲。」
係因為陸修然答佢嘅「朋友」兩個字？定係真係因為差啲要喺其他人面前暴露佢地嘅關係？
黎昕淇唔想去諗，但係愈想控制自己唔好去諗，佢就愈會思考原因
想親吻、想觸碰、想佔有⋯最近總有呢種莫名其妙嘅想法，稱唔上係中意，又稱唔上冇感覺⋯ 係唔係癮帶嚟嘅併發症？
「咁我真係信你冇嬲。」陸修然微微側頭望住黎昕淇，想黎昕淇望向佢
「嗯。」黎昕淇將嘴微微撅起，高傲唔願低頭亦唔望陸修然，只係低聲嗯一聲
「嗯？」陸修然嘅嘴角滲出淡淡嘅笑意，有時佢的確中意見到黎昕淇傲嬌嘅小表情
「咩呀？」黎昕淇嘅表情睇起嚟仍然係冷淡，但從語氣中聽起嚟已經消咗氣
陸修然定睛望住黎昕淇，喺其他人唔可能存在嘅距離凝視黎昕淇，將佢所有嘅情緒同小表情都睇清楚喺眼內；就算黎昕淇嘅脾氣有啲難觸摸，睇起嚟同表面嘅溫柔完全唔一樣都好，陸修然反而有啲享受
只有佢一個人知道嘅秘密，只有佢地知道對方面具下嘅一面，聽起嚟好似一種獨有嘅福利
去買完嘢飲嘅鍾安而行緊番會室，行到會室嘅門口嘅時候，鍾樂時一臉震驚咁望住企到喺會室門口嘅鍾安而
「鍾安而⋯！」鍾樂時連忙小跑過去，將鍾安而放到門柄上嘅手捉住，一臉震驚咁對鍾安而講道：「嘩⋯簡直係大新聞⋯！」
IG Link: https://www.instagram.com/nd_cotttoncandy/?hl=zh-tw