[GL] 重遇之後: 一年後—(1)

一年後
「親愛嘅女朋友，請問你整緊咩呢？」
聲音主人從背後環抱我的腰，一個濕潤的觸感溫柔地搔癢著後頸。我暗地勾起嘴角，卻沒有回過頭去，只是專注地以夾子拌炒平底鍋裡的料理。
「意粉，你明知故問。我哋啱啱一齊買材料㗎喎。」
「我知。我只係想搵啲嘢講，同女朋友傾下計啫。」身後的人又於左邊臉頰落下一吻，然後將下巴放到肩上窺探我的表情。
「成日都咁口甜舌滑。」
「但係你鍾意，係咪？」
「我唔鍾意喎，我淨係覺得你好肉麻。」
「你講大話，你明明就好受呢套。你真係唔鍾意，就唔會俾我攬咁耐喇。」
「我怕傷到你自尊心咋！」




我輕輕拍打了一下扣著腰部的手，挨在肩上的人語氣滲著些許不滿：「你真係唔受？」
「唔受。」
我關掉爐火，小心翼翼地將煮好的意粉放到碟上。Tracy這時也安靜下來，默默看著我的一舉一動。待我擺好盤後，她又變回那個淘氣的女孩，以拇指及食指托著我的下巴，輕輕把臉轉到自己面前，瞇起雙眼繼續未完的話題。
「真係？」對方輕啄了一下我的鼻尖，放軟聲音嗲道：「真係唔受？」
「唔受。」我依舊擺出一副不為所動的態度，淡淡回道。
Tracy露出不服氣的表情，親了一下我的嘴角，於耳邊輕柔地低囁道：「真係唔受？」
溫熱的氣息拂過耳邊，使人心跳猛然加速。我挑起眼眉，裝作一臉絕不屈服的樣子，「你夠膽就錫落嚟。」
眼前人當然早就看穿這邊只是在虛張聲勢，她表情從容，緩緩將臉靠近。我也不自覺地半閉上眼睛，兩個嘴唇只差一點點就要貼在一起……
「咳、咳咳咳！！！」
幾聲煞風景的假咳無情地打斷籠罩四周的浪漫氛圍，Tracy不悅地咂了一下嘴，朝站在廚房門口的男人冷冷拋下一句：「呀哥，你入嚟做乜？」




「無，睇下你哋有無炸咗個廚房啫。」
「你有眼睇，呢度一切安好，你可以放心出返去。啲嘢整好我哋會拎出嚟，你唔好再入嚟。」旁邊女生的態度仍然冷淡，她說罷抓著我的手臂，鼓起臉頰別過頭去。
「咁樣趕呀哥出去？」
「我仲未嬲完你之前擅自去搵Jane，我唔想同你講嘢。」
「我係擔心你。」男人稍稍皺眉道。
「你擔心我可以直接同我講，唔係咁樣瞞住我私底下去搵人！你知唔知你嗰時嚇到佢幾驚！」
「Tracy，你冷靜啲，我而家已經無嘢。」我拍了拍放在手臂上的手，希望可以讓氣憤的人冷靜下來。
幾天前，Tracy說想要把我介紹給她哥認識，問我星期天有沒有空到她家吃午飯。那天她的父母都不會在家，加上哥哥的女朋友也會來，大家都是易相處的人，著我不用緊張。
那時的我想起之前發生的事，害怕對方不歡迎自己，一時間不知該如何反應。這顯然而見的動搖一度讓戀人誤會，以為我不想到她家去。雖然已立刻作出否定，但不自然的態度令對方起了疑心，在重重追問下，我終於向她坦白一年前在巴士站發生的事。
「好喇，你哋兩兄妹唔好再嗌交喇！」此時，一個女生走進廚房，沒好氣地朝男人說道：「今日係大家初次見面嘅日子，你就唔好再為難人啦。」




「我無為難佢。」
「唉！Jane，你唔好介意，佢妹控嚟，錫到個妹燶。」
「我得一個妹。」
「係係係，我知你得一個寶貝妹OK？但係而家你女朋友有事想你幫手，請問尊貴嘅兄長大人可唔可以優先幫咗徬徨無助嘅女朋友先呢？嚟，你出去坐喺梳化度等我！」
面對頑固的男人，頭髮及肩的女生以雙手按著對方的背，強行把他推出廚房。盯著男人的背影，Tracy撇嘴抱怨道：「係姐姐你先頂得順呀哥。」
「唉，佢個人就係咁！Jane，真係唔好意思，希望你唔好介意。不過佢態度雖然係差咗啲，但一切都只係出於擔心，唔係有心要刁難你。Tracy你都係，你都知自從你呀哥同咗我一齊之後，經歷咗幾多冷言冷語㗎係咪？佢唔想你都遇到同樣嘅事所以先咁緊張。」
聽到後半段的話，我不自覺地微微歪頭。Tracy垂下臉，依舊不服氣地嘀咕道：「我明，但係我都係嬲佢令到Jane唔開心。」
「我都話我無嘢咯。今日難得聚埋一齊食飯，唔好唔開心喇，好無？」語畢，我輕輕吻了一下對方的右肩。
緊抿的嘴角隨即揚起喜悅的弧度，Tracy將臉哄過來，軟著聲音撒嬌：
「淨係錫膊頭唔夠。」
「你咪得寸進尺。」
「快啲，一下就夠。」
「呢、呢碟係咪已經整好咗？係我拎出去先。」
此時，一直靜靜地看著我們的女生焦急地問道。她沒等待我們回答，便捧起放在爐子旁邊的意粉，如逃般的快步走出廚房。
待她離開後，我稍作猶豫，開口問道：「你哋啱啱講嘅冷言冷語……係咩意思？」