[GL] 重遇之後: 57

我回頭注視情人的臉，淺淺勾起的嘴角讓人難以讀取藏在內裡的心思。
「終點對於我哋嚟講，好似好遙遠咁。」
「嗯。」如眼前人所說，我們在一起的時間還很短，「終點」好像是一種遙不可及的東西。
「但係我嘅答案，由始至終都無變過。除咗我哋兩個之外，無人可以決定我哋之間嘅關係，都無人有權干涉。Jane……你永遠都會係我心入面唯一嘅嗰個人。」凝視雙眼的真摯目光，不帶一點猶豫。
「你係咪仲擔心緊我會亂諗嘢？」五個指頭稍稍用力握緊搓著手背的手，「我而家已經無嘢啦。你唔使擔心。」
「……真係？」
「嗯，我講真。而且你講過㗎嘛，我哋身邊有大家，你有我，我有你。咁仲有乜好驚？」我彎下眼梢報以微笑，想要讓對方放心。
「嘻嘻，你明白就最好。」憂心的神色和緩下來，Tracy面露些許羞澀續道：「雖然唔知道可唔可以稱為終點，不過我心入面都有個目標……或者可以話係……願望？」
「係乜嘢？」
「我希望……我嘅每一日都有你嘅存在……我希望可以同你一齊變老。」




不加修飾的話令鼻頭突然一酸，我將直衝而上的感動之情藏於心裡，輕笑問道：「……呢個係壽星女嘅生日願望？」
「唔只生日……呢個係我每日嘅願望。」
「……係『我哋』嘅願望先啱。」我舉起牽著的手，於對方手背落下一吻。「你啱啱講嘅嘢，都係我每日嘅願望。」
我半側著身躺在戀人旁邊，以鼻尖輕掃柔軟的髮絲，感受那股只屬於對方、讓人安心的氣味。
因為眼前人的存在，我才能一點一點的變得堅強。
妳所給予的愛，讓我有了敢於去愛的勇氣。
心裡雖然有著千言萬語，卻不知該從何說起。我伸手撫著微暖的臉龐，將心意承載於最原始的三個字裡。
「Tracy……我愛你。」
身下的人瞇起雙眼，笑靨如花。她伸出雙手輕輕環抱我的後頸，低聲回應道：
「Jane，我都愛你。」




彼此的呼吸近得快要交纏在一起，背後傳來海水拍打的聲音，我於心中默默祈求：
願我們的愛，如連綿不絕的海浪般，持續到永遠。