[GL] 重遇之後: 55

「Jane，你知唔知道喺日本，有樣嘢叫做中間生日？」我們互相依偶，坐在沙灘上觀賞日落，靠著肩膀的情人抬眼問道。
「未聽過喎……咩嚟㗎？」
「佢意思係指兩個人生日嘅正中間嗰日。」
「咁我八月生日，你十月生日，我哋嘅中間生日就係九月嘅……呢一日？」我打開手機，邊數著行事曆上的日子邊說道。
「無錯！同埋我上網睇到有啲情侶都會慶祝埋呢一日！」
「嘿嘿，咁我哋使唔使都慶祝埋一份？」顯而易見的暗示讓人禁不住彎起嘴角。
「真係？好嘢！」Tracy咧嘴而笑，露出喜出望外的表情。
「今日生日嗰個大晒，有特權。」
「嘻嘻，不過話就話慶祝，但係都唔係話要特登出嚟食飯或者送禮物之類，簡簡單單咁互相講一句祝福說話就已經好足夠……我只係想我哋兩個之間多啲特別日子，可以建立多啲共同回憶。」
「嗯。」可愛的情話使人心頭一暖，我摸了摸對方的後腦勺，於頭頂落下一吻。




「嘻嘻，多謝你今日特登請假陪我過生日。你又帶我去望到海嘅餐廳食晏，又帶我嚟沙灘睇日落，今晚你仲會帶我去邊？」
「今晚你咪知。」
「你今日帶我去嘅地方，全部都同個海有關。」Tracy瞇起雙眼，帶點感慨地說道。
「你話過，海係屬於我們嘅地方。」
語畢，我稍稍低頭輕啄了一下戀人的唇尖。對上那雙略顯濕潤的眼眸，帶著些許稚氣的臉蛋，此刻看起來比平常增添了一抹成熟的魅力。
平日的海灘遊人不多，謐靜的環境讓我倆更加親密，彼此更加靠近對方。近在咫尺的一雙眼睛此刻都被我的倒影填滿，令人產生一種錯覺，覺得世界好像只剩下我們兩個。
蜻蜓點水般的淺吻並不足以堵住快要從內心滿溢而出的愛意，我慢慢將嘴唇貼上她的，輕柔地吸吮那富有彈性的下唇。
有別於單純地將嘴唇重疊在一起的初吻，我們現在開始學會猜想對方的下一步，作出變化和配合。我們輪流吮吸彼此的唇，動作節奏雖然緩慢，卻令人欲罷不能。彼此的存在透過親密接觸流淌進對方體內，彷彿要將自己的印記刻到靈魂深處。
纏繞的雙唇慢慢分開，卻又馬上再度貼合。如此離離合合的重複了好幾次，終於，我倆依依不捨地放開彼此。
「喺夕陽下面接吻……好浪漫。」Tracy再度靠在肩上，瞇起雙眼感嘆道。




「嗯。」
我也挨在戀人身上，抱著對方肩膀的手漫漫滑落至腰間。在夕陽映照下，海面泛起一層層金色的波浪，彷似一幅流動的畫作。
「Jane，未同你一齊之前，我成日都會幻想，如果有日可以同你喺埋一齊，我哋會一齊去邊、一齊做啲咩。我有好多想同你去嘅地方，想同你建立好多好多嘅回憶。」
「咁你而家實現晒所有願望未？」
「梗係未喇！張list仲有好長，你有排陪我。」
「嘿嘿，收到。」我又親了一下對方的頭頂。
「你呢？你有咩想同我一齊做？」
「嗯？我呀……」看著橘紅色的水面，我想了想，續道：「你想做嘅嘢，就係我想做嘅嘢。」
「我話做乜就做乜，去邊就去邊？」
「係，你話做乜就做乜，去邊就去邊。」




「Jane，你真係好可愛……」Tracy將臉頰貼在肩膀磨蹭了幾下，續道：「可愛到我想食咗你。」
「嘿，你唔怕我難食呀？」
對方聞言瞇起雙眼，露出神祕的微笑。「未食過又點知好唔好食呢？」
此時，心裡突然閃過一個壞主意，我也朝眼前人回以意味深長的微笑，於對方耳邊低囁道：「咁你要唔要今晚就嚟個……試食？」