[GL] 重遇之後: 54
「Jane，你食咩餐？」
「嗯……我想食呢個。你呢？」
「我都想食呢個餐！但係呢個好似都好好食咁……」
「哈哈，咁我哋一人嗌一個，跟住交換啲餸嚟食？」
「好呀！」
解決點餐煩惱，Tracy開心地彎起嘴角，坐在對面的Sam此時調侃道：「前輩，我可唔可以都可以同你交換呢？我都想食多幾個餸喎。」
「sorry唔得喎，男女授受不親呀。」
「前輩，我平時咁聽你話，你點捨得咁對咁聽話嘅後輩？」
Sam露出一副受打擊的表情，傷心地說道。坐在他旁邊的Susan也跟著加入對話，故作委屈地挖苦我道：
「唉！而家啲人個個都重色輕友，有同性無人性！同事又點會夠女朋友重要呢！」
「……咁同事嘅地位本身就唔係特別高嘅。」
「嗚！各位聽唔聽到心碎嘅聲音？」
無故受牽連的我嘟嘴反駁，Susan聞言將雙手放在胸前，捏著聲音發出痛苦的呻吟。正當我想再說點什麼之時，對方接下來的話讓頑皮的嘴巴乖乖閉上。
「OK，你遲下放假我唔會幫你跟任何嘢，等你返嚟自己跟飽佢！」
「哈、哈哈，我講笑咋。親愛嘅同事，你大人有大量唔好嬲細嘅好唔好？」
「夠喇，你好假！不過我都唔會真係咁做喇，你就即管安心放假！同你都淨係放一日，應該都唔會有啲咩大問題嘅！」
Susan搖了搖頭，沒好氣地笑道，然後又露出艷羡的眼神：
「唉，我都好想有個好似你咁，會特登請假陪我過生日嘅男朋友呀！Tracy、Jane，我預祝你哋兩個玩得開心啲！」
「嗯、嗯……」我不好意思地搔了搔臉頰。
「啱啦，你哋要讚佢多啲，等佢有多啲自信，唔駛再亂諗嘢！」
Tracy點頭同意Susan所說的話，後者聽罷歪頭問道：「Jane，你今次又自己一個亂諗啲咩？」
「無、無喇……只係有啲鑽牛角尖啫……」
「我唔信只係鑽牛角尖咁簡單……之前明明都好地地，咩事都無嘅！而且我嗰時明明好清楚咁聽到你講『人哋嘅一句說話』，我好肯定自己無聽錯。」
坐在旁邊的戀人瞇起雙眼，朝這邊投以懷疑的目光，她最近總是想要問出是誰讓我那天在橋上情緒失控。我低頭避開對方視線，她語帶不忿續道：
「哼，嗰個人最好同我小心啲，比我搵到對方真身係邊個呢……我將會要佢生、不、如、死！」Tracy緊握拳頭，咬牙切齒地說道。
「你、你冷靜啲先……」我拍了拍對方肩膀，作出安撫。
「到底係咩人會咁做呀？」
Susan托著下巴，作出思考的樣子，Tracy猜道：「會唔會係你公司啲人？」
「我公司？嗯……又唔似喎……我唔覺我公司啲人知道你哋兩個啲嘢……同埋而家個個都想追佢咁款，又點會講佢壞話呢？」
「個個都想追佢咁款？」
同事驚人的話讓我差點沒在椅子上摔下來，身旁的情人搶在這邊作出反應前率先壓低聲線，冷冷地吐出一句。
「Susan，你亂噏啲乜！」
「Jane，我無亂噏！我前排入pantry嗰陣偷聽到啲男同事喺度討論你！」
「講緊我壞話咋！？」
「佢哋喺度話你而家無紮辮靚咗好多，同以前兩個樣，多咗份仙氣成個女神咁。請問呢句邊忽似壞話呢？」
「哦……佢哋仲講咗啲咩？」身旁人面無表情地問著，冰冷的語氣讓人心頭一顫。
「無啦，因為跟住就俾佢哋發現咗我企喺門口度偷聽。」正當我鬆一口氣，以為這段對話就此結束之時，Susan指著我的鼻尖喊道：「跟住班友就開始同我打聽你嘅嘢！」
「吓、吓！？打聽我嘅嘢！？」與板著一張臉，露出可怖表情的戀人相反，我誇張地睜大雙眼，高聲問道：「咁你同佢哋講咗啲咩！？」
「佢哋問我你而家有無男朋友，又話我同你熟，叫我幫佢哋打聽你鍾意啲咩之類嘅。」
「跟住呢……」
「咁我當然唔會照直同佢哋講喇，我咪答佢哋人哋而家咁悉心打扮一定係已經名花有主，叫佢哋唔好咁大想頭！」
「前輩，隻杯就嚟俾你捏碎啦。」
Sam對著拿在Tracy手中的玻璃杯子投以擔憂的視線，怒火中燒的女生並未因此鬆手，「Jane，你係咪一直都知嗰啲男同事想追你？」
「我梗係唔知！唔係Susan而家爆響口，我都唔知原來有過啲咁嘅事！」
我著急地搖頭否認，Tracy不滿地抿嘴嘀咕道：「睇嚟我需要提防你身邊嘅每一個人先得……」
「哈、哈哈哈……」我只能無力地以苦笑回應。
Susan並未專注留意我倆對話，只見她彎下眉，大大的嘆了一口氣：「唉！到底幾時先輪到我遇上自己嘅真命天子！？我都好想俾人追！好想談戀愛！」
「我完全明白！我次次聽完前輩晒命後都好想談戀愛！」
「我邊度有晒命？」
Tracy不解地反問道，剛才還喋喋不休的Susan聽到Sam的話後突然靜了下來。她偷瞄了幾眼坐在旁邊的男生，邊緊張地搓著放在桌子上的手，邊吞吞吐吐地問道：
「係、係啦，Tracy同事……你而家……係咪單身？」
被問的人好像也聽懂話中之意，僵著身子回道：「嗯、嗯。係呀，我而家單身。Su、Susan你呢？」
「我、我都係……」
「又、又會咁啱嘅，哈哈。 」
「係、係囉，又會咁啱都單身嘅。」
「哈、哈哈，咁睇嚟我哋……都幾夾喎。」
「係、係囉，我哋係幾夾哦呵。哈哈哈。」
兩人語畢不好意思地別過視線，男的難為情地搔著頭頂，女的則羞澀地搓著雙手，這股酸溜溜的氣氛讓我跟Tracy禁不住揚起嘴角。
「嘻嘻，睇嚟好快唔使再聽佢哋呻無拖拍。」
旁邊女生小聲說著，我倆四目相交，對著彼此露出柔和的微笑。