[GL] 重遇之後: 34

雖然隔著衣服，對方體溫依然透過緊貼的身體傳來，瞬間，一股熱氣直衝上腦門。輕搔臉頰的髮絲傳來淡淡洗髮精香味，我感到一陣暈眩，從頭到腳都快要燒起來似的。
「你公司樓下嚟㗎！俾人見到點算！？」我焦急地喊道，曲起雙臂抵在對方兩肩，慌張地扭動身體，想要掙脫緊扣自己的束縛。
「朋友攬朋友有咩問題？我哋而家仲係朋友，唔係咩？」
Tracy於耳邊低囁道，然後把頭埋進我的肩膀。她說話時呼出來的氣息竄進耳裡，讓人禁不住顫了一下。我依舊拚命地想要拉開與眼前人的距離，生怕她會聽到那位於左邊胸口下，正在激烈地跳個不停的聲音。
「你軟綿綿，好好攬。」她再加重雙手力度，把我抱得更緊。
過於親密的言行讓我再受不了了，使力推開沒打算放手的人，通紅著臉吼道：「你、你性騷擾呀！好啦！叉電時間結束啦！仲、仲唔行！？」
把給她買來的水果茶硬塞到對方手上，我拋下一臉茫然的女生，徑自快步往前走。被丟在後面的人失笑出來，追上我的腳步，放軟聲音說了聲謝謝。我急切地看著四周，想要找個話題分散注意力，讓自己不再想片刻前發生的事。
「係、係啦，你同嗰個Sam……講咗我哋啲嘢呀？」
旁邊女生怔了怔，說：「 ……你點知嘅？」
「我頭先喺附近撞到佢，佢話你受咗心臟負荷唔到嘅刺激做錯嘢，所以今日要OT執自己手尾。」




「咁多口嘅佢……」她臉帶歉意，不安地問道：「你會唔會唔鍾意？」
「唔會，你OK嘅話，我都OK。而且……」我吸了口氣，向她坦白道：「我都講咗俾Susan聽。」
「咦，係呀？佢無嘢？」
「無呀，佢仲係咁八我啲嘢，要我再講多啲俾佢聽添！」我沒好氣地嘆道。
「哈哈，同我公司嗰個一樣。」
我挑起一邊眉頭，瞄了一眼旁邊女生笑道：「我覺得……佢哋兩個都幾襯。」
聽到此話，她先是眨了眨眼，思考一會後笑著同意道：「哈哈，你講完我都覺！係咪應該搵日約埋四個一齊食返餐晏？」
「哈哈，呢個提議OK喎！」我開朗地附和道。
「我發現……我哋身邊啲人，都幾好哦呵。」
「嗯。」我彎下眼梢，微笑回應對方帶著慶幸的感嘆。「係啦，你同事話你平時喺公司唔點笑，係咪真？」




「我對無興趣嘅人，唔會表現得有興趣。」
「下話？嘿，我有啲想見識下你平時點cool法。」
「你唔會有機會見到，因為你係我心入面最感興趣，最重視嘅嗰個人。」
她的話令人覺得心癢癢的，我乾咳了一聲，藏起逐漸增幅的喜悅，若無其事地問：「咁你今日到底受咗啲咩刺激？」
「你係咪明知故問？」
對方鼓起臉頰，不滿地瞪了這邊一眼，我一臉無辜地回道：「唔係，我真係唔知。」
「咪就係禮拜日嗰日，你喺海傍……偷偷掂我隻手指尾囉。」
對方越說越小聲，難為情地別開視線，這副羞澀的樣子讓嘴角不自覺揚起。「我邊有，你諗太多。我只係唔小心掂到咋。」
「你敢發誓你無講大話？」
「唔知喎，你自己估。」




我們走進一間商場，漫無目的地閒逛，偶爾看到在意的東西，便於櫥窗前停下。我盯著排放整齊的商品，逗她道：
「你平時唔係好大膽嘅咩？比人掂下手指仔就怕醜到連返工都做錯嘢？」
「哼，你而家就咁得戚，我相信如果係你受同樣對待，你都會同我有一樣嘅反應！」
「睇下點。」我笑笑地看著意外地怕羞的人。
此時，旁邊女生對上我的視線，嘴角勾起一個意味深長的弧度，貼近我的身旁，然後輕輕地……勾上我的小指。
「！」我當下全身僵住，無法說出任何話來。
「回禮。」
「……吓？」
她對我露出一個蘊含勝利及挑戰的眼神，緩緩把臉哄過來，於耳邊細語道：「你笑我怕醜無膽，即係覺得咁樣樣繑住手尾指行街都係easy jobl喇？」
我死命強忍想要甩開對方的衝動，拉起僵硬的嘴角，不服輸地回以一個逞強的笑容，稍稍用力勾緊對手的小指。
她瞥了一眼緊扣的指頭，笑了笑，從容地往前邁出步伐。渾身上下再次被陌生體溫佔據，此刻我有種錯覺，自己的心跳跟情思，會不會已透過牢牢勾著的指尖，洩漏到對方的內心深處去。腦海一片空白，我只能呆呆地任由對方擺佈。