[GL] 重遇之後: 33

「Hi，嚟接前輩放工呀？」走到Tracy公司附近，一個男聲叫住了我。往聲音方向望去，那天跟Tracy一起買早餐，名叫Sam的男人正對著這邊輕輕揮手。
「嗯、嗯。」我有點生硬地對著不熟悉的人點了點頭。
「我頭先走之前見前輩都差唔多搞掂晒啲手尾，你行到去佢可能都走得！」
「哦……」眼前男生笑容可掬地看著這邊，讓我感到些許不自在。避開那個過份親切的視線，我遲疑地問道：「哎……你哋呢排好忙呀？好少見你哋公司OT㗎喎。」
「唔係呀，我哋同平時一樣，前輩OT係因為要執自己啲手尾。」
「自己手尾？佢無嘢呀嘛？」
「無嘢，只係老毛病發作啫，唔使擔心。」
「老毛病？」
我不解地回問，Sam神秘地笑了笑，「前輩話佢受咗啲心臟負荷唔到嘅刺激。」
「吓？咩刺激？」




「呢樣就要問你自己喇。」
「………」眼前人一副煞有介事的態度讓我當場皺起眉頭。說起來，首次遇見這個男人的時候，他也是一副像是看穿了什麼的模樣。「你係咪……知道我同Tracy嘅嘢？」
「係呀……哎，前輩無同你講？」我搖了搖頭，Sam頓時面露驚訝，以手掩嘴，不好意思地說道：「Sorry，我以為佢有同你講！哈哈，其實都唔係佢主動講，係佢前排唔小心自己講漏咗口。」
「點講漏咗口法？」
「前排放完復活節假後佢係咁犯埋啲小錯，錯到其他同事都忍唔住出聲話佢！到放晏嗰陣，佢好失落咁自己一個人食飯，我就諗住關心下佢，問佢係咪發生咗咩事。跟住佢迷迷糊糊咁同我講，話同咗鍾意嘅人表白！佢仲要當下唔知自己爆咗響口，到我同佢傾咗陣，佢先如夢初醒！」
「哦……」
「嗰時嘅前輩好得意，哈哈。」意料之外的話讓我懷疑地瞪了他一眼，對方連忙搖手否認道：「嘩！我無特別意思，你唔好誤會！我只係覺得前輩嗰時發現自己講錯嘢，慌失失個樣同平時落差太大，真係無其他意思！」
我淡淡看著慌忙解釋的男人，問道：「佢平時係點嘅樣？」
「前輩？嗯……前輩平時喺公司唔係點笑，俾人感覺比較冷漠。」
「Tracy唔點笑？冷漠？」對方口中的形容，跟我認識的她截然不同。




「係呀，應該點講呢……佢又唔係完全唔理人嗰種，會同你有講有笑，但佢唔會同你好親近，你feel到佢係同你保持距離咁相處。」
「係咩，同我認識嘅佢都幾大出入喎……」
從與Tracy共事的人聽到對方陌生的一面，我在心裡感到些許納悶，同時又更挑起我對她的好奇。也許，我的小學閨密對著不同的人，採取不同的相處方式，要跟她身邊所有的人都接觸過，才能拼砌出一個完整的「黃婉怡」。
「當然喇！前輩鍾意你，梗係對你真情流露啦！」眼前人突然說出不得了的話來，雙頰瞬間如燒起來般燙。他沒注意到這邊表情的變化，自顧自地續道：「前輩佢呀，一講起你，個人就會突然之間變得好開朗！佢講起你嗰時好多表情，成日都會傻笑，睇得出佢真係好鍾意你！」
「係、係呀。嗯，佢開心就好。」我只能支支吾吾地敷衍道。
「唉，見到你哋咁，我都好想談戀愛呀！」
一股既視感突然於腦海閃過。我好在哪裡聽過類似的話。對……是Susan，她也講過相似的話。
我暗地打量了一眼面前的男人。他身穿白色襯衫跟灰色西裝長褲，披著一件深藍色的開襟毛衣，看上去挺斯文的。雖然有點多話，但也算是個懂得禮貌的人。
這樣一看，他們兩個……好像也滿合的，不是嗎？
「好啦！我唔阻住你啦！加油，我支持你哋㗎！」




Sam的聲音打斷思考，面對殷切的鼓勵，我苦笑地點了點頭。
「Jane，等咗好耐？」走到目的辦公大樓外，剛好遇見從裡面出來的Tracy。隱匿於雙頰底下的一雙小圓窩，甫一見我便探出頭來，於臉上綻放的燦爛笑容使人心頭一暖。
「唔係呀，我都係啱啱到。」
她踏著小碎步向著這邊走來，以甜膩的聲線撒嬌道：「Jane，我今日好攰呀，我需要叉電。」
「你想點叉法？」
「我想……攬住你。」
不等這邊回答，Tracy張開纖細的雙臂，將我一擁入懷。