返去兩年前就真係會有用咩？: 第四章-準備

距離上次同阿穎打波都差唔多成個月，唔係我唔想約佢只係冇乜野好做，今日我就睇下阿穎個ig啲精選story，同我記憶一樣佢係成日去迪士尼同海洋公園呢啲主題樂園、會去好多唔同嘅餐廳食嘢、同埋成日睇戲。主題樂園我就一定冇錢、餐廳嗰啲大部分佢都食過，況且如果同佢去咗間唔好食嘅仲煩、睇戲又易有冷場。如果要做啲以前冇做過嘅嘢就…我個腦突然有一個唔錯嘅諗法彈左出嚟。
我：「不如我哋下個星期二去旺角度busking好唔好呀？」我即刻message佢。
穎：「吓！咁突然？我唔係好夠膽喎，會唔會俾人笑㗎？」
我：「唔使驚喎，你唱歌功力咁勁，出去玩下唔好浪費呀嘛。更何況你係有學唱歌嘅人唔出去表演下咁咪好曬。」
穎：「em…好啦」之後經過我一輪嘅說服竟然真係成功令佢接受。
成功說服咗佢之後最緊要就係搵啲設備，基本上我任何設備都冇，不過好彩我有個做音樂嘅表哥。
我：「大佬，你可唔可以星期二借啲設備俾我去busking呀？我要一部琴、兩支咪同一個M。」
表哥：「咁突然！你識彈琴架咩？」其實喺呢兩年我都算係出過去表演一兩次，所以都大概知點做。
我：「算識少少啦，我約咗個女仔去busking，真係需要。靠你㗎啦大佬。」
表哥：「哦，溝女，好啦明曬。你俾啲時間同地址我啦，我車過嚟俾你。」




我：「唔該晒！之後請你食飯！」
連設備都搵好曬，咁只係差唱咩歌。同阿穎傾咗一陣之後話咁快就決定就好。
歌list:
You belong with me
陀飛輪
綿綿
心淡
16號愛人
好好戀愛
長相廝守




不許你注定一人
單車
…
呢啲歌全部都係佢以前傾電話會唱嘅歌，終於有得聽返啦，好想喊。除咗busking 之外仲有一樣野要做，嗰樣嘢係一份禮物，如果好似兩年前咁樣嘅話正常來講佢應該會好開心，而且既然返咗嚟我就梗係要準備得比之前更加好啦，不過透露下其實呢個禮物唔會喺Busking嗰日俾佢。