返去兩年前就真係會有用咩？: 第三章-第一次約會

到咗第二日一如既往聽到嗰首歌彈起身，之後即刻check吓部手機，冇錯，仲係iPhone 8。好彩無返番去2023年。冇記錯嘅話而家呢個時期我同阿穎已經入咗曖昧期，佢會肯應承我打波已經證明咗呢樣嘢，不過之前我激嬲咗佢，令佢對我嘅好感度下降。如果今次我冇亂咁嚟反而係好細心咁同佢玩仲有教佢，佢對我好感都應該唔會下降，反而係上升。
照舊同阿穎吹咗陣水上完網課，之後話咁快就2:30我嗱嗱聲去約咗阿穎嘅地方。約女仔早5分鐘到是常識吧，不過佢都同原本嘅兩年前一樣遲咗5分鐘。
穎：「Hi 你等咗好耐呀？」佢着住淺藍色嘅T恤同埋黑色嘅運動長褲行咗過嚟。
我：「唔係呀，我都係啱啱到咋。」
「快啲去巴士站啦，巴士就到啦。」
之後我哋就跑咗去巴士站。好記得當初上到巴士之後唔係好敢同佢講嘢，因為我哋好少會面對面講嘢，通常都係傾電話同message不過今次一定要改變，所以一上到巴士之後我就諗住撩佢傾偈。
穎：「你琴日錄嗰首歌真係嚇親我」佢竟然早過我就開咗話題。
我：「緊係啦，前幾日搵咗啲方法練吓，特登諗住嚇下你㗎。」
穎：「你真係好過分囉，明明日日都同我玩緊都可以練到自彈自唱。」佢扮嬲咁講。
我：「我點唱都唔夠你唱得好聽啦。」之後佢就笑住咁話：「緊係啦。」再講多幾個話題之後，我哋終於到我會所。一入到去我就同佢講「猜下波先啦。」之後我就開咗一個慢嘅上旋俾佢正手方位。佢勉勉強強打咗個高波返嚟，果然都係唔係好識打乒乓波，不過我冇理由一下殺落去嘅，之後我等個到枱邊再輕輕拍過去，咁樣玩左幾個來回，之後我俾咗個高波佢，叫佢殺過嚟，「啪，啪」聽到呢兩聲就已經知佢成功，佢開心到跳起左。




穎：「我係咪好勁呢？」
我：「梗係勁啦，殺波呢啲嘢唔係個個都做得咁好，有啲人會打落網或者出界，你一下就搞掂喎。」當然啦，我係開咗一個好容易殺到嘅位俾佢，但係佢做到都係天份嚟嘅，始終佢係一個幾sporty嘅女仔。打多一陣間之後我就話教吓佢開波，佢睇落好驚訝，因為佢完全試過開波，我應該唔會知道佢唔識，但係鬼叫我係穿越返嚟咩。我教咗佢普通嘅開上旋，話晒都練多咗兩年波，基本技巧而家都好咗好多，教人都叻左，捉住佢隻手教咗佢點樣做之後好快就識，記得當初我都唔夠膽掂佢，所以好尷尬，但係以我嘅經驗佢應該唔會介意，所以就捉住佢隻手教佢，果然係冇太多反感嘅感覺，亦好快就教識咗佢。之後我決定跟返兩年前同佢比賽輸咗嗰個請野飲，之前就係我贏不過今次我決定俾佢贏下。
今次我冇一開波就不停發力，反而不停猜波，俾佢有機會殺波，去到佢5:0我嗰陣，我就認真攞返兩分，之後再開失一球。去到最後我俾佢贏11:9。之後請佢飲熟悉嘅CC Lemon。見到佢開心嘅樣我就覺得一切都好值得。
呢個時候我諗返起之前嘅事。
穎：「我唔會再同你打㗎啦！」佢兩年前打完波之後WhatsApp我。
我：「吓，點解呀？」我嗰陣真係一頭霧水。
穎：「你係咁笑我唔識開波，好煩呀！」我嗰陣真係呆左，因為我無諗過喺佢眼中自己笑得咁過分。但係宜家諗返，分分鐘佢真係完全唔識打波，只係純粹想俾個機會我同佢出嚟，所以先應承我打波，嗰陣嘅我真係on9…
打完波之後我照舊送佢去我哋見面嘅地方送返佢上小巴俾佢返屋企，至於點解唔係直接送佢返屋企，就係因為佢唔肯俾我知佢住邊。臨走之前我問佢：「下次仲出唔出嚟玩啊？」之後佢竟然笑住咁答我：「好呀！」呢一刻我之外已經成功改寫歷史，距離成功又近左一步！