當我同朋友離家出走去左異世界: 第14章 牆壁

「咁恐怖嘅……」阿賢嚇左一跳，話。

「但係就係呢樣嘢令我冇被啲鬼壓住。」我話。

「咁又係嘅……」

「不如，我地搵左出口先？」方書文提議。

我地點點頭，開始四處查看，但係都有留意住啲畫，冇俾啲畫吸引埋去。





「過嚟聽下。」沈沈話。

我地即刻去到佢隔離，睇下佢搞乜。

沈沈敲左兩下幅牆，啲聲好似比較響亮清脆，相反其他牆嘅聲音就冇咁響，所以我地即時得到一個結論——幅牆係空心，即係後面好大機會有機關，仲係可以幫到我地出去嘅機關。

「錘。」沈沈再話。佢伸出手，高日維即刻領悟，畢竟我地幾條友都係識左幾年嘅老友。

「嗱！」唔使幾秒，一個錘就出現喺高日維手上。睇嚟佢已經將呢個超能力用到好熟。





沈沈接左個錘，用手招呼我地向後退，而佢自己就攞起個錘，一嘢敲落去。

牆壁出現左裂痕，

但係冇碎。

「吓？咁即係點呀，沈沈唔係好大力嘅咩⋯⋯」阿賢有啲疑惑咁講。

「等陣…睇下呢度。」方書文忽然間指住幅牆嘅裂縫話，「你地感受下，下面漏風。」佢唔講我地都唔覺，一講又好似真係咁。





「漏風又點呀？」高日維呢個傻仔問。

我解釋：「即係呢幅牆同地下喺有空隙，而家係四邊都有風，即係呢幅牆冇封實，可以移動。」

呢個時候就到沈沈出場——佢用佢嘅超能力，將幅牆吸出嚟。