當我同朋友離家出走去左異世界: 第13章 經歷

「你都唔知我地幾擔心你呀，呢度周圍都係陷阱，爭啲賴低條命喺度呀！」高日維本著百無禁忌嘅精神話。

聽到佢咁講，我個腦多左幾道疑惑，話：「但係我行過嚟嗰陣都唔算好驚險…雖然係差啲成塊面痴左落啲有尖刺嘅畫度。」比起被暴龍追，呢件事都算冇咁恐怖……

「吓？但係我地呢邊超危險喎！」阿賢羨慕咁話。

跟住方書文就同我講返啱啱佢地究竟經歷左啲乜。

喺我碌落個坑渠蓋之後，為左救返我同埋避開暴龍，佢地都碌左落嚟，但係呢個時候我已經碌到好前，落到去之後佢地就好似被鬼壓咁，嗌唔出，所以我就唔知佢地都落左嚟。





之後佢地入左我冇去到嘅嗰個另一個分叉口，落到地面之後，都係好似我咁見到條隧道，但係就比我行嗰條危險好多。

佢地行嘅嗰條隧道，唔單止有可以吸引人痴上去嘅奇怪畫，仲有唔少機關，有沈沈嘅帶領先可以安全嚟到呢度，但係途中都踩中左個機關，搞到佢地差啲被箭射中。

跟住沈沈叫佢地冷靜，叫方書文強化佢嘅力量，再用佢把刀暫時擋左一大部分箭，爭取時間比高日維製造一個防護罩出嚟保護佢地。

等啲箭射完，佢地先繼續行，行左一陣，佢地就見到我。

我聽完之後，心頭嘅疑惑又多左好多：





究竟呢度係咪楚嵐所講嘅地下城？

但係好似我地咁嘅超能力初學者，都可以避過襲擊，而地下城嘅人應該都係有超能力嘅，咁呢度好大機會唔係地下城。

咁問題又返嚟原點：呢度究竟係邊度？

阿賢話：「傅綽希，唔好唸咁多啦，我地不如返出去先？」佢唔講呢句，我都差啲唔記得佢可以讀心。

「好。」我話，「等陣，我忽然間醒起，你地啱啱話你地比鬼壓住所以嗌唔到出嚟，但係我冇，我唸…分別就在於我掂左牆上面嗰啲…嘢。」我比對沾有血嘅雙手佢地睇。