當我同朋友離家出走去左異世界: 第12章 重遇

既然而家都同佢地分開左，我都只好接受現實，睇下可唔可以遇返佢地。

呢度嘅空間已經足夠比我企起身，於是我決定忽略手上面唔舒服嘅感覺，攞住電筒，睇下呢度究竟係邊度。

面前有一條好長嘅路，睇唔到盡頭，但其他方向除左我啱啱滑落嚟嗰度都冇其他出口，與其花時間爬上去，仲要面對比暴龍食嘅風險，我寧願向前探索。

我行前左幾步，忽然發現呢度有陣濃濃嘅霧，就算有電筒，能見度都唔夠十米。

條路兩邊都係牆壁，上面睇嚟都係啱啱我喺隧道入面摸到嘅嘢，所以我都無心摸下。





行左一段時間，左右兩邊嘅牆壁忽然出現左幾幅畫，係一個唔知咩圖案，圓形三角形乜型都有，但係湊埋一齊，好似好吸引人咁，我居然不由自主咁行左埋去。

去到幅畫前面，我先見到上面居然有尖刺，如果我繼續行埋去，恐怕會被佢釘喺上面。

我連忙壓制住自己，儘量將意識勸攞返返嚟，可能我本身意志力強啲，所以我成功左。

我偷偷鬆左口氣，同時不禁對呢條隧道提起更多疑心。忽然我記起之前楚嵐同我講嘅嘢——呢度有地下城。

唔通呢度就係地下城？但係點解一啲地下城嘅影子我都睇唔到…… 咁呢度究竟係邊？喺我印象入面，地下城應該係繁榮啲，至少有燈。但係呢度就……





突然，大概四十米之外有幾條燈光射過嚟呢邊，但係呢條隧道都冇任何可以俾我躲藏嘅地方，我只可以攞出把槍同埋關左支電筒，殺佢地一個措手不及。

話咁快，嗰幾個人已經去到我二十米前面，我正想即刻開槍，搶佔先機，但係有把聲及時阻止左我——「傅綽希？」係沈沈把聲。

「沈沈？你地……」我拿拿臨收起槍，話。

「傅綽希！」其餘幾個人撲上嚟，話：「幾驚你死鬼左呀？！」佢地把聲帶著明顯嘅擔心，令我心入面有一道暖流流過。

「我冇嘢呀⋯⋯」我話。