當我同朋友離家出走去左異世界: 第11章 逃跑

我地一直跑，隻暴龍一直追。佢嘅一步等於我地嘅十步，想唔被佢食都難。

我地喺跑嘅過程中都冇人再記得刻記號，雖然係胡亂咁周圍跑，但係至少我地冇走散。

忽然間，我隻腳好似踩到啲唔知乜，我居然停低左，其他人見我咁都一齊停低，佢地正想問我發生咩事，我嘅視線就由地下嘅一個坑渠蓋抬起到佢地身上。

喺我講野之前，個坑渠蓋已經打開左，我亦都順理成章咁即刻跌左落去。

我跌落去嘅瞬間，聽到佢地大嗌一聲：「傅綽希！」





但係我嚟唔切俾佢地啲咩反應，成個人就跌左落去。同時聽到暴龍大吼左一聲。

跌左落去，我個屁股竟然即刻接觸到平面，但係唔夠一秒，我就滑左落去。

呢度黑漆漆，我估計應該係隧道。我強行保持冷靜，睇下隔離有冇啲咩可以俾我捉住，但係隻手淨係掂到啲濕漉漉嘅嘢。

我利用複製出嚟嘅能力臨時做左支電筒出嚟，用口咬住，見到隻手充滿住好似係血嘅液體……

由於我咬住電筒，所以講唔到啲乜，但係睜大嘅雙眼都表示到我嘅震驚，而同時我都停止滑行，到達最低嘅地方。





忽然，我意識到我而家同其他人並唔喺一齊，即係佢地冇跟我落嚟。咁佢地有冇事？隻暴龍有冇食左佢？

我回想左下，發現我啱啱滑落嚟嗰陣好似經過左一個分叉口……

「Shit……」