當我同朋友離家出走去左異世界: 第10章 危險

「咩嚟㗎！？」阿賢最先反應過嚟，問。

「啱啱飛左過去嗰隻，係咪鳳凰嚟㗎⋯⋯」高日維個樣好似撞鬼咁（不過見到鳳凰都同撞鬼冇咩分別，都係喺現實世界冇可能發生嘅）。

「如果我冇記錯嘅話，啱啱嗰隻，真係鳳凰。同書上面記載嘅一樣。」方書文啱啱喺O嘴狀態脫離出嚟，答左高日維條問題。

我話：「唔好理咁多啦，異世界點都會有啲異世界嘅樣嘅……」話就係咁話，但係我都好震驚。

「繼續向前行，唔使理。」沈沈話。佢嘅話明顯比我講嘅大好多說服力。





我地繼續行，但係好似永遠都見唔到盡頭咁，點行，附近都係花草樹木，就好似我地一直喺度兜圈咁。

「我要抖陣……」方書文首先熬唔住，出聲話要休息。我地都行度有啲腳軟，所以順勢休息下再出發。

「咁行落去唔得過喎⋯行到下世都未行出去各雨林。」高日維第一個唔滿意。

「我地等陣行嘅時候喺啲樹度留標記啦。」阿賢提議話。我地都同意左。

休息嘅時候，我掙扎左陣，最終都係決定將琴晚件事講比大家知。





「下？咁即係點呀？我地行左咁耐都冇見到地下城喎。」阿賢撓撓頭，不解咁問。

「我都唔知呀，見步行步囉，呢度始終係雨林，唔太安全，仲可能會有好似鳳凰咁嘅神獸，都係早日落到去地下城好。」我身為當事人，又係拖佢地落水嗰個，但係乜都唔知，都搞到我有啲內疚，但係好彩佢地冇話我，好快就接受現實，當係離家出走去異世界。

「出發啦。」抖左半個鐘到，我地再次上路。今次沈沈喺我地經過嘅分岔路都留左記號，但係令人毛骨悚然嘅係，無論我地係向邊個方向行，最終都會去返有記號嘅地方。

「大佬啊，我頂唔順啦⋯⋯」阿賢同高日維同時話。的確，係人喺雨林入面行幾粒鐘都唔會頂得順。

我勸佢地熬埋落去嘅說話仲未講出口，身後就忽然傳嚟幾下沙沙聲，見到面前幾個人都目瞪口呆，我頓時知道我後面應該係有怪物——





一隻同鳳凰一樣唔應該出現喺度嘅動物，暴龍。

「跑呀！！！」過左幾秒，我地反應過嚟，即刻以百米衝刺嘅速度向前跑，但係隻暴龍大吼一聲都追上嚟。
唔通我地幾個條命就交代喺呢度？