當我同朋友離家出走去左異世界: 第8章 系統

我行到出去，見到面前有一團黃色嘅光，有啲刺眼，但係比人溫暖嘅感覺，而且我覺得佢有啲熟悉。鐘聲正正就係喺入面傳出嚟。

我用手擋左下刺眼嘅黃光，感覺到光弱左啲之後，我攞嘅隻手，見到一個熟悉嘅人出現左。

「你、你咪就係嗰個樂園同埋票務處個職員？！」果然，呢個人同我入嚟異世界有關。

「係。」如今佢冇戴住口罩同埋Cap帽，加上背後有光源，所以佢個樣我睇得好清——睇真啲，佢都幾靚女，荔枝眼，但係有一股威嚴喺佢對眼度透出嚟，形成反差的感，著住一套緊身運動裝，非常凸顯身材，加埋佢好似瀑布咁嘅頭髮一瀉而下，實在係令我血脈擴張。

「我係負責喺原世界度挑選人過嚟異世界嘅人，簡單嚟講即係中介人，我可以感覺到邊度有能人異士，然後以特別嘅方法，例如搭纜車，運送佢地過嚟。」佢把聲都好好聽，柔和得嚟又不會比人軟弱嘅感覺。





但係我當然冇忘記我腦海入面超多嘅問題，我話：「咁我地點解會有超能力？」

「頭先講左，我可以感覺到能人異士喺邊，即係你地幾個就係能人異士，你地有一定嘅天賦去獲得超能力，入到嚟呢個異世界，超能力就會自動覺醒。」佢回答。

但係我嘅問題遠遠唔止咁少：「我地跟住要去邊？」

「喺森林入面，系統會隨機安排任務比你地，完成有積分，到達一定分數之後，就會喺樹洞之類嘅地方進入地下城，到時你就會知道你應該點做。」佢語速越來越快，好似趕時間咁。

我感覺佢就嚟要離開，於是暫時放低其他問題，問左句：「你叫咩名？」





「楚嵐。」佢講完呢兩個字之後就喺光圈之中消失，光亦都唔見左。