當我同朋友離家出走去左異世界: 第7章 紮營
「不如喺度紮個營呀⋯行左咁耐，今日都冇可能行出個樹林㗎啦，不如食個晚飯，休息下先啦。」我地之中體能最弱嘅方書文喘著氣，話。
「係囉⋯⋯」阿賢同高日維話。
「都好。」我點左幾下頭，跟住望向沈沉，想徵求下佢意見。
佢點點頭，算係同意。
我同高日維對望左眼，佢即刻理解到而家要做乜。
話咁快，我地面前就出現左5個帳篷，跟住高日維話：「搞定！」
然後我地就分別快速咁分配好邊個帳篷比邊個，跟住碌好杯麵，開餐。
食完之後，我地好有默契咁行出嚟，喺營地隔離訓低，享受月光浴。
「你話我係咪發緊夢呀喇？」我問。
「係就好囉！」高日維話。
「呢個天空都幾靚啊⋯⋯」阿賢話。
「係啊。」其他人同時答。
「呢度真係異世界啊？」方書文話。
「係掛⋯⋯」我答。
「我訓先。」沈沉話。
「你唔睇多陣？」我問。
沈沉搖頭。
「咁好啦。」我話。
之後我地幾個再睇多左陣月光同埋星星，感嘆左陣，就各自返入帳篷訓覺。
深夜十二點——
一向訓得淺嘅我唔知點解無啦啦聽到幾下鐘聲，係嗰啲古老時鐘嘅鐘聲，有啲恐怖，但係我唔驚。
我睜開眼，慢慢左起身，聽到鐘聲嘅來源應該係帳篷出面，於是我就行出去睇下。