［搞笑］［打機］收錢幫人戒除網癮，幫到困咗喺遊戲世界: 二十一、戰前

所有人都係全速趕嚟，一個鐘之後大部分人已經到咗我哋嘅所在地，時間差唔多可以開始。

咁多人同時向一點移動，造成唔少動靜，相信聽覺敏銳嘅紅玉龍已經聞聲而來，熟悉嘅龍吼喺耳邊迴盪。

全部人都埋位準備開波，大家都係第一次直面生死嘅人，口講唔怕，但控制唔到自己係咁同附近嘅人傾計，盡可能留低更多嘅遺言。

一班尋日仲喺屋企輕鬆打緊機殺怪嘅𡃁仔，突然間俾人推咗上真正戰場，緊張嘅感覺遠大於興奮感。朗仔喺隔離同娟姐錄音傾緊計，呢一刻，少同屋企人溝通嘅佢顯得有啲不知所措。

「媽你放心，我會平安返嚟。」





「死狗咁款，唔似你喎。」樹大有枯枝，人多有白痴。我隔離嘅玩家叫八寶粥，有次打boss我執咗佢死雞，一舊戰利品都冇分俾佢，從此結怨，每次見到都總要打吓交先肯罷休。

我同佢算係不打不相識，間中都會一齊去打吓怪、喺地圖鳩行吓，有時仲招呼佢同佢女朋友嚟食飯。

「邊似得粥哥咁威武。」八寶粥同女朋友莿姐都係近戰職業，女朋友負責坦，佢負責突擊，都算得上係遊戲入面默契最好嘅拍擋之一。

莿姐身穿厚厚嘅裝甲，我連佢一條頭髮都見唔到。我知道八寶粥呢刻好緊張，平時佢任由莿姐喺前面坦，係因為嗰陣只係遊戲，但而家真係會有生命危險。

「B啊，你係咪真係ok。」八寶粥一聲「B」肉麻得可怕，但我感受到佢係情真意切。





「唔ok嘅話我過嚟做乜，你啲咁嘅閪性格，除咗我邊有人會肯喺前面幫你坦住。」佢聽落雲淡風輕，但微微震緊嘅身軀出賣咗佢。

佢行過嚟，喺我耳邊細聲講：

「如果我有咩事，幫我睇住佢。」

八寶粥係咁追問我莿姐講咗咩，我都堅持唔答佢，要完場先揭曉。

講多幾句，我發現紅玉龍已經離我哋好近。





一陣笛聲過後，後排嘅法師們開始集體施法，作戰鬥嘅準備。

為咗遮掩紅玉龍嘅視線，佢哋用魔法慢慢生成緊一大團濃霧。

如果打其他怪，我會傾向用閃光魔法分散佢注意力，但光都係一種紅玉龍喜愛嘅元素，所以都係不了。

紅玉龍聞得出呢度有一大班人，諗住用一招將我哋打到潰不成軍，全神貫注咁吟唱，佢前方慢慢出現一個大魔法陣。

「傻鳩！」魔法陣未成型，紅玉龍突然停止吟唱，望向身後，轉眼間，魔法陣就消失得無影無蹤。

喺紅玉龍吟唱嘅同時，成身泥嘅烏鴉喺佢後面將佢條尾嘅末端一吓斬落嚟。佢把大劍俾幾個成身泥嘅法師祝福過，一吓劈落去非同小可。

佢成功激嬲咗紅玉龍，但都維持佢一貫嘅撚屌作風，跑嚟跑去分散紅玉龍注意。

暴怒嘅紅玉龍決定優先攻擊烏鴉，見勢色唔對，其他人都開始上前攻擊，以免烏鴉被集火。





喺呢個情況下，紅玉龍冇辦法吟唱，自然施唔到咩強力魔法，不過佢本身嘅力量已經好驚人，有幾個人爭啲俾佢踩中變肉餅。

見我哋有心留佢喺地面，紅玉龍亦唔打算就範，佢大力一踩，將企圖爬上佢身嘅人都震返落地。

之後，開始起飛。

佢一改傲慢姿態，唔再諗住要喺陸地上打贏我哋，想轉移陣地去高空。