［搞笑］［打機］收錢幫人戒除網癮，幫到困咗喺遊戲世界: 二十一、人多好辦事

我陸陸續續收到交友邀請，玩家等級有高有低，職業都五花八門，唯一嘅共通點係-佢哋都下定決心反擊紅玉龍，離開旺炎之森。而家呢個情況，我都唔想作無謂嘅篩選，可以招攬嘅人都招攬咗先。

由於未必一直都會一齊行動，我將佢哋加晒去一個group，方便我之後刪佢哋好友，同埋交流戰術。個group共有300人左右，都係一個幾可觀嘅數字。

由於我公信力唔算高，指揮嘅工作我都係交咗俾追隨者眾多、人緣好又識同人溝通嘅蛇仔明。啱啱加晒啲人佢就起勢打招呼，不過我諗冇乜人唔識佢。

法師嘅人數始終比較多，蛇仔明幫手將佢哋分咗三級。

等級比較低、打boss經驗少嘅，蛇仔明一律建議留喺後排，負責治療、施法提供增益同提供護盾。佢嘅講法係，反正佢哋攻擊力唔高，與其為咗多嗰少少傷害點條死路佢哋行，倒不如擺佢哋喺後面作用最大化。





等級較高、以前boss啲敢企前啲嘅法師，會被安排到戰線中間，負責遠距離攻擊，為免俾紅玉龍吸收力量，全部法師禁止使用火系魔法，同埋要優先使用水系魔法。有啲排名好前唔想上前排，蛇仔明都安排佢哋留喺中間，減少不必要嘅爭執。

高階嘅法師喺前排應付突發情況，即係執生，防止前排傷亡同製造傷害。本來蛇仔明幫Angel安排咗中排嘅位置，但佢自動請纓要喺前排幫手，蛇仔明都唔好意思拒絕。我對Angel嘅安排唔太滿意，我唔放心將自己嘅背脊交俾一個可疑人物，不過我都係冇出到聲，只係默默打算一陣離佢遠啲。

揸開冷兵器都係主戰力，薄血攻擊高嘅負責突襲，厚血嘅負責製造攻擊空間俾負責攻擊嘅隊友。

天色都漸漸昏暗，如果要落手嘅話，大家集合得嚟已經差唔多係好時機。

全部人都喺群度報咗自己位置，可能因為大家都係順住紅玉龍嘅攻勢逃走，距離唔算太遠。






群組地圖無數白色交叉開始靠攏，就係咁，全部人開始聚集，聲勢浩大咁迎接呢場戰鬥。

後來我哋發現，喺呢場異變入面，呢一戰只可以算係開胃小菜。