［搞笑］［打機］收錢幫人戒除網癮，幫到困咗喺遊戲世界: 二十二、龍脊

突然間，朗仔向半空中嘅蛇仔明打眼色，蛇仔揪起佢同Angel，極速飛向紅玉龍，趕喺佢完全起飛之前，將佢兩個送上紅玉龍嘅背脊。

睇佢三個配合得天衣無縫，應該係好早開始謀劃。蛇仔明唔同我講，就係知道我會大力反對，或者要求由我頂上朗仔個位。

仆街蛇仔明，我嘅委託費啊！

我趕唔切思考太多，少有地用魔法飛埋上去。我擔心娟姐睇到而家嘅畫面會嚇到瀨屎，因為而家好似係做緊朗仔死亡直播咁。

遠處嘅蛇仔明笑騎騎咁望住我，好似一早估到我會追埋上嚟咁。





好在佢有送多個補師上嚟，如果唔係，我真係想而家就捏死佢。我諗Angel有再多陰謀都好，應該未至於對長期戰友朗仔落手。

紅玉龍已經唔想再耽誤起飛嘅時機，任由我哋三條友喺佢背脊，想喺高空先掉我哋落嚟。

我哋就咁睇住佢飛到好高好高，喺Reality入面，飛到高空唔係新鮮事，但異變之後，我竟然開始畏高，或者我應該係畏死。

上到咁上下，紅玉龍開始高速自轉，我哋三個死死用手指扣住佢啲大塊鱗片，差啲招架唔住跌落去。

Angel輕笑咗一聲，之後用咗依附魔法，令我哋點都會有一隻手或者一隻腳貼住紅玉龍，換言之，係點都冇可能跌落去。





明明一早有呢招，佢硬係要我哋搞到咁狼狽先肯用，真係一個大仆街嚟。一諗到佢有可能突然解除魔法再一腳伸我落去，我就有少少怕。

紅玉龍大失預算，索性放棄自轉，由得我哋喺佢身上企穩。

佢以為我哋嘅目標係佢頭上嘅紅玉，覺得憑我哋三個嘅力量根本冇辦法打得爛佢，無需要擔心。

但我哋真正想做嘅，係帶返佢落地面。

莫講話前排嘅戰士，我哋大部分法師都冇辦法攻擊到咁遠嘅目標。





要帶佢落地面，就要廢咗佢一對翼。