［搞笑］［打機］收錢幫人戒除網癮，幫到困咗喺遊戲世界: 十三、人類狩獵

本來，紅玉圍獵算係難度較低嘅官方活動，紅玉龍祭主要目的都係引吓玩家課金買活動限定衫褲鞋襪，並唔係要開地獄難度嘅副本。

正因為咁，今日有好多戰力好低嘅玩家在場，以佢哋嘅程度，對住而家嘅紅玉龍頂多只係做砲灰。

按前幾年嘅經驗，紅玉龍絕對唔難打。佢可以飛嘅空間有限，因為會被困喺特定範圍內，所以玩家狀態差想退場都會比較輕鬆。

但遊戲出現異狀後，紅玉龍活動範圍唔再俾人局限，得到自由嘅佢向我地步步進迫。而家紅玉龍嘅血量仲係好高，對腦死嘅恐懼令大部分人都唔敢攻擊，特別係需要埋身肉博嘅戰士，得返零丁嘅法師敢喺空中展開遠距離攻勢，雖然有成效但進度好慢，因為佢哋同時需要避開龍嘅反擊。

呢個時候要有戰士喺前排製造攻擊空間俾法師，但咁嘅情況底下，戰士一個唔覺意就會變埋烈士。





啱啱跟住玩家嘅巫女召喚出巨型結界，將所有人包圍喺旺炎之森入面，我諗唯一解除封印嘅方式係成功擊殺紅玉龍。

全體玩家正式由獵人變成獵物。