［搞笑］［打機］收錢幫人戒除網癮，幫到困咗喺遊戲世界: 十四、有錢使得鬼推磨

因為龍王太想要活動獎勵，加上佢急住賣甩我地，喺佢第二次重生後，已經好快咁衝咗埋去紅玉龍身前攻擊，佢而家離紅玉龍距離好近，係差少少就可以一掌拍死佢嘅距離。

如果喺呢個距離進行大範圍魔法攻擊，佢都只可以硬食，冇辦法避開。慶幸嘅係，大範圍魔法攻擊需要時間發動。

面對巨大危機，醒目嘅佢即時反應過黎，全力逃亡。可惜，佢始終唔係真龍，身上裝備帶嚟嘅加速效果再多都無法同龍匹敵，更何況係解除移動限制嘅龍。龍王只可以勉強應付，我靠住飛行魔法道具，同烏鴉喺附近觀望。

龍族作為天空嘅霸主，就算係樹林呢啲咁多障礙嘅地方都阻唔到佢，佢好快已經將大批玩家逼到結界邊界。聰明少少嘅玩家已經開始散開，以免佢喺上方集中火力攻擊，全部人一鑊熟。

另外，龍王萬萬冇算到，自己一身裝備會點起紅玉龍嘅怒火，仲鎖定咗佢做主要攻擊對象。因為龍王分散咗紅玉龍嘅注意力，佢身邊其他人鬆左一口氣，但佢全力加速都只可以勉強避到幾下紅玉龍嘅攻擊。





作為遊戲入面嘅Boss，紅玉龍本應冇自己嘅意識同人格，佢嘅行為動作都係人類寫出嚟，佢應該係冇可能控制到自己點做、點諗。

但呢一刻嘅佢竟然會對死左既龍同伴有感情，仲因為龍王身上嘅屠龍戰利品感到憤怒。再加埋Reality開發商老闆走咗佬，成件事好唔對路。

Reality其中一個賣點係佢極其細緻嘅角色設定同完整既世界觀，如果每隻boss、每個角色都變得有自己思想|嘅話，恐怕我地好難有命出得返現實世界。遊戲每隔一段時間都會有特別活動，副本數量都好多，只會一次又一次咁淘汰較弱既玩家。

不過，由於娟姐應承咗會俾三倍報酬我，我哋點都會盡全力救佢個寶貝仔。

參考完龍王嘅逃跑路線，紅玉龍針對佢嘅弱點，不斷改良攻擊模式。





龍王就嚟中招嘅前一刻，一陣藍光閃過，喺龍王四圍形成一個半圓形嘅水屬性護盾。