［搞笑］［打機］收錢幫人戒除網癮，幫到困咗喺遊戲世界: 十二、接受現實

為咗吊住我條命仔，娟姐話會搵佢啲伙記爆我屋企門、抬我返佢屋企，以防有咩突發事發生。由於我喺現實世界已經失去自理能力，佢仲會私家看護嚟幫我吊鹽水、執屎執尿仲有沖涼。

雖然係好尷尬，但如果佢唔咁做嘅話我會喺屋企餓死，仲要係成身屎尿咁餓死。

蛇仔明同烏鴉屋企人都喺佢哋身邊，我哋三個總算係平平安安。

我諗遊戲出現異狀都係冇耐之前嘅事，好慶幸龍王冇遲幾分鐘先死。如果佢腦死咗又冇辦法恢復原狀，我都唔知點賠返個仔俾人，就算我事前唔知情，我都擔當唔起。

「蛇仔明、烏鴉，唔好再對龍王落手住，而家佢死左嘅話，喺現實世界都會腦死。」





任務目標已經改變，我哋而家要做嘅嘢係保護好龍王，帶佢平安出返去。

紅玉龍攻擊力比往年大增，本身已經俾遊戲異狀嚇就嘅玩家潰不成軍、死傷慘重，死者都冇辦法喺重生點重生，旺炎之森屍橫遍野。

我諗佢地就係現實世界腦死嘅人，唔知佢哋喺呢個狀態意識會去咗邊呢？

一牽涉自己條命，平時打法強勢嘅玩家都變得保守。愈黎愈多人收到風，發現自己登出唔到，本身係前排打生打死嘅玩家都選擇撒退。