［搞笑］［打機］收錢幫人戒除網癮，幫到困咗喺遊戲世界: 四、飯局

過咗幾分鐘，天花板五道木門開咗兩道，烏鴉同蛇仔明從天而降，跌到一仆一碌。


「屌你咩魚哥，又做鳩我，嘶。」蛇仔明作為呢個server數一數二嘅爛口人士，一起返身立即開我波。
蛇仔明嘅遊戲角色係一隻半人半蛇嘅怪物，佢下半身係條蛇尾，如果唔係腳都跌斷佢。
佢件紅色法師袍都跌到污糟晒，睇嚟我都要清潔吓個地板。

烏鴉就跌到暈暈哋，最後要靠蛇仔明嘅治療魔法佢先起得返身。
佢著住一身普通黑衫黑褲，據我所知佢要唸咒語先會召喚到自己套全黑色盔甲。好在佢上次熄機前除咗套甲，如果唔係嘅話餐廳地板實會裂開。





我叫廚師整咗幾味佢哋鍾意食嘅嘢，醫飽大家個肚先再傾。廚師好好客，突登行去問佢地有冇食物敏感，之後仲俾咗兩塊濕毛巾佢地抹手。

蛇仔明鍾意食pancake，面頭要放舊牛油同落糖漿嗰種，另外再加杯珍珠奶茶。啲嘢食睇落靚靚仔仔，見住佢哋俾蛇仔明個血盆大口吞沒，心裡很不是味兒。

「好好味，嘶。」

得喇得喇，知道好好味喇，好收埋你把血盆大口喇下。

烏鴉就嘴刁啲，佢要乾炒牛河、黑椒炒牛柳粒同埋紅豆冰，佢話呢度食既仲好味過現實世界食既。





想當初我set左佢同蛇仔明做餐廳既VIP，佢地有權限對廚師落指令修正食譜。

啲野食唔岩佢地口味就奇啦。

好在佢哋口味正正常常，如果唔係我間餐廳執硬。

幸好經過我嘅一番努力，餐廳收益都算係十分可觀。

「兩位親愛既好朋友，大家知唔知我搵你地黎做咩呢？」





「劈友！劈友！嘶。」蛇仔明大吼大叫。
「咪玩啦，蛇仔明，我哋一定係有更崇高嘅使命。」烏鴉反咗一吓白眼。