［搞笑］［打機］收錢幫人戒除網癮，幫到困咗喺遊戲世界: 五、天下第一

「兩位都講啱左一部分，其實我想講嘅係，我哋又有新job喇！」為免佢哋再嘈落去，我決定出嚟打圓場。

「挑，咁又即係劈友。」蛇仔明即時反返烏鴉白眼。見佢咁燥底我嗱嗱臨叫人整多杯珍珠奶茶俾佢下火。

我將陳小姐嘅委託資料放喺台面俾佢哋慢慢睇，幫大家打定個底。


「好在紅蓮乂天龍佢成日走出安全區，等我地有好多機會落手。」不愧係烏鴉，佢真係開到口叫阿龍王做紅蓮乂天龍。

「係就係多機會落手，不過單論戰力既話，條粉腸起碼可以排到全Server頭二十名，可能都會係一番苦戰。」蛇仔明㩒入龍王嘅玩家資料，再研究佢嘅裝備同佢擺上網嘅戰鬥精華片段。





先前我提到嘅排行榜唔單單睇戰力，更加會睇玩家係遊戲入面既聲望、人氣、裝備稀有度、公會規模、副本進度、遊戲資產總值等等。呢個設定嘅目標就係為咗想玩家多方面發展，唔好淨係打打殺殺咁悶。

龍王好少好似我咁搞咁多花臣，佢開game嘅目標就係「打」，佢一係打人，一係打怪，總知佢就係想成為天下第一。

另外，佢本身後生，反應亦都好快，好難純粹靠技術打贏佢。

睇佢嘅戰鬥片段都有啲眼花，佢嘅武器係一把黑色長刀，刀柄位有朵細細嘅蓮花。