［搞笑］［打機］收錢幫人戒除網癮，幫到困咗喺遊戲世界: 三、行動計劃

送走娟姐之後，我開始認真思考行動計畫。

雖然我喺Reality入面叫做排全server第十，但我已經好耐冇同過高手過招，多數都係打吓副本拎咗新奇道具。如果要憑一己之力殺到龍王哥仔片甲不留嘅話，似乎有啲難度。

於是，我決定搵多兩位隊友陪我完成任務，呢兩位都係陪我打咗成十年機嘅老友，亦都係「一心網癮戒除有限公司」嘅股東。

第一位係曾朗傑，因為佢成日著黑色衫，所以佢有個花名叫烏鴉。烏鴉同我中學識到而家，當年同我一齊日日放學打機，不過讀書我好多倍。
我硬係覺得佢會同阿龍王做到好朋友，因為烏鴉喺遊戲入面個名叫做「卍鴉卍冥卍」。呢隻game初開冇耐，我同佢食飯，問佢點解要改個咁嘅遊戲名，佢話因為型。
事到如今我已經完全接受咗佢呢個名，但依然堅拒佢想幫我改遊戲名嘅好意。佢好鍾意打Reality，佢個名長期喺排行榜二、三名位置不停游走。





另一位係蛇仔明，我冇見過佢本人，係中學時期上網打機識，玩咩online game都會揀做法師。
佢同我哋傾計會用變聲器，我成日覺得佢應該係個有錢仔，因為佢上線時間係我哋三個入面最長。

我經message急call佢哋上水，佢哋都好爽快咁覆咗我冇問題。

我急急腳咁去咗個廁所，再著好VR裝備。

連接完成之後，我眼前嘅係一間色調溫暖嘅屋仔，呢度係我開嘅餐廳「尼斯湖」

尼斯湖係我預設嘅重生點，一進入遊戲我就會喺度出現。





而且，我打咗三日三夜副本，拎到傳送門道具之後，喺餐廳整咗一個傳送門。傳送門道具會附送五條鎖匙，鎖匙持有人可以直接傳送嚟餐廳，唔使自己搵路咁麻煩。