［搞笑］［打機］收錢幫人戒除網癮，幫到困咗喺遊戲世界: 二、成交

呢隻game雖然冇色情內容，亦都唔係過暴力血腥，但佢長期收到各方嘅投訴，每隔三日你就會見到有青少年心理學家上電視講佢嘅負面影響，隔五日就可以見到家長因為佢舉行大遊行，要政府將佢強制下架。雖然係咁，但呢隻game實在太受歡迎，支持嘅聲音永遠大過反對聲音。

我算係幾鍾意呢隻game，因為佢自由度夠大，基本上冇遊戲主線要跟，全憑玩家自己摸索，我自從升到全server第十名之後，就喺新手區開咗間餐廳，委託啲新手幫我去打怪，將打怪賺返嚟嘅經驗值入落經驗樽度俾我，我再俾返遊戲幣佢哋。一個經驗樽帶嚟嘅經驗值或者好少，但一堆經驗樽可以令我每日坐喺度都升到一級。

「明白嘅陳太，你介唔介意俾阿仔個遊戲名我睇睇，等我再同你報個價？」
「個死仔成日擺上網俾人睇佢喺隻game度整咗咩出嚟，我俾張圖你，你自己睇。」

陳小姐遞咗部電話俾我，係一張cap圖。
一睇就知係單大生意。
但我搞得掂。





陳小姐個仔係遊戲入面一個頗出名嘅獨行俠，佢靠一已之力打到上全server前30名，一個中學生嚟講都算係相當有料到。遊戲入面，佢有個好型嘅朵叫做「龍王」，一嚟佢鍾意喺身掛滿自己屠龍得返嚟嘅戰利品，二嚟係佢遊戲名確實有啲難讀。

佢遊戲名叫「紅蓮乂天龍」。
嗯，望到都已經覺得好尷尬。

「呢個情況嘅話，收費會係三萬蚊，一個月內包搞掂，事成再俾錢，陳小姐你ok嗎？」

「冇問題，你以後叫我娟姐得喇，我喺對面街開車房嘅，得閒過嚟坐吓。」