佢用3粒Bitcoin買起一間7仔: 第八章 又回到最初的起點 三之三

也然返到小天地，整理下冇幾耐，門鐘已經響起，經個鎖睇到Francis已經到咗，點解咁快嘅？
 
「你自己識上嚟嘅？」也然覺得好驚訝。
 
「我今日之後上過嚟嘛，咪知道地址咯。」
 
兩個慢慢坐落LANDSKRONA梳化，準備圍爐大會。Francis留意到，喺未執嘅舊唱片堆入面，好搶眼咁有隻Pink Floyd《The Dark Side of the Moon》，佢話：「原來我箱舊碟去咗你度，呢隻黑色封面嘅碟好經典，嚟到依家，已經橫跨三四個世代。」
 
「以琳啲短訊係咪你發㗎？」也然都唔轉彎抺角，「點解你知我哋會睇呢張碟？」
 




「啲短訊係我發，連你收到英文嗰個都係我發，但後尾發覺急得滯打錯字。」原來真係Francis發嘅，「因為我預視到你發幣會帶來危險，可以阻止到冇理由唔出手，我覺得唔應該嘥時間執嘢，如果你之前一晚處理得好啲，甚或再之前處理得好啲，就唔會搞到被人追殺同貼街招。」
 
也然覺得，自己好似一隻棋，Francis比算命師更準，知道佢未來遇到乜事。
 
「如果我照直講，你哋根本唔會信，我唯有講得虛啲而嚇走以琳，博你知道CA上市日有危險。第二個短訊博你哋睇緊隻《Dark Side of the Moon》，好彩中到嘅以琳咪肯走咯，唔中嘅話我先再發其他訊息，不幸係佢冇畀個訊息你睇，如果有畀你睇⋯⋯」Francis解釋到也然心中好多疑問，但又衍生出新嘅困惑，點解Francis知道到咁多嘢？
 
「有冇考慮過，可以直接send畀我？」也然認真諗如果真係咁料事如神，唔應該發兩個短訊畀以琳。
 
「如果你第一身收到，你一定覺得係有人整古你；但經以琳部手機同佢把口轉述，你起碼會信一半，可惜係以琳自私睇仲走咗去。」Francis自圓其說到近乎完美。
 




也然聽完，靜咗起嚟，唔係因為佢攰，只係醞釀緊更深問題想問。
 
「你覺得我哋之後會點？」
 
「我頭幾日都冇諗過，但日復日過去，我已經忘記咗星期一至星期日順序係點發生，冇順序嘅日子就係我嘅順序。」Francis好感觸。
 
「冇諗過點走出去咩？」
 
「有，但諗唔到，呢個問題唔係靠諗就搵到答案。」
 




「咁你記唔記得點入嚟呢個輪迴㗎？」
 
「未重複嘅記憶，大概係暑假有日喺屋企執嘢，清下啲舊書舊玩具同雜物咁，可能噴得太多酒精，嗰日我都暈暈哋。之後啲日子就開始唔順序，橫跨呢幾個月。你呢？」
 
「我⋯⋯我仲係好亂。」也然估計點樣入呢個輪迴，同點樣出係有絕對關係，加上今次見返Francis，對方轉變太大，知嘅嘢多過自己好多，即使兩個人依家坐埋同一條船，但都要有適量嘅戒心，「呢幾日嘅嘢我都未重整到，真係諗唔到」。
 
「但自從也然你都入埋呢個奇怪嘅輪迴入面，原來唔係得我一個人，睇法又唔同咗。」Francis困得太耐，已經諗到好透徹，「既然諗唔到點走，就應該諗點樣喺呢度得到最大嘅幸福，一齊諗下點樣喺呢度生存」。
 
也然即時開啟一個隱形嘅防護網，佢覺得Francis已到係輪迴入面鬱到走咗歪路，插手想令CA上市唔失敗，保護也然攞「最大嘅幸福」，都因為謀住也然啲錢同幣。
 
更恐怖嘅係，也然淨係睇到幣上市之後嗰一日，即係12月18日，一班人約咗去George屋企BBQ。Francis連也然地址都知，經歷應該遠遠超過呢一日，資訊量大到可以編織唔同嘅故事，引導也然一舉一動。跌咗入呢個輪迴已經慘，萬一再被Francis操控到，就會苦上加苦。
 
「今晚之後，我哋碰到大家，點確認對方係真人定NPC？」也然發掘啲新話題。
 
「每朝一醒，即刻打畀對方、或者send message？」




 
「唔得，如果撞到嘅日子唔多，就有驚會鬧大件事，影響到未來或者已發生嘅事件軌跡。」也然傾向拖住先，遇唔到唔係一件壞事。
 
「咁⋯⋯」
 
「以琳差唔多到啦，你閃先啦，夜啲再聯。」
 
「好。」Francis帶住輕快嘅腳步，離開呢300呎小天地，也見到佢有比入嚟有朝氣得多嘅背影，感到好不安。