佢用3粒Bitcoin買起一間7仔: 第八章 又回到最初的起點 三之二

Francis聽到呢句，即時呆咗，原本拎喺手罐汽水跌咗落地，成罐爆開，淺啡色嘅汽水噴到周圍都係。Francis瞳孔放大，要望真眼前嘅林也然每一分每一吋。
 
在場同學同其他客人，因為聽到跌爆嘢嘅聲，望咗一望也然Francis方向，見冇事發生就冇再理會。
 
Francis走近也然，細細聲問：「你可唔可以問多一次？」
 
「我正話問你，你係第幾次嚟到今日？」Francis聽到呢句之後，雙眼通紅，快快手捉咗也然去便利店死角，即係閉路電視影唔到嘅位。
 
「點解？你都嚟咗。」Francis感動，捉實也然雙手。
 




「你嚟咗好耐？」
 
「我升中六個暑假，已經嚟咗。」
 
也然終於明白，點解Francis升咗中六會性情大變。也然自己喺三、四日來來回回，已經筋皮力盡，Francis原來係三、四個月入面兜兜轉轉，精神狀態未去到行屍走肉，已經唔係普通人可以做到。
 
「暑假之後，我每日都來來回回，開頭只係幾日之間唔順序咁重複，後來橫跨嘅時間越嚟越長。有時過聖誕，有時又啱啱中六開學，未遇過嘅事，我咪唔出聲咯，都唔識畀反應。也然，你唔會覺得我黐咗線呀可？」也然唔懷疑，多得Francis咁講，先知自己唔係唯一一個，簡直感動，好似他鄉遇故知一樣，急不及待圍爐取暖。
 
「呢個其實係咩情況？」也然點都要問下比佢早嚟嘅「師兄」。
 




「我經驗係，每完一日，都會隨時去到某一日。除咗我自己以外嘅人，全部好似打機啲NPC，每次去到同一日，佢哋都會做的雷同嘅嘢。但由於完全唔知日同日之間嘅因果關係，我每日都好努力做到最好。」
 
「點解你又知道我都嚟咗、唔係NPC？咁點解你會喺便利店救我？」
 
「你隻CA幣上市個日，其實全港都有報道。我都係嗰日先知你原來已經咁成功，亦明知你對以琳有意思，所以之前嘅今日，即係我哋同以琳星期五放學嚟換印花嗰日，亦即係今日，我先用激將法叫你做啲嘢，點知你就為印花而買咗間便利店咁有型。後來，你都知你隻幣大跌，有人要對你不利，所以我先成日喺你附近出現，其中有幾次你都畀Alex捉到，好彩嘅先跑到去便利店、我哋依家企喺度傾偈嘅位，所以我喺度擸定個酒樽等你。至於點解知你唔係NPC，係因為我有搵以琳問你啲嘢，你有時嘅行為，似係跌咗入時空洗牌。」
 
「有時？」
 
「你今日係第幾日？」
 




「大概四至五日左右啦。」也然真心唔記得，數都數唔到。
 
「你諗下，入咗呢個輪迴之後，真正嘅我哋唔係日日會遇到？例如你同我相遇後，可能你去咗兩日前，我就原地重複一次，我同你也會失散，你遇到嘅我或者我遇到嘅你，只係NPC。即係，我同你嘅空間順序，係完全唔同。」
 
也然聽到呢一刻，覺得終於真相大白，但知道真相，對擺脫呢個困局仍然係冇幫助。
 
「喂，你兩個匿埋做咩呀？走啦。」Annie離遠大叫，也然同Francis回返神，慢慢走向門口，唔畀大家知佢哋傾過啲乜。
 
「咁我重使唔使買間便利店？」也然用最細嘅聲問。
 
「買。」Francis答得斬釘截鐵。
 
「我仲有好多問題想問你。」
 
「轉頭上你新竇慢慢講你知？」Francis對也然嘅私事都極清楚。




 
「好，電聯。」
 
也然同各人喺便利店門口分道揚鑣，不過特登揀咗條唔係平時行嘅路，跟住同
以琳一齊行。也然從後拍以琳個書包，順手偷咗佢個AirPods盒，神不知鬼不覺。
 
「喂，等埋我啦。」
 
「乜你行呢邊㗎咩？」也然突兀到以琳都覺得佢有古怪。
 
「哦，我去突然間想去寵物舖睇貓。」
 
「原來你鍾意貓㗎咩？」
 
「OK㗎，你有養貓？」




 
「我有一隻英短同一隻異短，全靠佢兩個平時瞓喺隔離，陪我溫書咋。」原來以琳餵貓係真㗎。
 
「餵貓使唔使好定時㗎？」
 
「要㗎，但我呢兩隻就唔定時，有時食好多，有時掛住瞓又唔食，好可愛㗎。」貓奴一講起主子相關領域，可以講唔停。
 
也然同又琳行到去街口就講再見，趕去向谷德昭買便利店，再返去等Francis講得再深入啲。