佢用3粒Bitcoin買起一間7仔: 第九章 時光這個壞人偏卻決絕如許 三之一

某種年紀，可以不問世事，食得、瞓得、玩得，就係贏家。

幾個5歲嘅幼稚園同學，由一班家長帶領，出席一個記憶最漫長嘅生日會。「定釘~乒~乒~啦啦釘~釘~嘟~啦~嘟~」充滿童真嘅音樂，飄揚整個場地。彩色波波、Happy Birthday橫額、小朋友一人一頂生日帽，仲有成枱果汁、菠蘿腸仔、三文治、啫喱糖，色彩繽紛。

熱播的歌，忽爾靜了，場邊，一聲慘叫。

小以琳抱住隻白色嘅姆明公仔，走嚟走去，撞跌掛住飲汽水嘅小Francis，連人帶杯跌咗落地，雖然只係紙杯唔會爛，跌嘢會聯想到鬧鬧或者打打，條件反射係大叫，同埋喊喊。

「琳琳，姆明陪你跑嚟跑去都攰啦，畀佢唞唞啦。」





「Francis，有冇整污糟自己呀，過嚟呢邊同你抹手呀。」

「琳琳好叻女㗎喎，過嚟呢邊坐坐先，你要照顧姆明㗎嘛。」呢班家長嘅拆彈能力，高到可以攞諾貝爾和平獎。

「Francis，媽咪拎咗畀橙汁畀你呀，維他命C有益過汽水呀。」

小朋友都係金魚記憶，有得食有得玩就可以。

家長安排咗玩爭櫈仔遊戲，即係櫈仔嘅數目係人數減一，「定釘~乒~乒~啦啦釘~釘~嘟~啦~嘟~」，小朋友反應未係好good，都係用慢動作搶櫈仔，最後由小Francis同小也然爭冠軍。





「定釘~乒~乒~啦啦釘~釘~嘟~啦~嘟~」，小也然嘅屁股已經坐咗落櫈，成為贏家，佢搶到張櫈唔係因為手腳快，而係因為注意力較好，音樂一停，即刻搶落去。全場大人小朋友一齊鼓掌，小也然獲頒一盒施德樓木顏色筆。

「小朋友過嚟切蛋糕啦。」每次出現呢個情景，代表一班小朋友告別童年，又近一步。小以琳、小也然、小Francis同幾個幼稚園同學，乖乖企係蛋糕面前，按大人指示擺出天真無邪嘅笑容，一齊合唱生日歌同影相，也然爸爸就負責用iPhone 4配合粗疏嘅技術，拍低整個活動過程，畀一班小朋友他日回味。

大人喺度講閒話，小朋友有飲有食，生日會好快曲終人散，成班人坐兩架七人車離開。

度假村嘅活動室冷氣特別凍，顯得出面特別熱。窗外啲蟬叫到鬼殺咁嘈，係市區聽唔到嘅聲音。

小以琳抱住隻白色嘅姆明公仔，走嚟走去，撞中小Francis隔離嘅小也然，不過也然企得穩，兩個小朋友冇跌低，好可愛。





「知唔知爹吔話大一歲，我哋會有咩唔同？」揸住杯汽水嘅小Francis問小也然。

「每大一歲可以食一次生日蛋糕。」

「唔係呀，爹爹話大一歲就可以見到未來呀，見到未發生嘅嘢。」

「即係知道出年食乜嘢生日蛋糕？」小也然，最愛食。

「類似啦，爹爹又冇講會見到咩喎。」

「小朋友過嚟切蛋糕啦。」佢哋按大人指示擺出天真無邪嘅笑容，一齊大合照，慶祝大家嚟到呢個世界第5年。